ಹಾವೇರಿ: ನವೆಂಬರ್ 1 ರಂದು ರಾಜ್ಯಾದ್ಯಂತ ಕನ್ನಡ ರಾಜ್ಯೋತ್ಸವವನ್ನು ವಿಶೇಷವಾಗಿ ಆಚರಿಸುತ್ತಾರೆ. ಈ ದಿನದಲ್ಲಿ ಎಲ್ಲರೂ ಹೆಚ್ಚಾಗಿ ಕನ್ನಡದ ಬಗೆಗೆ ಮಾತನಾಡುತ್ತಾ, ಕನ್ನಡದ ಇತಿಹಾಸವನ್ನು ನೆನಪಿಸಿಕೊಳ್ಳುತ್ತಾ, ವಿವಿಧ ಕಾರ್ಯಕ್ರಮಗಳನ್ನು ಮಾಡುವುದು ವಾಡಿಕೆ. ಆದರೆ ಹಾವೇರಿಯ ಬಸ್ ಚಾಲಕ ಕನ್ನಡಿಗ ಶಶಿ ಬೋಸ್ಲೆ, ನೆವೆಂಬರ್ 1 ಕನ್ನಡ ಅಲ್ಲ. ಬದಲಾಗಿ ನಂಬರ್ 1 ಕನ್ನಡಿಗ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
ಕೆಎಸ್ಆರ್ಟಿಸಿ ಬಸ್ನಲ್ಲಿ ಡ್ರೈವರ್ ಆಗಿ ಕೆಲಸ ಮಾಡುವ ಶಶಿ ಬೋಸ್ಲೆ ತಮ್ಮ ಸ್ವಂತ ಖರ್ಚಿನಲ್ಲಿಯೇ ಸರ್ಕಾರಿ ವಾಹನವನ್ನು ಸಂಪೂರ್ಣ ಕನ್ನಡಮಯವನ್ನಾಗಿ ಮಾಡಿದ್ದಾರೆ. ಬಸ್ನ ಒಳಗೆ ಕರ್ನಾಟಕ ಮತ್ತು ಕನ್ನಡ ಭಾಷೆಯ ಕುರಿತಾದ ಸಂಪೂರ್ಣ ಮಾಹಿತಿಗಳು, ನಕ್ಷೆಗಳು, ಚಿತ್ರಗಳಿವೆ. ಬಸ್ನ ಹೊರಭಾಗದ ಎರಡೂ ಕಡೆಗಳಲ್ಲಿ ರಾಷ್ಟ್ರ ಪ್ರೇಮಿಗಳು, ಜ್ಞಾನಪೀಠ ಪ್ರಶಸ್ತಿ ಪುರಸ್ಕೃತರು, ಸ್ವಾತಂತ್ರ್ಯ ಹೋರಾಟಗಾರು, ಸಂತ ಶರಣರು, ವಚನಕಾರರು, ಕನ್ನಡದ ಮೇರು ನಟರು ಮುಂತಾದವರ ಭಾವಚಿತ್ರಗಳಿವೆ. ದೇಶ, ಭಾಷೆ, ಕರ್ನಾಟಕದ ಸಂಪತ್ತಿನ ಕುರಿತು ಮಾಹಿತಿ ನೀಡುವ ಬಸ್ ಇದಾಗಿದೆ.
ಈ ಮಾಹಿತಿಗಳು ಬಸ್ನಲ್ಲಿ ಬರುವ ಪ್ರಯಾಣಿಕರಿಗೆ ಸಾಮಾನ್ಯ ಜ್ಞಾನವನ್ನು ಹೆಚ್ಚಿಸುವಲ್ಲಿ ಸಹಕಾರಿಯಾಗಿದೆ. ಸದ್ಯ ಕನ್ನಡ ರಾಜ್ಯೋತ್ಸವದ ಹಿನ್ನೆಲೆ ಈ ಬಸ್ಸಿನ ಕುರಿತಾದ ವಿಡಿಯೋಗಳು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿವೆ.