ದೂಧ್​ಸಾಗರ್​: ಸೌಂದರ್ಯ ಸಿರಿ, ಧುಮ್ಮಿಕ್ಕುವ ಪರಿ..

ಜಿಟಿ-ಜಿಟಿ ಮಳೆ, ಚುಮುಚುಮು ಚಳಿ. ಹಕ್ಕಿಗಳ ಚಿಲಿಪಿಲಿ. ನೀರಿನ ಜುಳು-ಜುಳು. ಮೈಮನ ಮರೆಸುವ ವಾತಾವರಣ. ಇದು ಪ್ರಕೃತಿಯ ಒಡಲಲ್ಲಿ ಇರುವ ‘ದೂಧ್ ಸಾಗರ್ ಫಾಲ್ಸ್’ನ ವೈಶಿಷ್ಟ್ಯ ಮಳೆಗಾಲ ಆರಂಭಗೊಂಡಿದ್ದು, ಈ ಪ್ರದೇಶವೀಗ ಮನೋಹರವಾಗಿ ಕಂಗೊಳಿಸುತ್ತಿದೆ.

| ಧರ್ಮರಾಜ ಪಾಟೀಲ ಬೆಳಗಾವಿ

ಪಶ್ಚಿಮ ಘಟ್ಟದಲ್ಲೀಗ ಪ್ರಕೃತಿ ಸೌಂದರ್ಯದ ನರ್ತನ. ಎಲ್ಲೆಲ್ಲೂ ಹಸಿರಿನಿಂದ ತುಂಬಿದ ವನಸಿರಿ. ದಟ್ಟನೆಯ ಕಾಡು; ಅಲ್ಲಲ್ಲಿ ಹೃನ್ಮನ ಸೆಳೆಯುವ ಜಲಪಾತಗಳು. ವರ್ಣನೆಗೆ ನಿಲುಕದ ಸೊಬಗು. ಸ್ವರ್ಗವೇ ಧರೆಗೆ ಇಳಿದಿದೆಯೇ ಎಂಬ ಭಾವ. ಇದು ‘ದೂಧ್ ಸಾಗರ್ ಫಾಲ್ಸ್’ನ ಪ್ರಭಾವ. ಕರ್ನಾಟಕ- ಗೋವಾ ಗಡಿಯ ನಿತ್ಯಹರಿದ್ವರ್ಣ ಕಾಡಿನ ಮಧ್ಯದಲ್ಲಿ 1,017 ಅಡಿ ಎತ್ತರ ಹಾಗೂ 100 ಅಡಿ ಅಗಲದಲ್ಲಿ ಈ ಜಲಪಾತ ಧುಮ್ಮಿಕ್ಕುತ್ತಿದೆ. ಭಾರತದಲ್ಲಿರುವ ಅತಿ ಎತ್ತರದ ಜಲಪಾತಗಳಲ್ಲಿ ಇದೂ ಒಂದು. ಮುಂಗಾರು ಮಳೆ ಆರಂಭದಲ್ಲೇ ಉತ್ತಮವಾಗಿ ಸುರಿದ ಪರಿಣಾಮ ಬೆಟ್ಟ-ಗುಡ್ಡಗಳೆಲ್ಲ ಹಚ್ಚಹಸಿರು ಹೊದ್ದುಕೊಂಡಿವೆ. ವನಸಿರಿ ಮಧ್ಯೆ ಭೋರ್ಗರೆಯುತ್ತ ಹಾಲಿನ ಹೊಳೆಯಂತೆ ಇಲ್ಲಿ ನೀರು ಬೀಳುತ್ತಿದೆ. ಈ ಜಲಪಾತ ಎರಡು ಕವಲುಗಳಾಗಿ ಹರಿದು, ಮತ್ತೆ ಒಂದೇ ಕಡೆ ಸೇರಿ ಕಲ್ಲುಬಂಡೆಯನ್ನು ಬಳಸಿ ಮತ್ತೆ ನಾಲ್ಕು ಕವಲುಗಳಾಗಿ ಬೇರ್ಪಟ್ಟು ಧುಮ್ಮಿಕ್ಕುತ್ತದೆ. ಮಾಂಡೋವಿ (ಮಹಾದಾಯಿ) ನದಿಯ ನೀರು, ಪಶ್ಚಿಮ ಘಟ್ಟದ ಸಾಲುಗಳಲ್ಲಿ ಹರಿದು ಅರಬ್ಬೀ ಸಮುದ್ರ ಸೇರುವ ಮೊದಲು ಈ ಸೌಂದರ್ಯ ಮೈದಳೆದಿರುತ್ತದೆ.

ವ್ಯೂ ಪಾಯಿಂಟ್: ಫಾಲ್ಸ್​ಗೆ ಭೇಟಿ ನೀಡುವ ಪ್ರವಾಸಿಗರಿಗೆ ಅಲ್ಲಿನ ಸೌಂದರ್ಯ ವೀಕ್ಷಿಸಲು ಗೋವಾ ಅರಣ್ಯ ಇಲಾಖೆ ‘ವ್ಯೂ ಪಾಯಿಂಟ್’ ನಿರ್ವಿುಸಿದೆ. ಜಲಪಾತದ ಸಮೀಪ ಹೋಗಲು ಸ್ಟೆಪ್ಡ್ ಗಾರ್ಡನ್ ಇದೆ. ವಯಸ್ಸಾದವರೂ ಹತ್ತಿರದಿಂದ ವೀಕ್ಷಿಸಬಹುದು.

ಸುರಂಗ ಮಾರ್ಗ

ಎಲ್ಲಿದೆ?: ಬೆಳಗಾವಿಯಿಂದ 80 ಕಿ.ಮೀ., ಪಣಜಿಯಿಂದ 60 ಕಿ.ಮೀ.

ಹೋಗುವುದು ಹೇಗೆ?: ಬೆಳಗಾವಿಯ ಲೋಂಡಾ ರೈಲ್ವೆ ಜಂಕ್ಷನ್​ನಿಂದ ಕ್ಯಾಸಲ್​ರಾಕ್ ಮಾರ್ಗವಾಗಿ ಸಾಗಿ ದೂಧ್ ಸಾಗರ ಫಾಲ್ಸ್ ಸಮೀಪದಲ್ಲೇ ಇಳಿಯಬಹುದು. ದೂಧ್​ಸಾಗರ್ ಬಳಿ ರೈಲು ನಿಲ್ದಾಣವಿಲ್ಲ. ಆದರೆ, ಪ್ರವಾಸಿಗರಿಗೆ ಅನುಕೂಲವಾಗಲೆಂದು ಆ ಮಾರ್ಗದಲ್ಲಿ ಸಾಗುವ ರೈಲನ್ನು ಒಂದು ನಿಮಿಷ ನಿಲ್ಲಿಸುತ್ತಾರೆ. ಟ್ರೆಕ್ಕಿಂಗ್​ಗಾದರೆ ಕ್ಯಾಸಲ್​ರಾಕ್​ನಿಂದ ರೈಲು ಹಳಿ ಮೇಲೆ 14 ಕಿ.ಮೀ. (6 ತಾಸು) ನಡೆಯಬೇಕು. ಗೋವಾದ ಕುಳೆಂ ರೈಲು ನಿಲ್ದಾಣದಿಂದ 8 ಕಿ.ಮೀ. (4 ತಾಸು) ನಡೆದು ಬರಬಹುದು. ಆದರೆ, ದಟ್ಟ ಕಾಡಿನ ಮಧ್ಯೆ ನಡೆಯುವುದು ಅಪಾಯ. ರಸ್ತೆ ಮಾರ್ಗವಾದರೆ ಗೋವಾದ ಕುಳೆಂ ತಲುಪಿ ಜೀಪ್ ಬಾಡಿಗೆ ಪಡೆದು, ದೂಧ್​ಸಾಗರ್ ತಲುಪಬಹುದು.

https://www.vijayavani.net/article-about-world-emoji-day/

https://www.vijayavani.net/kpsc-appointment-controversy-again-back-to-kat/