ವಿನೋದನ ಮೊಬೈಲ್ ಫೋನಿನಲ್ಲಿದ್ದ ಖಾಸಗಿ ಡಾಟಾವನ್ನು ಕಳ್ಳತನ ಮಾಡಿದ್ದರೆಂದು ಲೋನ್ ಆಪ್ ಕಂಪನಿಯ ಮೇಲೆ ಮಾಹಿತಿ ತಂತ್ರಜ್ಞಾನ ಕಾಯ್ದೆಯ ಅನ್ವಯ ಇನ್ನೊಂದು ಕೇಸನ್ನು ದಾಖಲಿಸಿದರು. ಜಪ್ತಿ ಮಾಡಿದ್ದ ವಿನೋದ್ನ ಮೊಬೈಲ್ ಫೋನಿಗೆ ಬೆದರಿಕೆಯ ಕರೆಗಳನ್ನು ಮಾಡಿದ್ದ ಕಂಪನಿಯ ಏಜೆಂಟರಾದ ಸುರೇಶ್ ಮತ್ತು ವಸಂತ್ ಇವರಿಬ್ಬರನ್ನೂ ಪೊಲೀಸ್ ಠಾಣೆಗೆ ಕರೆಸಿ ವಿಚಾರಣೆ ಮಾಡಲಾಯಿತು. ಅವರಿಬ್ಬರೂ ತಾವು ಲೋನ್ ಕಂಪನಿಯ ನೌಕರರಲ್ಲವೆಂದೂ ಸಾಲ ಪಡೆದು ಮರಳಿಸಿದವರಿಗೆ ಬೆದರಿಸಲು ತಮ್ಮನ್ನು ನೇಮಿಸಿಕೊಳ್ಳಲಾಗಿದೆಯೆಂದೂ ತಿಳಿಸಿದರು. ಅವರಿಬ್ಬರನ್ನೂ ಬಂಧಿಸಿದ ನಂತರ ಪೊಲೀಸರು ಆ ನಗರದಲ್ಲಿದ್ದ ಲೋನ್ ಆಪ್ ಶಾಖೆಯ ಕಚೇರಿಗೆ ಹೋದರು. ಅಲ್ಲಿನ ಕಂಪ್ಯೂಟರ್ಗಳು, ಫೋನುಗಳು, ಕಾಗದ ಪತ್ರಗಳು ಮತ್ತಿತರ ದಾಖಲೆಗಳನ್ನು ವಶಪಡಿಸಿಕೊಂಡರು. ಶಾಖಾಧಿಕಾರಿಯನ್ನು ವಶಕ್ಕೆ ಪಡೆದು ಅವನನ್ನು ತೀವ್ರ ವಿಚಾರಣೆಗೆ ಒಳಪಡಿಸಿದರು. ತಮ್ಮ ಲೋನ್ ಆಪ್ನ ಕೇಂದ್ರ ಕಚೇರಿಯು ಚೆನ್ನೈನಲ್ಲಿದ್ದು, ಭಾರತದ 15 ರಾಜ್ಯಗಳ ರಾಜಧಾನಿಗಳಲ್ಲಿ ಅದರ ಶಾಖೆಗಳಿವೆ. ಶಾಖಾ ಕಚೇರಿಗಳು ಆಪ್ ಮೂಲಕ ಸಾಲ ಕೇಳಿದವರನ್ನು ಸಂರ್ಪಸಿ ಅವರಿಗೆ ಸಾಲ ನೀಡುವುದಲ್ಲದೆ, ಕೊಟ್ಟ ಸಾಲಗಳನ್ನು ವಸೂಲಿ ಮಾಡುತ್ತವೆ. ನಾವು ಯಾರಿಗೂ ಸಾಲ ತೆಗೆದುಕೊಳ್ಳಿ ಎಂದು ಬಲವಂತ ಮಾಡುವುದಿಲ್ಲ, ನಮ್ಮ ಆಪ್ ಡೌನ್ ಲೋಡ್ ಮಾಡಿ ಯಾರು ಸಾಲ ಪಡೆಯುತ್ತಾರೋ ಅವರು ನಿಗದಿತ ಸಮಯದಲ್ಲಿ ಬಡ್ಡಿ ಸಮೇತ ಸಾಲ ತೀರಿಸುವುದನ್ನು ನೋಡಿಕೊಳ್ಳುವುದಷ್ಟೆ ನಮ್ಮ ಕೆಲಸ. ಅವರು ಒಂದು ವೇಳೆ ಸಾಲ ತೀರಿಸದಿದ್ದರೆ ಅವರನ್ನು ಬೆದರಿಸಿ ಕೊಟ್ಟ ಸಾಲವನ್ನು ವಾಪಸ್ ಪಡೆಯಲು ನಮ್ಮ ಮೇಲಾಧಿಕಾರಿಗಳು ಸೂಚಿಸಿದ್ದಾರೆ. ಏಕೆಂದರೆ ನಾವು ಯಾವುದೇ ರೀತಿಯ ಸೆಕ್ಯೂರಿಟಿ ಇಲ್ಲದೇ ಅವರಿಗೆ ಸಾಲ ಕೊಟ್ಟಿರುತ್ತೇವೆ. ಬಹುತೇಕ ಜನರು ನಾವು ಇಷ್ಟೆಲ್ಲಾ ಬೆದರಿಸಿದರೂ ಸಾಲ ಮತ್ತು ಬಡ್ಡಿಯನ್ನು ಮರಳಿಸುವುದಿಲ್ಲ. ನಮ್ಮಲ್ಲಿ ಸಾಲ ಮಾಡಿದವರಲ್ಲಿ ಶೇ. 30ರಷ್ಟು ಜನರು ಸಾಲವನ್ನೇ ತೀರಿಸಿಲ್ಲ ಎಂದ. ಬೆದರಿಕೆಯ ಕರೆಗಳನ್ನು ಮಾಡಲು ನಾವು ಐದಾರು ಜನರನ್ನು ಏಜೆಂಟುಗಳನ್ನಾಗಿ ಇಟ್ಟುಕೊಂಡಿದ್ದೇವೆ. ಅವರು ನಮ್ಮ ಸಂಸ್ಥೆಯ ನೌಕರರಲ್ಲ, ಅವರಿಗೆ ಕಮಿಷನ್ ಕೊಡುತ್ತೇವೆ ಎಂದ.
