ನವಪ್ರೀತ್ ಮತ್ತು ಅವನಂತೆಯೇ ನೋಟಿಸ್ ಪಡೆದಿದ್ದ ಇತರರು ಕೆನಡಾದಲ್ಲಿರುವ ಭಾರತದ ದೂತಾವಾಸದ ಅಧಿಕಾರಿಗಳಿಗೆ ವಸ್ತುಸ್ಥಿತಿಯನ್ನು ತಿಳಿಸಿ ಅವರ ಸಹಾಯ ಕೋರಿದರು. ಇದಲ್ಲದೆ ಪಂಜಾಬ್ನಲ್ಲಿರುವ ಎಲ್ಲ ರಾಜಕೀಯ ಪಕ್ಷಗಳ ಮೊರೆ ಹೋದರು. ಭಾರತ ಸರ್ಕಾರದ ಒತ್ತಡದ ಮೇರೆಗೆ ಕೆನಡಾ ಅಧಿಕಾರಿಗಳು ತಾವು ನೀಡಿದ ಗಡೀಪಾರು ಪತ್ರಕ್ಕೆ ತಡೆ ನೀಡಿದರು. ಈ ಪ್ರಕರಣ ಬೆಳಕಿಗೆ ಬಂದ ಕೂಡಲೇ ಪಂಜಾಬ್ನ ಜಲಂಧರ್ ಜಿಲ್ಲಾ ಪೊಲೀಸರು ಮಿಶ್ರಾನ ಮೇಲೆ ಕ್ರಮ ಜರುಗಿಸಲು ಮುಂದಾದಾಗ ಮಿಶ್ರಾನ ವಿರುದ್ಧ ದೂರು ಕೊಡಲು ಮುಂದೆ ಬಂದಿದ್ದು ಆತ ಕೆನಡಾಕ್ಕೆ ಕಳುಹಿಸಿದ್ದ ವಿದ್ಯಾರ್ಥಿಗಳಲ್ಲಿ ಮೂರು ಜನ ಮಾತ್ರ. ಅವರ ದೂರಿನ ಮೇರೆಗೆ ಮಿಶ್ರಾ ಮತ್ತವನ ಮೂವರು ಸಹಾಯಕರಾದ ರಾಹುಲ್, ಭಾರ್ಗವ್, ಗುರ್ನಾಂ ಸಿಂಗ್ ವಿರುದ್ಧ ನಂಬಿಕೆ ದ್ರೋಹ, ಫೋರ್ಜರಿ, ಮೋಸಕ್ಕಾಗಿ ಮಾಡುವ ಫೋರ್ಜರಿ, ನಕಲಿ ದಾಖಲೆಯನ್ನು ನೈಜ ದಾಖಲೆಯೆಂದು ತೋರಿಸುವುದು, ಆಪರಾಧಿಕ ಒಳಸಂಚು ಇವೇ ಅಪರಾಧಗಳಿರುವ ಎಫ್ಐಆರ್ಗಳು ದಾಖಲಾದವು. ಏತನ್ಮಧ್ಯೆ ಮಿಶ್ರಾ ಮತ್ತು ಗುರ್ನಾಂ ಪರಾರಿಯಾದರು. ಆದರೆ ಮಿಶ್ರಾನ ಸಹಾಯಕ ರಾಹುಲ್ ಸೆರೆಯಾದ. ಆತ ಪೊಲೀಸರಿಗೆ ಈ ಪ್ರಕರಣ ಹೇಗೆ ನಡೆಯಿತು ಎನ್ನುವ ಎಲ್ಲ ವಿವರ ನೀಡಿದ.
