ಪುಟ್ಟ ಮಕ್ಕಳಿಗೆ ಹೋಮ್ ವರ್ಕ್ ಮಾಡಿಸುವ ಜವಾಬ್ದಾರಿ ಒಂದೆಡೆಯಾದರೆ,ವಿವಿಧ ರಂಗಗಳಲ್ಲಿ ಪುಟಾಣಿಗಳನ್ನು ತರಬೇತುಗೊಳಿಸಿ,ಮುಂಚೂಣಿಗೆ ತರುವ ಬಯಕೆ ಇನ್ನೊಂದೆಡೆ. ಬಿಡುವಿಲ್ಲದ ಕೆಲಸದ ನಡುವೆಯೂ ಬಿಡುವು ಮಾಡಿಕೊಂಡು ಮಕ್ಕಳಿಗೆ ನೃತ್ಯ, ಸಂಗೀತ, ನಾಟಕ, ಚಿತ್ರಕಲೆ ಇತ್ಯಾದಿ ಸಾಂಸ್ಕೃತಿಕ ರಂಗದ ತರಗತಿಗಳಿಗೆ ಕಳುಹಿಸುವುದು, ಕ್ರೀಡಾ ತರಬೇತಿಗಳಾದ ಚೆಸ್ ,ಈಜು ,ಬಾಲ್ ಗೇಮ್ಸ್ ಇತ್ಯಾದಿಗಳಿಗೆ ಕಳುಹಿಸುವುದನ್ನು ಕೂಡ ನಿಭಾಯಿಸುವ ಗುರುತರ ಜವಾಬ್ದಾರಿಯನ್ನು ತಾಯಂದಿರು ನಿರ್ವಹಿಸುತ್ತಾರೆ. ಈ ನಿಟ್ಟಿನಲ್ಲಿ ಸಂಜೆಯ ಅವಧಿ, ಭಾನುವಾರವೂ ಕೂಡ ಬಿಡುವಿಲ್ಲದ ವೇಳಾಪಟ್ಟಿ ಹಾಕಿಕೊಂಡು ಸದಾ ಒತ್ತಡಮುಖಿಯಾಗಿ ಇರುವ ಪರಿಸ್ಥಿತಿ ಆಧುನಿಕ ನಾರಿಯರಿಗೆ ಇದ್ದೇ ಇರುತ್ತದೆ. ಇಂತಹ ಒತ್ತಡಗಳಿಗೆ ತಾವೂ ಒಳಗಾಗುವುದರ ಜತೆಗೆ, ಮಕ್ಕಳಿಗೂ ಕೆಲವೊಂದನ್ನು ಒತ್ತಾಯಪೂರ್ವಕವಾಗಿ ಹೇರಿಕೆ ಮಾಡುವಂತಾಗಬಾರದು.ಮಕ್ಕಳ ಆಸಕ್ತಿ ಗಮನಿಸದೆ ಎಲ್ಲಾ ತರಗತಿಗಳಿಗೂ ಕಳುಹಿಸುವುದಕ್ಕಿಂತ, ಅವರ ಆಸಕ್ತಿಯ ಕ್ಷೇತ್ರವನ್ನು ಗುರುತಿಸಿ, ಅದರಲ್ಲಿ ಪ್ರಾವೀಣ್ಯ ಪಡೆಯುವಂತೆ ಅನುವು ಮಾಡಿಕೊಡುವುದು ಅತ್ಯಗತ್ಯ.
