ನವದೆಹಲಿ: ಜುಹು ಪ್ರದೇಶದಲ್ಲಿ ಅಕ್ರಮವಾಗಿ ಕಟ್ಟಡ ನಿರ್ಮಾಣ ಆರೋಪದ ಮೇರೆಗೆ ಬೃಹನ್ ಮುಂಬೈ ಮಹಾನಗರ ಪಾಲಿಕೆ (ಬಿಎಂಎಂಸಿ) ನೀಡಿರುವ ನೋಟಿಸ್ ವಿರುದ್ಧದ ಅರ್ಜಿ ವಜಾ ಮಾಡಿರುವ ಹೈಕೋರ್ಟ್ ಆದೇಶವನ್ನು ಪ್ರಶ್ನಿಸಿ ನಟ ಸೂನ್ ಸೂದ್ ಸುಪ್ರೀಂಕೋರ್ಟ್ ಮೆಟ್ಟಿಲೇರಿದ್ದಾರೆ.
ಸೋನು ಸೂದ್ ಬಿಎಂಸಿಯ ಅನುಮತಿ ಇಲ್ಲದೆ, ಜುಹುನಲ್ಲಿ 6 ಮಹಡಿಯ ವಸತಿ ಕಟ್ಟಡವೊಂದನ್ನ ಹೋಟೆಲ್ ಆಗಿ ಪರಿವರ್ತಿಸಿದ್ದಾರೆ ಎಂದು ಪಾಲಿಕೆ ಆರೋಪ ಮಾಡಿದೆ. ಈ ಸಂಬಂಧ 2020ರ ಅಕ್ಟೋಬರ್ನಲ್ಲಿ ಸೋನು ಸೂದ್ಗೆ ಬಿಎಂಸಿ ನೋಟಿಸ್ ನೀಡಿತ್ತು. ಇದನ್ನು ರದ್ದುಗೊಳಿಸಬೇಕು ಎಂದು ಕೋರಿ ಅವರು ಬಾಂಬೆ ಹೈಕೋರ್ಟ್ಗೆ ಅರ್ಜಿ ಸಲ್ಲಿಸಿದ್ದರು. ಆದರೆ ಬಾಂಬೆ ಹೈಕೋರ್ಟ್ ಅವರ ಅರ್ಜಿಯನ್ನು ವಜಾಗೊಳಿಸಿತ್ತು.
ಈ ನೋಟಿಸ್ಗೆ ಸ್ಪಂದಿಸಲು 10 ದಿನಗಳ ಕಾಲಾವಕಾಶ ಬೇಕು. ಅಲ್ಲಿವರೆಗೆ ಕಟ್ಟಡ ತೆರವುಗೊಳಿಸುವ ಕ್ರಮಕ್ಕೆ ಮುಂದಾಗದಂತೆ ಬಿಎಂಸಿಗೆ ನಿರ್ದೇಶಿಸಬೇಕೆಂದು ಕೋರಿ ಸೋನು ಸೂದ್ ಹೈಕೋರ್ಟ್ ಅನ್ನು ಕೋರಿದ್ದರು. ಆದರೆ ಈ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿದ್ದ ಕೋರ್ಟ್, ಇಷ್ಟು ದಿನ ನಿಮಗೆ ಸಾಕಷ್ಟು ಕಾಲಾವಕಾಶವಿತ್ತು. ಆದರೆ ನೀವು ತಡ ಮಾಡಿದ್ದೀರಿ. ಚೆಂಡು ಈಗ ಪಾಲಿಕೆ ಅಂಗಳದಲ್ಲಿದೆ. ಅಗತ್ಯವಿದ್ದರೆ ನೀವು ಪಾಲಿಕೆಯ ಮೊರೆ ಹೋಗಬಹುದು ಎಂದು ಹೇಳಿತ್ತು.
ಈ ಆದೇಶವನ್ನು ಈಗ ಅವರು ಪ್ರಶ್ನಿಸಿ ಸುಪ್ರೀಂಕೋರ್ಟ್ಗೆ ಮೇಲ್ಮನವಿ ಸಲ್ಲಿಸಿದ್ದಾರೆ. ವಸತಿ ಪ್ರದೇಶವನ್ನು ವಾಣಿಜ್ಯಾತ್ಮಕ ಉದ್ದೇಶಕಕ್ಕೆ ಪರಿವರ್ತಿಸುವ ಅರ್ಜಿಯನ್ನು ಮಹಾರಾಷ್ಟ್ರ ಕರಾವಳಿ ವಲಯ ನಿರ್ವಹಣಾ ಪ್ರಾಧಿಕಾರದ ಅನುಮತಿಗೆ ಒಳಪಟ್ಟು ನಗರಸಭೆ ಆಯುಕ್ತರು ಅನುಮೋದಿಸಿದ್ದಾರೆ ಎಂದು ಸೂದ್ ಅರ್ಜಿಯಲ್ಲಿ ತಿಳಿಸಿದ್ದಾರೆ.
ಮಹಾರಾಷ್ಟ್ರ ಪ್ರಾದೇಶಿಕ ಮತ್ತು ಪಟ್ಟಣ ಯೋಜನೆ ಕಾಯ್ದೆ 1966 ರ ಸೆಕ್ಷನ್ 43 (1) ರ ನಿಬಂಧನೆಗಳನ್ನು ಪರಿಗಣಿಸದೆ ಜನವರಿ 13 ರಂದು ಹೈಕೋರ್ಟ್ ಆದೇಶ ನೀಡಿದೆ. ವಸತಿ ಪ್ರದೇಶವನ್ನು, ವಾಣಿಜ್ಯ ಉದ್ದೇಶಕ್ಕೆ ಪರಿವರ್ತಿಸುವ ಅರ್ಜಿಯನ್ನು 2018ರಲ್ಲಿ ಸಂಬಂಧಿಸಿದ ಇಲಾಖೆಗೆ ಸಲ್ಲಿಸಲಾಗಿದೆ ಎಂದು ಮೇಲ್ಮನವಿಯಲ್ಲಿ ಅವರು ತಿಳಿಸಿದ್ದಾರೆ.