ಇತ್ತ ಭಾರತದಲ್ಲಿ, ಕರೊನಾ ಲಸಿಕೆ ವಿಷಯದಲ್ಲಿ ವದಂತಿ, ಆತಂಕ ಸೃಷ್ಟಿಯಾಗಿತ್ತಲ್ಲ. ಕರೊನಾ ವ್ಯಾಕ್ಸಿನ್ ತೆಗೆದುಕೊಂಡ ನಂತರದಲ್ಲಿ ಆರೋಗ್ಯ ಸಮಸ್ಯೆಗಳು ಹೆಚ್ಚುತ್ತಿವೆ; ಅದರಲ್ಲೂ 20, 30, 40 ವಯೋಮಾನದ ಯುವಜನರಲ್ಲಿ ಹೃದಯಾಘಾತ ಪ್ರಮಾಣ ಹೆಚ್ಚಿದೆ; ನಿನ್ನೆ ಮೊನ್ನೆವರೆಗೂ ಆರೋಗ್ಯವಂತರಾಗಿದ್ದವರು ಸಹ ದಿಢೀರನೆ ಸಾಯುವ ಪ್ರಕರಣಗಳು ಏರಿಕೆ ಕಂಡಿವೆ ಎಂದು ಜನರು ಹೇಳುತ್ತಿದ್ದುದು ಹಳ್ಳಿಹಳ್ಳಿಗಳಲ್ಲಿ ಸಹ ಕಂಡುಬರುತ್ತಿತ್ತು. ಈ ಅನಿಸಿಕೆ ಹಾಗೇ ಬಹಳ ಕಾಲ ಮುಂದುವರಿಯುವುದು ಸಾರ್ವಜನಿಕ ಆರೋಗ್ಯದ ಹಿತದೃಷ್ಟಿಯಿಂದ ಉತ್ತಮವಲ್ಲ ಎಂದು ಮನಗಂಡು, ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿ (ಐಸಿಎಂಆರ್) ವತಿಯಿಂದ ಒಂದು ವ್ಯಾಪಕವಾದ ಅಧ್ಯಯನವನ್ನು ನಡೆಸಲಾಯಿತು. ಆ ಅಧ್ಯಯನ ವರದಿಯು ಬಹಿರಂಗಪಡಿಸಿದ ಅಂಶವು, ಕರೊನಾ ಲಸಿಕೆಯನ್ನು ಆರೋಪಿಸ್ಥಾನದಿಂದ ಮುಕ್ತಗೊಳಿಸಿದೆ ಎನ್ನಬಹುದು. ಐಸಿಎಂಆರ್ ಇದು ಕೇಂದ್ರ ಆರೋಗ್ಯ ಸಚಿವಾಲಯದಡಿ ಕಾರ್ಯನಿರ್ವಹಿಸುವ ಸಂಸ್ಥೆಯಾಗಿದ್ದು, ಇದರ ಮಾತಿಗೆ ಜಾಗತಿಕ ವೈದ್ಯಕೀಯ ಮತ್ತು ವೈಜ್ಞಾನಿಕ ವಲಯದಲ್ಲಿ ಮನ್ನಣೆ ಇದೆ. ಕರೊನಾ ಲಸಿಕೆ ಪುಕಾರಿನ ಅಸಲಿಯತ್ತನ್ನು ಕಂಡುಕೊಳ್ಳುವ ನಿಟ್ಟಿನಲ್ಲಿ ದೇಶದ ವಿವಿಧೆಡೆಯ 36 ಆಸ್ಪತ್ರೆಗಳ ಅಂಕಿಅಂಶಗಳನ್ನು ತಜ್ಞರು ಕಲೆಹಾಕಿದರು. ಅಧ್ಯಯನದ ಕೊನೆಯಲ್ಲಿ ಅವರು ಯಾವ ನಿಷ್ಕರ್ಷೆಗೆ ಬಂದರೆಂದರೆ- ಕರೊನಾ ಲಸಿಕೆ ತೆಗೆದುಕೊಂಡಿದ್ದರಿಂದಾಗಿ ಹಠಾತ್ ಸಾವು ಸಂಭವಿಸಿಲ್ಲ; ವಾಸ್ತವದಲ್ಲಿ, ಕರೊನಾ ಲಸಿಕೆಯು ಹಠಾತ್ ಸಾವಿನ ಪ್ರಮಾಣವನ್ನು ಕಡಿಮೆ ಮಾಡಿದೆ ಎಂದು. ಅನಿಯಮಿತ ಹಾರ್ಟ್ ಬೀಟ್, ಕುಟುಂಬದಲ್ಲಿ ಹಠಾತ್ ಸಾವಿನ ಪ್ರಕರಣಗಳು, ಸಾವಿಗೆ ಮುನ್ನ 48 ಗಂಟೆಗಳಲ್ಲಿ ಅತಿಯಾದ ಕುಡಿತ, ರೂಢಿಯಿಲ್ಲದ, ವಾಡಿಕೆಯಲ್ಲದ ದೈಹಿಕ ಚಟುವಟಿಕೆಗಳಲ್ಲಿ ಅತಿಯಾಗಿ ತೊಡಗುವುದು, ಕರೊನಾದಿಂದಾಗಿ ಆಸ್ಪತ್ರೆಗೆ ದಾಖಲಾಗಿದ್ದು- ಈ ಮುಂತಾದವು ಹಠಾತ್ ಸಾವಿಗೆ ಕಾರಣಗಳೇ ಹೊರತು ಕರೊನಾ ವ್ಯಾಕ್ಸಿನ್ ತೆಗೆದುಕೊಂಡ ಮಾತ್ರಕ್ಕೆ ಸಾವು ಸಂಭವಿಸಿಲ್ಲ ಎಂದು ತಜ್ಞರು ನಿರ್ಣಯಕ್ಕೆ ಬಂದಿದ್ದಾರೆ.
