ಕ್ಯಾನ್ಬೆರಾ: ಮೊದಲೆಲ್ಲ ಮಕ್ಕಳಿರಲವ್ವ ಮನೆ ತುಂಬಾ, ಆಮೇಲೆ ನಾವಿಬ್ಬರು ನಮಗಿಬ್ಬರು, ಈಗ ಮನೆಗೊಂದು ಮಗು ಅನ್ನುವಂತಾಗಿದೆ ಜೀವನ. ಆದರೆ ಇಲ್ಲೊಬ್ಬ ವ್ಯಕ್ತಿಗೆ ಈ ಯಾವುದೇ ವಾಕ್ಯವೂ ಸರಿಹೊಂದುವುದೇ ಇಲ್ಲ. ಏಕೆಂದರೆ ಈತ ಒಂದೇ ವರ್ಷದಲ್ಲಿ ಬರೋಬ್ಬರಿ 23 ಮಕ್ಕಳ ತಂದೆಯಾಗಿದ್ದಾನೆ.
ಆಸ್ಟ್ರೇಲಿಯಾ ಮೂಲದ 40 ವರ್ಷದ ಅಲ್ಲೆನ್ 23 ಮಕ್ಕಳ ತಂದೆಯಾಗಿರುವ ಪುಣ್ಯಾತ್ಮ. ಅಲ್ಲೆನ್ಗೆ ಮದುವೆಯಾಗಿ ಎರಡು ಮಕ್ಕಳಿದ್ದಾರೆ. ವಿವಾಹಿತ ಅಲ್ಲೆನ್ ಮೊದಲು ಸ್ಪರ್ಮ್ಸ್(ವೀರ್ಯ) ಮಾರಾಟ ಮಾಡುವ ಅಭ್ಯಾಸ ಬೆಳೆಸಿಕೊಂಡಿದ್ದನಂತೆ. ಆಮೇಲೆ ಅದೇ ಫುಲ್ ಟೈಮ್ ವರ್ಕ್ ಆಗಿಬಿಟ್ಟಿದೆ. ಕಳೆದ ಒಂದು ವರ್ಷದಲ್ಲಿ ಬರೋಬ್ಬರಿ 23 ಹೆಣ್ಣು ಮಕ್ಕಳಿಗೆ ಸ್ಪರ್ಮ್ಸ್ ಮಾರಾಟ ಮಾಡಿದ್ದಾನೆ. ನಾನೇನು ಮಾಡಲಿ, ಹೆಣ್ಣು ಮಕ್ಕಳಿಗೆ ನನ್ನ ಸ್ಪರ್ಮ್ಸ್ ಅಂದರೆ ಇಷ್ಟವಂತೆ. ಅದಕ್ಕೇ ನನ್ನ ಮೇಲೆ ಮುಗಿಬೀಳುತ್ತಾರೆ ಎನ್ನುತ್ತಾನೆ ಈ ಭೂಪ. ಅಂದ ಹಾಗೇ ಇಂದಿಗೂ ಪ್ರತಿ ದಿನ ಕನಿಷ್ಟ ಮೂರು ಹೆಣ್ಣು ಮಕ್ಕಳು ಈತನಲ್ಲಿ ಸ್ಪರ್ಮ್ಸ್ ಕೇಳುತ್ತಾರಂತೆ.
ಈ ರೀತಿಯ ಸ್ಪರ್ಮ್ಸ್ ಮಾರಾಟ ಕಾನೂನುಬಾಹಿರ. ಸರ್ಕಾರಿ ಪರವಾನಗಿ ಪಡೆದು 10 ಮಹಿಳೆಯರಿಗೆ ಮಾತ್ರವೇ ಸ್ಪರ್ಮ್ಸ್ ಮಾರಾಟ ಅಥವಾ ದಾನ ಮಾಡುವ ಕಾನೂನನ್ನು ಆಸ್ಟ್ರೇಲಿಯಾ ಹೊಂದಿದೆ. ಆದರೆ ಈತ ಒಂದೇ ವರ್ಷದಲ್ಲಿ 23 ಮಕ್ಕಳ ಹುಟ್ಟಿಗೆ ಕಾರಣವಾಗಿದ್ದಾನೆ. ಇದೀಗ ಈತನನ್ನು ಬಂಧಿಸಲು ಆಸ್ಟ್ರೇಲಿಯಾ ಅಧಿಕಾರಿಗಳು ಮುಂದಾಗಿದ್ದಾರೆ. (ಏಜೆನ್ಸೀಸ್)