ಕಾಬುಲ್: ತಾಲಿಬಾನ್ಗೆ ಪಾಕಿಸ್ತಾನ ಸಹಾಯ ಮಾಡುತ್ತಿರುವುದು ಜಗಜ್ಜಾಹೀರಾಗಿದ್ದು, ಪಾಕ್ ವಿರುದ್ಧ ಅಫ್ಘಾನಿಸ್ತಾನದ ಜನರು ತಿರುಗಿಬಿದ್ದಿದ್ದು, ಇಂದು ಕಾಬುಲ್ನಲ್ಲಿ ಪಾಕ್ ವಿರೋಧಿ ಘೋಷಣೆ ಕೂಗಿ ಆಫ್ಘಾನ್ನರು ಪ್ರತಿಭಟಿಸುವಾಗ ತಾಲಿಬಾನಿಗಳು ಗಾಳಿಯಲ್ಲಿ ಗುಂಡು ಹಾರಿಸಿ ಪ್ರತಿಭಟನೆ ಹತ್ತಿಕ್ಕುವ ಕೆಲಸ ಮಾಡಿದ್ದಾರೆ.
ಪಾಕ್ ವಿರುದ್ಧ ಪ್ರತಿಭಟನಾ ಮೆರವಣಿಗೆಯಲ್ಲಿ ಪುರಷರಿಗಿಂತ ಬಹುತೇಕ ಮಹಿಳೆಯರೇ ಪಾಲ್ಗೊಂಡಿದ್ದರು. ಕಾಬುಲ್ನ ಅಧ್ಯಕ್ಷೀಯ ಅರಮನೆ ಮುಂದೆ ಅಸಂಖ್ಯಾತ ಪ್ರತಿಭಟನಾಕಾರರು ಒಟ್ಟುಗೂಡಿ, ಕಳೆದ ಒಂದು ವಾರದಿಂದ ಪಾಕಿಸ್ತಾನದ ಐಎಸ್ಐ ನಿರ್ದೇಶಕ ತಂಗಿರುವ ಕಾಬುಲ್ನ ಸೆರೆನಾ ಹೋಟೆಲ್ ಕಡೆಗೆ ಪ್ರತಿಭಟನಾಕಾರರು ಪಾಕ್ ವಿರುದ್ಧ ಘೋಷಣೆ ಕೂಗಿ ಮೆರವಣಿಗೆ ಸಾಗುವಾಗ ತಾಲಿಬಾನಿಗಳು ಗುಂಡು ಹಾರಿಸಿದ್ದಾರೆ.
ಇದಕ್ಕೆ ಸಂಬಂಧಪಟ್ಟ ವಿಡಿಯೋಗಳು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದ್ದು, ಅದರಲ್ಲಿ ಆಫ್ಘಾನ್ನ ನೂರಾರರು ಮಹಿಳೆಯರು ಮತ್ತು ಪುರುಷರು ಭಿತ್ತಿಫಲವನ್ನು ಹಿಡಿದು, ಪಾಕ್ ವಿರೋಧಿ ಘೋಷಣೆಗಳನ್ನು ಕೂಗುತ್ತಾ ಕಾಬುಲ್ ಬೀದಿಯಲ್ಲಿ ಮೆರವಣಿಗೆ ಹೊರಟಿರುವುದನ್ನು ಕಾಣಬಹುದಾಗಿದೆ. ಸ್ವಾತಂತ್ರ್ಯ ಬೇಕೆಂದು ಕರೆ ನೀಡಿದರು. ಡೆತ್ ಪಾಕಿಸ್ತಾನ, ಡೆತ್ ಐಎಸ್ಐ ಎಂದು ಘೋಷಣೆ ಕೂಗಿದ ಪ್ರತಿಭಟನಾಕಾರರು ನಮಗೆ ಸ್ವತಂತ್ರ ಬೇಕೆಂದು ಧ್ವನಿಯೇರಿಸಿದರು.
ಪಾಕಿಸ್ತಾನಕ್ಕಾಗಲಿ ಅಥವಾ ತಾಲಿಬಾನ್ಗಾಗಲಿ ಪಂಜಶೀರ್ ಮೇಲೆ ದಾಳಿ ಮಾಡುವ ಹಕ್ಕು ಯಾರಿಗೂ ಇಲ್ಲ ಎಂದು ಆಫ್ಘಾನ್ ಮಹಿಳೆಯೊಬ್ಬರು ಹೇಳಿದ್ದಾರೆ. ಆದರೆ, ಪ್ರತಿಭಟನೆಯನ್ನು ಹತ್ತಿಕ್ಕಲು ತಮ್ಮ ನರಿಬುದ್ಧಿ ಉಪಯೋಗಿಸಿದ ತಾಲಿಬಾನ್ ಗಾಳಿಯಲ್ಲಿ ಗುಂಡು ಹಾರಿಸಿ ಪ್ರತಿಭಟನಾಕಾರರನ್ನು ಚದುರಿಸಿದರು. (ಏಜೆನ್ಸೀಸ್)