ಬೆಂಗಳೂರು: ಕನ್ನಡದ ಜನಪ್ರಿಯ ರಿಯಾಲಿಟಿ ಶೋ ಬಿಗ್ಬಾಸ್ 11ನೇ (Bigg Boss) ಆವೃತ್ತಿ ಶುರುವಾಗಿ ಒಂದು ವಾರಗಳು ಕಳೆದಿದ್ದು, ಫಿನಾಲೆ ಸಮಯದಲ್ಲಿ ಸ್ಪರ್ಧಿಗಳ (Contestants) ಉಂಟಾಗಬೇಕಿದ್ದ ಜಗಳ ಆರಂಭದಲ್ಲೇ ಶುರುವಾಗಿರುವುದು ಪ್ರೇಕ್ಷಕರ ಗಮನ ಸೆಳೆಯುತ್ತಿದೆ. ಇನ್ನೂ ಬಿಗ್ಬಾಸ್ 11ನೇ ಆವೃತ್ತಿಯ ಮೊದಲ ಪಂಚಾಯ್ತಿ ನಡೆಸಿಕೊಟ್ಟ ಕಿಚ್ಚ ಸುದೀಪ್ (Kichcha Sudeep) ಸ್ಫರ್ಧಿಗಳಿಗೆ ಫುಲ್ ಕ್ಲಾಸ್ ತೆಗೆದುಕೊಂಡಿದ್ದಾರೆ. ವಿಶೇಷವಾಗಿ ಜಗದೀಶ್ (Jagadish) ಅವರಿಗೆ ಮಾತಿನ ಮೂಲಕವೇ ಚಾಟಿ ಬೀಸಿದ ಕಿಚ್ಚ ಮತ್ತೊಮ್ಮೆ ತಾವೇಕೆ ಬೆಸ್ಟ್ ನಿರೂಪಕ ಎಂದು ತೋರಿಸಿಕೊಟ್ಟಿದ್ಧಾರೆ.
ಈ ಹಿಂದೆ ಸಾಮಾಜಿಕ ಜಾಲತಾಣಗಳಲ್ಲಿ ಲೈವ್ ವಿಡಿಯೋ ಮಾಡಿ ರಾಜಕಾರಣಿ, ಪೊಲೀಸರು ಹಾಗೂ ಸೆಲೆಬ್ರಿಟಿಗಳಿಗೆ ಏಕವಚನದಲ್ಲೇ ಮಾತನಾಡಿ ನಿಂದಿಸುವ ಮೂಲಕವೇ ಖ್ಯಾತಿ ಪಡೆದಿದ್ದ ಜಗದೀಶ್ ಈ ಬಾರಿ ಬಿಗ್ಬಾಸ್ ಮನೆಗೆ ಕಂಟೆಸ್ಟೆಂಟ್ ಆಗಿ ಎಂಟ್ರಿ ಕೊಟ್ಟಿದ್ದಾರೆ ಆರಂಭದಲ್ಲಿ ಸ್ವಲ್ಪ ಸೈಲೆಂಟಾಗಿ ಇದ್ದ ಜಗದೀಶ್ ಆ ಬಳಿಕ ಬಿಗ್ಬಾಸ್ಗೆ ಬೆದರಿಕೆ ಹಾಕಿ ಸ್ಫರ್ಧಿಗಳಿಗೆ ಏಕವಚನದಲ್ಲೇ ನಿಂದಿಸುವ ಮೂಲಕ ವಿವಾದಾವನ್ನೇ ಹುಟ್ಟು ಹಾಕಿದ್ದರು. ಇದೀಗ ವಾರಾಂತ್ಯದಲ್ಲಿ ನಿರೂಪಕ ಕಿಚ್ಚ ಸುದೀಪ್ ಅವರು ಜಗದೀಶ್ರನ್ನು ಹ್ಯಾಂಡಲ್ ಮಾಡಿದ ರೀತಿ ಪ್ರೇಕ್ಷಕರ ಮೆಚ್ಚುಗೆಗೆ ಪಾತ್ರವಾಗಿದ್ದು, ನಾನು ತಪ್ಪು ಮಾಡಿದ್ದೀನಿ, ಕ್ಷಮಿಸಿ ಎಂದು ಜಗದೀಶ್ ಅವರಿಂದಲೇ ಹೇಳಿಸಿದ್ದಾರೆ.
ಇದನ್ನೂ ಓದಿ: T20 World Cup| ನ್ಯೂಜಿಲೆಂಡ್ ಎದುರು ಹೀನಾಯ ಸೋಲು; Team India ನಾಯಕಿ ಹರ್ಮಾನ್ಪ್ರೀತ್ ಹೇಳಿದ್ದಿಷ್ಟು
ಮೊದಲಿಗೆ ಜಗದೀಶ್ ಬಗ್ಗೆ ಇರುವ ದೂರುಗಳನ್ನು ಕೇಳಿದ ಸುದೀಪ್, ಎಲ್ಲರೂ ತಮಗೆ ಇರುವ ದೂರುಗಳನ್ನು ಹೇಳಿದರು. ಬಳಿಕ ಜಗದೀಶ್ಗೆ ಆ ಬಗ್ಗೆ ಸ್ಪಷ್ಟನೆ ನೀಡುವಂತೆ ಹೇಳಿದರು. ಜಗದೀಶ್ ನೀಡಿದ ಸ್ಪಷ್ಟನೆಯನ್ನು ಸಂಪೂರ್ಣವಾಗಿ ತಿರಸ್ಕರಿಸಿದ ಸುದೀಪ್ ಜಗದೀಶ್ ಅವರು ಮಾಡಿದ ತಪ್ಪುಗಳನ್ನು ವಿವರವಾಗಿ ಹೇಳುತ್ತ ಬಂದರು. ಇದಲ್ಲದೆ ಬಿಗ್ಬಾಸ್ಗೆ ಬೆದರಿಕೆ ಹಾಕಿದ ವಿಷಯದ ಬಗ್ಗೆ ಮಾತನಾಡಿದ ಸುದೀಪ್, ನೀವು ಬೆದರಿಕೆ ಹಾಕಿದರೆ ಅದು ವಿಶೇಷ ಅನ್ನಿಸಲಿಲ್ಲ, ಬಿಗ್ಬಾಸ್ ಮನೆಯಲ್ಲಿ ಸಾಕಷ್ಟು ತಮಾಷೆ ನಡೆಯುತ್ತಿರುತ್ತದೆ. ನೀವು ಬೆದರಿಕೆ ಹಾಕಿದ್ದು ಸಹ ಜೋಕ್ ಮಾತ್ರ. ಆ ದೃಶ್ಯವನ್ನು ನಾನು ನೋಡಿದಾಗ ನಾನು ಬಿದ್ದು ಬಿದ್ದು ನಕ್ಕೆ ಎಂದು ಹೇಳುವ ಮೂಲಕ ಜಗದೀಶ್ಗೆ ಚಾಟಿ ಬೀಸಿದರು.
ಬಿಗ್ಬಾಸ್ ಶೋ ಅದ್ಭುತವಾದ ಶೋ, ಒಳ್ಳೆಯ ವೇದಿಕೆ, ಈ ವೇದಿಕೆಯಿಂದ ಸಾಕಷ್ಟು ಜನರ ಜೀವನ ಬದಲಾಗಿದೆ. ಆದರೆ ಇದನ್ನು ಮಣ್ಣು ಮಾಡಿಬಿಡುತ್ತೀನಿ ಎಂದರೆ ನಿಮ್ಮಪ್ಪನಾಣೆ ಸಾಧ್ಯವಿಲ್ಲ ಎಂದು ಹೇಳಿದರು. ಆ ಬಳಿಕ ಮಾತನಾಡಿದ ಜಗದೀಶ್ ಹೌದು, ನಾನು ಮಾಡಿದ್ದು ತಪ್ಪು, ನಾನು ಹಾಗೆ ಮಾಡಬಾರದಿತ್ತು, ನನ್ನನ್ನು ಕ್ಷಮಿಸಿ ಎಂದು ಹೇಳಿದರು. ಒಟ್ಟಿನಲ್ಲಿ ಜಗದೀಶ್ ಹಾರಾಟಕ್ಕೆ ಕೊಂಚ ಮಟ್ಟಿಗೆ ನಿರೂಪಕ ಸುದೀಪ್ ಬ್ರೇಕ್ ಹಾಕಿದ್ದು, ಮುಂದಿನ ದಿನಗಳಲ್ಲಿ ಅವರು ಹೇಗೆ ಇರಲಿದ್ಧಾರೆ ಎಂದು ಕಾದು ನೋಡಬೇಕಿದೆ.