ಮಾಡಬೇಕಾದುದೇನು?: ಈ ಸಸ್ಯದ ಹಸಿ ಎಲೆಗಳನ್ನು ತಂದು ಜಜ್ಜಿ ಪೇಸ್ಟ್ ಮಾಡಿ ಒಂದು ಚಿಕ್ಕ ಅಡಿಕೆಯಷ್ಟನ್ನು ನಿತ್ಯವೂ ಸೇವಿಸಿದರೆ ಪ್ರಾಸ್ಪೇಟ್ ಗ್ರಂಥಿಯ ಸಮಸ್ಯೆ ಕಡಿಮೆಯಾಗುತ್ತದೆ. ಹಸಿ ಎಲೆಗಳು ಸಿಗದಿದ್ದರೆ ಒಣಗಿಸಿ ಇಟ್ಟುಕೊಂಡ ಗಿಡವನ್ನು ಚಿಕ್ಕ ಚಿಕ್ಕ ತುಂಡುಗಳನ್ನಾಗಿ ಕತ್ತರಿಸಿಕೊಂಡು ಎರಡು ಚಮಚದಷ್ಟು ಈ ಪುಡಿಗೆ ನಾಲ್ಕು ಲೋಟ ನೀರು ಹಾಕಿ ಒಂದು ಲೋಟಕ್ಕೆ ಬತ್ತಿಸಿ, ಸೋಸಬೇಕು. ಅದನ್ನು ಬೆಳಗ್ಗೆ ಮತ್ತು ರಾತ್ರಿ ಆಹಾರದ ಮೊದಲು ಅರ್ಧ ಲೋಟದಷ್ಟು ಕುಡಿಯುವುದರಿಂದ ಕೂಡ ತುಂಬಾ ಪ್ರಯೋಜನವಾಗುತ್ತದೆ. ಮಹಿಳೆಯರಲ್ಲಿ ಅತಿಯಾಗಿ ರಕ್ತಸ್ರಾವ ಆಗುತ್ತಿದ್ದರೆ ಆಗ ಕೂಡ ಇದೇ ರೀತಿ ಕಷಾಯ ಮಾಡಿ 3 ತಿಂಗಳುಗಳ ಕಾಲ ಸತತವಾಗಿ ಸೇವಿಸುತ್ತಿದ್ದರೆ ಅತಿಯಾದ ರಕ್ತಸ್ರಾವ ಚೆನ್ನಾಗಿ ಹತೋಟಿಗೆ ಬಂದು ಋತುಚಕ್ರ ನಿಯಮಿತವಾಗಿ ಆಗಲು ಮತ್ತು ಮುಟ್ಟಿನ ಸಮಯದಲ್ಲಿ ಸರಿಯಾಗಿ ರಕ್ತಸ್ರಾವ ಆಗಲು ಸಹಾಯವಾಗುತ್ತದೆ. ಇದರ ಬೇರುಗಳನ್ನು ಕೂಡಿಸಿಟ್ಟುಕೊಂಡು ಇಡೀ ಗಿಡದ ಬದಲು ಕೇವಲ ಬೇರು ಹಾಕಿ ಇದೇ ರೀತಿಯಲ್ಲಿ ಕಷಾಯ ಮಾಡಿ 15 ದಿನ ಸೇವಿಸಿದರೆ ಸಾಮಾನ್ಯ ಗಾತ್ರದ ಮೂತ್ರದ ಕಲ್ಲುಗಳು ಬೀಳಲು ಸಹಾಯವಾಗುತ್ತದೆ. ಬೇಧಿಯಲ್ಲಿ ಕೂಡ ಇದು ಅತ್ಯಂತ ಸಹಕಾರಿ. ಇದರ ರಸ ತೆಗೆದು ಅಥವಾ ಕಷಾಯ ಮಾಡಿ ಅದಕ್ಕೆ ದಾಳಿಂಬೆ ಸಿಪ್ಪೆಯ ಪುಡಿಯನ್ನು ಅರ್ಧ ಚಮಚ ಹಾಕಿ ದಿನದಲ್ಲಿ ಎರಡರಿಂದ ಮೂರು ಬಾರಿ ಸೇವಿಸಿದರೆ ಬೇಧಿ ನಿಲ್ಲುತ್ತದೆ. ಮೂಲವ್ಯಾಧಿಯಲ್ಲಿ ಗಡ್ಡೆಗಳು ಮುದುಡಿಕೊಳ್ಳಲು ಇದು ಸಹಾಯ ಮಾಡುತ್ತದೆ. ವಿಶೇಷವಾಗಿ ರಕ್ತ ಮೂಲವ್ಯಾಧಿಯಲ್ಲಿ ಇದು ತುಂಬಾ ಪ್ರಯೋಜನಕಾರಿ. ಆಗಲೂ ಮೇಲೆ ಹೇಳಿದಂತೆಯೇ ಇದರ ಕಷಾಯ ತಯಾರಿಸಿ ಸೇವಿಸಬಹುದು. ಗಾಯವಾದಾಗ ರಕ್ತಸ್ರಾವವನ್ನು ನಿಲ್ಲಿಸಲು ಇದರ ಎಲೆಗಳ ಪೇಸ್ಟ್ ಮಾಡಿ ಹಚ್ಚಬಹುದು. ಇದರಿಂದ ಗಾಯ ಬೇಗನೆ ಗುಣವಾಗಲು ಕೂಡ ಸಹಾಯವಾಗುತ್ತದೆ. ಗುದ ಅಥವಾ ಗರ್ಭಾಶಯ ಜಾರುವ, ಹೊರಬರುವ ಸಮಸ್ಯೆಯಾಗುತ್ತಿದ್ದರೆ ಇದರ ಕಷಾಯದ ಸೇವನೆ ತಕ್ಕಮಟ್ಟಿಗೆ ಸಹಾಯಮಾಡುತ್ತದೆ. ಇನ್ನು ಆಧುನಿಕ ಸಂಶೋಧನೆಗಳು ಇದಕ್ಕೆ ಸೂಕ್ಷ್ಮಾಣು ನಿರೋಧಕ ಗುಣ, ನರಗಳ ಶಕ್ತಿಯನ್ನು ಹೆಚ್ಚಿಸುವ ಗುಣ ಮತ್ತು ಮಾನಸಿಕ ಶಕ್ತಿಯನ್ನು ಹೆಚ್ಚಿಸುವ ಗುಣಗಳಿವೆ ಎಂಬುದನ್ನು ಕಂಡುಕೊಂಡಿವೆ. ಒಟ್ಟಿನಲ್ಲಿ ಇದು ಕಳೆಯಲ್ಲ; ನಮಸ್ಕಾರಕ್ಕೆ ಯೋಗ್ಯವಾದ ಅದ್ಭುತ ಔಷಧ.
