ಯಾವುದೇ ಸಮಯದಲ್ಲಿ ಶರೀರದ ಆರೋಗ್ಯವನ್ನು ಕಾಪಾಡಿಕೊಳ್ಳಲು ಮುದ್ರೆಗಳಂತಹ ಸರಳ, ಸುಂದರ, ಸಹಜ ಹಾಗೂ ತಕ್ಷಣದ ಉಪಾಯ ಮತ್ತೊಂದಿಲ್ಲ ಎಂದೇ ಹೇಳಬಹುದು. ಇದೊಂದು ನಿರುಪದ್ರವಿ ಚಿಕಿತ್ಸಾ ಪದ್ಧತಿಯಾಗಿದ್ದು ಅಬಾಲ ವೃದ್ಧರು ಮುದ್ರೆಯಿಂದ ಪ್ರಯೋಜನವನ್ನು ಪಡೆಯಬಹುದು. ನಾನಾ ಪ್ರಕಾರದ ಈ ಮುದ್ರೆಗಳನ್ನು ಗುರುವಿನ ಮಾರ್ಗದರ್ಶನ, ಸಲಹೆ ಪಡೆದು ಅಭ್ಯಾಸ ಮಾಡಬೇಕು. ಮಧುಮೇಹದ ಹತೋಟಿಗೆ ಅನುಸರಿಸಬೇಕಾದ ಕ್ರಮಗಳು ಮುಖ್ಯ. ವ್ಯಕ್ತಿಯು ನಿಯಮಿತವಾದ ವೈದ್ಯಕೀಯ ತಪಾಸಣೆ ಮಾಡಿಸಿಕೊಳ್ಳಬೇಕು. ಅಗತ್ಯವಿರುವ ಔಷಧಿ ಸೇವನೆ, ಉತ್ತಮವಾದ ಆಹಾರ ಪದ್ಧತಿ ತೀರ ಅಗತ್ಯ. ಕೆಲವು ಸರಳ ವ್ಯಾಯಾಮಗಳು, ಕ್ರಿಯೆಗಳು, ಸರಳ ಯೋಗಾಸನಗಳು ಹಾಗೂ ಮುದ್ರೆಗಳು, ಪ್ರಾಣಾಯಾಮ, ಧ್ಯಾನವನ್ನು ಅಳವಡಿಸಿಕೊಂಡರೆ ಮಧುಮೇಹ ರೋಗವನ್ನು ಸಾಕಷ್ಟು ನಿಯಂತ್ರಣದಲ್ಲಿಟ್ಟುಕೊಂಡು ಉತ್ತಮವಾಗಿ ಬಾಳಬಹುದಾಗಿದೆ.
