ದೇಶದಲ್ಲಿರುವ ಪ್ರಸಕ್ತ ರಾಜಕೀಯ ವ್ಯವಸ್ಥೆಯನ್ನು ನೋಡಿದರೆ, ಒಂದು ಅಂಶ ಕಣ್ಣಿಗೆ ರಾಚುತ್ತದೆ. ಅದೇನೆಂದರೆ, ಕುಟುಂಬ ರಾಜಕಾರಣದ ವಿಷವರ್ತಲ! ತಮಿಳುನಾಡಿನ ಡಿಎಂಕೆಯಿಂದ ಹಿಡಿದು ಕಾಶ್ಮೀರದ ನ್ಯಾಷನಲ್ ಕಾನ್ಪರೆನ್ಸ್ ಪಕ್ಷದವರೆಗೆ, ಹಾಗೆಯೇ ಮಹಾರಾಷ್ಟ್ರದ ಶಿವಸೇನೆಯಿಂದ ಹಿಡಿದು ಬಂಗಾಳದ ತೃಣಮೂಲ ಕಾಂಗ್ರೆಸ್ ಪಕ್ಷದವರೆಗೆ ಈ ಅಸಹ್ಯಕರ ಮತ್ತು ಅಪಾಯಕರ ವಿದ್ಯಮಾನವಿದೆ. ಇದಕ್ಕೆ ನಮ್ಮ ರಾಜ್ಯದ ಜೆಡಿಎಸ್, ರಾಷ್ಟ್ರೀಯ ಪಕ್ಷಗಳಾಗಿರುವ ಕಾಂಗ್ರೆಸ್ ಮತ್ತು ಬಿಜೆಪಿ ಕೂಡ ಹೊರತಾಗಿಲ್ಲ. ದುರಂತವೆಂದರೆ, ಒಂದು ಕಾಲದಲ್ಲಿ ಕಾಂಗ್ರೆಸ್ಸಿನ ವಂಶಪಾರಂಪರ್ಯ ರಾಜಕಾರಣದ ವಿರುದ್ಧ ಬಿಜೆಪಿ ಸೇರಿದಂತೆ ಉಳಿದ ಪ್ರಾದೇಶಿಕ ಪಕ್ಷಗಳು ಕಹಳೆ ಊದುತ್ತಿದ್ದವು. ಆದರೆ, ಈಗ ಈ ಪಕ್ಷಗಳೇ ಕುಟುಂಬ ರಾಜಕಾರಣವನ್ನು ಪೋಷಿಸುತ್ತಿವೆ.
