ನವದೆಹಲಿ: ಶುಕ್ರವಾರ (ಏಪ್ರಿಲ್ 09) ನಡೆದ ಐಪಿಎಲ್ 14ನೇ ಆವೃತ್ತಿಯ ಉದ್ಘಾಟನಾ ಪಂದ್ಯದಲ್ಲಿ ಆರ್ಸಿಬಿ ಮತ್ತು ಮುಂಬೈ ಇಂಡಿಯನ್ಸ್ ಸೆಣಸಾಟದ ನಡುವೆಯೇ ಆರ್ಸಿಬಿ ಮತ್ತು ಕಿಂಗ್ಸ್ ಇಲೆವೆನ್ ಪಂಜಾಬ್ ಟ್ವಿಟರ್ನಲ್ಲಿ ಒಬ್ಬರಿಗೊಬ್ಬರು ಕಾಲೆಳೆದುಕೊಂಡಿದ್ದಾರೆ.
ನಿನ್ನೆ ಮುಂಬೈ ನೀಡಿದ ಗುರಿ ಬೆನ್ನತ್ತುವ ವೇಳೆ ಗ್ಲೇನ್ ಮ್ಯಾಕ್ಸ್ವೆಲ್ ಆರ್ಸಿಬಿ ಪರ ತಮ್ಮ ಮೊದಲ ಸಿಕ್ಸರ್ ಸಿಡಿಸಿದರು. ಇದಾದ ಬೆನ್ನಲ್ಲೇ ಟ್ವೀಟ್ ಮೂಲಕ ಪಂಜಾಬ್ ಕಿಂಗ್ಸ್ ಕಾಲೆಳೆದ ಆರ್ಸಿಬಿ ಮ್ಯಾಕ್ಸ್ವೆಲ್ ಅವರನ್ನು ನಿಮ್ಮ ತಂಡದಿಂದ ಕೈಬಿಟ್ಟಿದ್ದಕ್ಕೆ ಧನ್ಯವಾದಗಳು. ಸಾಮಾಜಿಕ ಅಂತರವಿಲ್ಲದಿದ್ದರೆ ನಿಮ್ಮನ್ನು ಒಂದು ಬಾರಿ ಅಪ್ಪಿಕೊಳ್ಳುತ್ತಿದ್ದೆವು ಎಂದಿದೆ.
ಆರ್ಸಿಬಿ ಟ್ವೀಟ್ ಅಷ್ಟೇ ನಯವಾಗಿ ತಿರುಗೇಟು ನೀಡಿರುವ ಪಂಜಾಬ್, ಕ್ರಿಸ್ ಗೇಲ್, ಕೆ.ಎಲ್. ರಾಹುಲ್, ಮಯಾಂಕ್ ಅಗರ್ವಾಲ್ ಮತ್ತು ಸರ್ಫರಾಜ್ ಖಾನ್ ಅವರನ್ನು ಬಿಟ್ಟುಕೊಟ್ಟಿದ್ದಕ್ಕೆ ನಿಮಗೂ ಧನ್ಯವಾದಗಳು ಎಂದಿದೆ.
ಇಷ್ಟಕ್ಕೆ ಸುಮ್ಮನಾಗದ ಆರ್ಸಿಬಿ ಪಂಜಾಬ್ ಜರ್ಸಿ, ಹೆಲ್ಮೆಟ್, ಪ್ಯಾಡ್ಸ್ ಮತ್ತು ಲೋಗೋ ಬೆಂಗಳೂರು ತಂಡದಿಂದ ಸ್ಪೂರ್ತಿಗೊಂಡಿದೆ ಎಂದಿದೆ. ಇದಕ್ಕೆ ನಯವಾಗಿಯೇ ಉತ್ತರಿಸಿರುವ ಪಂಜಾಬ್, ಬಣ್ಣಗಳನ್ನು ಕಂಡುಹಿಡಿದಿದ್ದಕ್ಕಾಗಿ ಧನ್ಯವಾದಗಳು ಎಂದಿದೆ.
ಕಳೆದ ಆವೃತ್ತಿಯ ಐಪಿಎಲ್ನಲ್ಲಿ ಪಂಜಾಬ್ ಪರ ಆಡಿದ ಮ್ಯಾಕ್ಸ್ವೆಲ್ ತಂಡದ ಪರ ಒಂದೇ ಒಂದು ಸಿಕ್ಸರ್ ಸಿಡಿಸಿರಲಿಲ್ಲ. ಆದರೆ, ನಿನ್ನೆ ನಡೆದ ಮೊದಲ ಪಂದ್ಯದಲ್ಲೇ ಕೇವಲ 28 ಬಾಲ್ಗೆ 39 ರನ್ ಕಾಣಿಕೆ ನೀಡಿದರು. ಅಲ್ಲದೆ, ಎರಡು ಸಿಕ್ಸರ್ ಸಹ ಸಿಡಿಸಿದರು. ಅದರಲ್ಲೂ ಒಂದು ಸಿಕ್ಸರ್ನಲ್ಲಿ ಚೆಂಡನ್ನು ಮೈದಾನದಿಂದ ಆಚೆಗೆ ಕಳುಹಿಸಿದರು.
ನಿನ್ನೆ ನಡೆದ ಪಂದ್ಯದಲ್ಲಿ ಟಾಸ್ ಜಯಿಸಿದ ನಾಯಕ ವಿರಾಟ್ ಕೊಹ್ಲಿ ಎದುರಾಳಿ ತಂಡವನ್ನು ಬ್ಯಾಟಿಂಗ್ ಆಹ್ವಾನಿಸಿದರು. ಹರ್ಷಲ್ ಪಟೇಲ್ ದಾಳಿಗೆ ನಲುಗಿದ ಮುಂಬೈ 9 ವಿಕೆಟ್ಗೆ 159 ರನ್ ಪೇರಿಸಿತು. ಪ್ರತಿಯಾಗಿ ಆರ್ಸಿಬಿ, ಎಬಿಡಿ ಹಾಗೂ ಗ್ಲೆನ್ ಮ್ಯಾಕ್ಸ್ವೆಲ್ (39ರನ್, 28 ಎಸೆತ, 3 ಬೌಂಡರಿ, 2 ಸಿಕ್ಸರ್) ಭರ್ಜರಿ ನಿರ್ವಹಣೆಯಿಂದ 20 ಓವರ್ಗಳಲ್ಲಿ 8 ವಿಕೆಟ್ಗೆ 160 ರನ್ ಕಲೆಹಾಕಿತು. (ಏಜೆನ್ಸೀಸ್)