ಐಪಿಎಲ್ 2023ರ ಆವೃತ್ತಿ ಈಗಷ್ಟೇ ಮುಗಿದಿದ್ದರೂ ಜನ ಇನ್ನೂ ಅದರ ಗುಂಗಿನಿಂದ ಹೊರಬಂದಿಲ್ಲ. ನಿಜಕ್ಕೂ ಅದು ಕ್ರಿಕೆಟ್ಟಿನ ಜಾತ್ರೆಯೇ. ಹೇಗೆ ಜಾತ್ರೆಗಳಲ್ಲಿ ದೇವರ ದರ್ಶನದ ಕಾರಣವು ಹಣ್ಣು- ಕಾಯಿ ಅಂಗಡಿಯವನ; ಪುಗ್ಗೆ, ಜಿಲೇಬಿ, ಬತ್ತಾಸು ಮಾರುವವನ ಮನೆಯ ಒಲೆ ಉರಿಯಲು ಕಾರಣವಾಗುತ್ತದೆಯೋ ಹಾಗೆ ಈ ಕ್ರಿಕೆಟ್ಟಿನ ಮೇಲಿನ ಹುಚ್ಚು ತಂಡಗಳ ಧ್ವಜ ಮಾರುವವರ, ಟ್ಯಾಟೂ ಕಲಾವಿದರ, ಐಸ್ ಕ್ಯಾಂಡಿ, ಪೀಪಿ ಮಾರಾಟಗಾರರ ಹೊಟ್ಟೆ ಹೊರೆಯುತ್ತದೆ. ಆಟಗಾರರು, ಬಿಸಿಸಿಐ ಇದರ ನೇರ ಫಲಾನುಭವಿಗಳಾದರೆ ಪರೋಕ್ಷವಾಗಿ ಲಾಭ ಪಡೆಯುವವರ ಪಟ್ಟಿಯೂ ದೊಡ್ಡದಿದೆ. ಎಷ್ಟೋ ಮಾಜಿ ಆಟಗಾರರು ತಮ್ಮ ಪೂರ್ತಿ ಕ್ರಿಕೆಟ್ ಜೀವನದಲ್ಲಿ ಕಂಡುಕೇಳರಿಯದಷ್ಟು ಹಣವನ್ನು ಒಂದು ತಂಡದ ಕೋಚ್ಗಳಾಗಿ, ವೀಕ್ಷಕ ವಿವರಣೆಗಾರರಾಗಿ ಪಡೆಯುತ್ತಿದ್ದಾರೆ. ಇನ್ನು ಜಾಹೀರಾತುದಾರರಿಗಂತೂ ಪೂರ್ತಿ ಎರಡು ತಿಂಗಳೂ ಪ್ರೖೆಮ್ ಟೈಮ್ ಇದನ್ನು ಕ್ಯಾಷ್ ಮಾಡಿಕೊಳ್ಳುವ ಜಾಹೀರಾತು ಕಂಪನಿಗಳು, ಈ ಸಮಯದಲ್ಲೇ ತಮ್ಮ ಹೊಸ ಪ್ರಾಡಕ್ಟನ್ನು ಬಿಡುಗಡೆ ಮಾಡಲು ಹಾತೊರೆಯುವ ಉತ್ಪಾದಕರು ಈ ಎಲ್ಲ ಕಾರಣಕ್ಕೆ ಈ ಪಂದ್ಯಾವಳಿಯ ನೇರಪ್ರಸಾರದ ಹಕ್ಕಿಗಂತೂ ಪಂದ್ಯದ ರೀತಿಯಲ್ಲೇ ಹಣಾಹಣಿ ನಡೆಯುತ್ತದೆ.
