ತೌಕ್ತೆ ಚಂಡಮಾರುತದ ಪ್ರಭಾವವೋ ಎಂಬಂತೆ ರಾಜ್ಯದ ರೈತರ ಚಿತ್ತ ಈ ಸಲ ಅವಧಿಗೆ ಮುನ್ನವೇ ಹೊಲಗಳತ್ತ ಹರಿದಿದೆ. ಮುಂಗಾರುಪೂರ್ವ ಅವಧಿಯಲ್ಲಿ ಸುರಿದ ಮಳೆಯ ಹಿನ್ನೆಲೆಯಲ್ಲಿ ರಾಜ್ಯದಲ್ಲಿ ನಿಗದಿತ ಅವಧಿಗಿಂತ ಮೊದಲೇ ಮುಂಗಾರು ಹಂಗಾಮಿನ ಕೃಷಿ ಚಟುವಟಿಕೆಗೆ ಭರದ ಚಾಲನೆ ಸಿಕ್ಕಿದೆ. ಬಿತ್ತನೆ ಬೀಜ ಮತ್ತು ರಸಗೊಬ್ಬರ ಅಭಾವ ಎದುರಾಗದಂತೆ ಸರ್ಕಾರವೂ ಸಿದ್ಧತೆ ಮಾಡಿಕೊಂಡಿದೆ. ಮುಂಗಾರುಪೂರ್ವ ಅವಧಿಯಲ್ಲಿ ರಾಜ್ಯದಲ್ಲಿ ಈ ಸಲ ವಾಡಿಕೆಗಿಂತ ಶೇ. 63ರಷ್ಟು ಹೆಚ್ಚು ಮಳೆ ಆಗಿದೆ. ಹಾಗಾಗಿ ಮೇ ತಿಂಗಳಿನಲ್ಲಿಯೇ ಬಿತ್ತನೆ ಚಟುವಟಿಕೆ ಚುರುಕುಗೊಂಡಿದೆ. ಜೂನ್ ಮೊದಲ ವಾರ ರಾಜ್ಯಕ್ಕೆ ಮುಂಗಾರು ಪ್ರವೇಶಿಸುವ ಸಾಧ್ಯತೆ ಇದ್ದರೂ ಕಳೆದ ಒಂದು ವಾರದಿಂದ ಎಲ್ಲೆಡೆ ಸಾಕಷ್ಟು ಮಳೆಯಾಗಿದೆ. ಈಗಲೂ ಕೆಲವೆಡೆ ಮಳೆ ಮುಂದುವರಿದಿದೆ. ಹೀಗಾಗಿ, ಕೃಷಿ ಇಲಾಖೆ ರಾಜ್ಯದ 30 ಜಿಲ್ಲೆಗಳಿಗೆ ಬೇಡಿಕೆ ಆಧರಿಸಿ ಈಗಾಗಲೇ ರಸಗೊಬ್ಬರ, ಬೀಜ ಪೂರೈಸಿದೆ. ಮುಂಗಾರಿನಲ್ಲಿ ರಾಜ್ಯದ 73 ಲಕ್ಷ ಹೆಕ್ಟೇರ್ ಪ್ರದೇಶದಲ್ಲಿ ಬಿತ್ತನೆ ಸಾಧ್ಯತೆ ಇದ್ದು 30 ಜಿಲ್ಲೆಗಳಿಂದ ಇದುವರೆಗೆ 7.97 ಲಕ್ಷ ಟನ್ ರಸಗೊಬ್ಬರಕ್ಕೆ ಬೇಕಾಗಲಿದೆ ಎಂದು ಅಧಿಕಾರಿಗಳು ಬೇಡಿಕೆ ಇಟ್ಟಿದ್ದರು. ಏ.1ರಿಂದ ಮೇ 19ರ ಅವಧಿಯಲ್ಲಿ 4.48 ಲಕ್ಷ ಟನ್ ಪೂರೈಕೆ ಮಾಡಿದ್ದು, ಉಳಿಕೆ ದಾಸ್ತಾನು ಸೇರಿದಂತೆ 30 ಜಿಲ್ಲೆಯ ಸಗಟು ಮತ್ತು ಚಿಲ್ಲರೆ ಮಾರಾಟ ಮಳಿಗೆಗಳಲ್ಲಿ ಸದ್ಯ 12.21 ಲಕ್ಷ ಟನ್ ವಿವಿಧ ಬಗೆಯ ರಸಗೊಬ್ಬರದ ಸಂಗ್ರಹ ರೈತರಿಗೆ ಲಭ್ಯವಿದೆ.
