ಚಿಂತೆ ಹಾಗೂ ಸಂತಾಪಗಳು ಮೇಲ್ನೋಟಕ್ಕೆ ಮನಸ್ಸಿಗೆ ದುಃಖ ನೀಡುವಂತೆ ಕಂಡರೂ ಬದುಕಿನಲ್ಲಿ ಅವೆಲ್ಲ ಇರಬೇಕು! ಶರೀರ ಶುದ್ಧಿಗಾಗಿ ಆಯುರ್ವೆದ ಹೇಳಿದ ವಿರೇಚನದಂತೆ ಮನಸ್ಸಿನ ಕೊಳೆಗಳನ್ನು ತೊಳೆದು ಹೊರಹಾಕಲು ಕಷ್ಟಗಳಿರಬೇಕು. ದೇಹದ ಆರೋಗ್ಯಕ್ಕೆ ಪಥ್ಯದ ಉಪಚಾರಗಳು ಹೇಗೋ ಮನಸ್ಸಿನ ಆರೋಗ್ಯಕ್ಕೆ ಸಂತಸದಾಯಕ ಹಾಗೂ ಉತ್ಸಾಹಭರಿತ ನಡೆ ನಮ್ಮದಾಗಿರಬೇಕು. ‘ಶೀತವಾತಗಳಾಗೆ ದೇಹಕೌಷಧ ಪಥ್ಯ’ ಎಂಬ ಕಗ್ಗದಲ್ಲಿ ಶೀತ, ವಾತಗಳು ಕೆರಳಿ ರೋಗಗಳಾದರೆ ದೇಹಕ್ಕೆ ಔಷಧವೇ ಪಥ್ಯ. ಕಣ್ಣು, ಕಿವಿಗಳು ಕೆರಳಿ ಮನಸ್ಸು ಉದ್ವಿಗ್ನಗೊಂಡರೆ ಪ್ರೀತಿಯಿಂದ ಮನಸ್ಸನ್ನು ಒಲಿಸಿಕೊಂಡು ಒಳಿತು ಕೆಡುಕಗಳು, ಹಿತ ಅಹಿತವಾದವುಗಳನ್ನು ತಿಳಿಹೇಳಿ ಪ್ರೀತಿಮಾರ್ಗದಿಂದ, ನೀತಿಮಾರ್ಗದಿಂದ ಚಿತ್ತವನ್ನು ಸರಿದಾರಿಗೆ ತಂದರೆ ಆತ್ಮಕ್ಕೆ ನೆಮ್ಮದಿಯನ್ನು ನೀಡುತ್ತದೆ. ನೆಮ್ಮದಿಯ ಬದುಕಿಗೆ ಸದಾಚರಗಳೇ ಮುಖ್ಯ. ರೋಗ ಪರಿಹಾರಕ್ಕೆ ಪಥ್ಯ ಪಾಲನೆಯೂ ಅಷ್ಟೇ ಮುಖ್ಯ ಎಂದಿದ್ದಾರೆ.
