ಕರ್ನಾಟಕದಲ್ಲಿ ಖರ್ಜೂರ ಬೆಳೆಯಬಹುದಾ..?: ತೆಂಗು, ಈಚಲು ಗಿಡಗಳ ಜಾತಿಗೆ ಸೇರಿರುವ ಬೆಳೆ ಈ ಖರ್ಜೂರ. ಮಲೆನಾಡಿರಲಿ, ಬೆಂಗಾಡಿರಲಿ, ಬಯಲುಸೀಮೆ ಇರಲಿ, ಕರಾವಳಿ ಇರಲಿ ಈ ಪ್ರಾಂತ್ಯಗಳಲ್ಲಿ ಎಲ್ಲಿ ಕಣ್ಣು ಹಾಯಿಸಿದರೂ ತೆಂಗು ಗೋಚರವಾಗುತ್ತದೆ. ಅದೇ ರೀತಿ ಈಚಲು, ತಾಳೆಯಂಥ ಗಿಡಗಳು ಕೂಡ ಕಂಡುಬರುತ್ತವೆ. ಇವು ಬೆಳೆದ ಮೇಲೆ ಖರ್ಜೂರ ಯಾಕೆ ಬೆಳೆಯೋದಿಲ್ಲ ಅನ್ನೋ ಸಣ್ಣ ಕುತೂಹಲ ಕೂಡ ಯಾರಿಗೂ ಹುಟ್ಟಿರದ ಕಾರಣ ಖರ್ಜೂರ ಕರ್ನಾಟಕಕ್ಕೆ ಬರಲು ಇಷ್ಟು ವರ್ಷ ಕಾಯುವ ಪರಿಸ್ಥಿತಿ ನಿರ್ವಣವಾಗಿತ್ತು. ಬೆಳೆಯ ವಿಜ್ಞಾನವನ್ನು ಯಾರೂ ಬೆನ್ನು ಹತ್ತಿರಲಿಲ್ಲ. ವಿದ್ಯಾವಂತ ಕೃಷಿಕರೊಬ್ಬರ ಪ್ರಯತ್ನದ ಫಲವಾಗಿ ಖರ್ಜೂರಕ್ಕೆ ಯಾವ ವಾತಾವರಣ, ಮಣ್ಣು, ಉಷ್ಣಾಂಶ ಅಗತ್ಯ ಅನ್ನೋದು ಕಂಡುಹಿಡಿಯುವಂತಾಗಿದೆ. ಖರ್ಜೂರಕ್ಕೆ ಮರಳುಮಿಶ್ರಿತ ಭೂಮಿಯೇ ಬೇಕು ಅಂತೇನೂ ಇಲ್ಲ ಅನ್ನೋದು ಗೊತ್ತಾಗಿದೆ. ಅಷ್ಟೇ ಅಲ್ಲ, ಮರುಭೂಮಿಯಲ್ಲಿ ಎಲ್ಲೆಂದರಲ್ಲಿ ಬೆಳೆಯೋದಿಲ್ಲ ಅನ್ನೋ ಸತ್ಯ ಕೂಡ ಅರಿವಿಗೆ ಬಂದಿದೆ. ಎಲ್ಲಿ ನೀರಿನ ಸೆಲೆ ಇರುತ್ತದೆಯೋ ಅಲ್ಲಿ ಮಾತ್ರ ಈ ಬೆಳೆ ಬೆಳೆಯಲು ಸಾಧ್ಯ ಅನ್ನೋದನ್ನ ತಿಳಿದುಕೊಳ್ಳುವಂತಾಗಿದೆ. ಅದೇ ರೀತಿ ಗುಣಮಟ್ಟದ ಮಣ್ಣಿನಲ್ಲಿ ಈ ಬೆಳೆ ಬೆಳೆಯಬಹುದು ಅನ್ನೋದು ಗೊತ್ತಾಗಿದೆ. ಅದರ ಫಲವೇ ಇಂದು ಕರ್ನಾಟಕಕ್ಕೆ ಖರ್ಜೂರ ಬರುವಂತಾಗಿದೆ. ಆದರೆ ಎಲ್ಲಾ ಬಗೆಯ ಖರ್ಜೂರ ಇಲ್ಲಿ ಬೆಳೆಯುತ್ತೆ ಅಂತ ಹೇಳ ಲಾಗದು. ಖರ್ಜೂರದ ಬರ್ಹಿ ಅನ್ನೋ ತಳಿ ಕರ್ನಾಟಕ, ಆಂಧ್ರ, ತಮಿಳುನಾಡಿನಲ್ಲಿ ಸಲೀಸಾಗಿ ಬೆಳೆಯುತ್ತದೆ.
