ಕೀರ್ತಿನಾರಾಯಣ ಸಿ ಬೆಂಗಳೂರು
ರಾಜ್ಯಾದ್ಯಂತ ವಾಹನ ಮಾಲೀಕರನ್ನು ಯಾಮಾರಿಸಿ ಹೆಚ್ಚುವರಿ ಹಣ ವಸೂಲಿ ಮಾಡುತ್ತಿರುವ ವಾಯುಮಾಲಿನ್ಯ ಪ್ರಮಾಣ ಪರೀಕ್ಷಾ (ಎಮಿಷನ್) ಕೇಂದ್ರಗಳ ಕಳ್ಳಾಟ ಬಯಲಾಗಿದೆ. ಈ ಲೂಟಿ ವಿಚಾರ ಗೊತ್ತಿದ್ದರೂ ದಂಧೆಗೆ ಕಡಿವಾಣ ಹಾಕಬೇಕಿದ್ದ ಸಾರಿಗೆ ಇಲಾಖೆಯ ಜಾಣ ಕುರುಡು ಒಂದೆಡೆಯಾದರೆ, ವಾಹನ ಮಾಲೀಕರ ನಿರ್ಲಕ್ಷ್ಯ ಹಾಗೂ ಅಧಿಕಾರಿಗಳ ಎಡವಟ್ಟು ದುಡ್ಡು ಮಾಡುವ ವಂಚಕರ ಹಾದಿಯನ್ನು ಮತ್ತಷ್ಟು ಸುಗಮವಾಗಿಸಿದೆ.
ಎಷ್ಟು ಕೇಂದ್ರಗಳಿವೆ? ರಾಜ್ಯಾದ್ಯಂತ 1100ಕ್ಕೂ ಅಧಿಕ ಎಮಿಷನ್ ಟೆಸ್ಟಿಂಗ್ ಕೇಂದ್ರಗಳಿವೆ. ಇದರಲ್ಲಿ ಬೆಂಗಳೂರಲ್ಲೇ 350ಕ್ಕೂ ಹೆಚ್ಚು ಕೇಂದ್ರಗಳಿವೆ. ಮೊದಲೇ ಕೇಳಬೇಕಿತ್ತು 1 ವರ್ಷದ ಬದಲು 6 ತಿಂಗಳಿಗೆ ಸರ್ಟಿಫಿಕೇಟ್ ಮಾಡಿಕೊಟ್ಟಿದ್ದನ್ನು ಒಂದು ವೇಳೆ ಮಾಲೀಕರು ಪ್ರಶ್ನಿಸಿದರೆ ಮೊದಲೇ ಹೇಳಬೇಕಿತ್ತು ಸರ್ ಎಂದು ಕೇಂದ್ರದ ಸಿಬ್ಬಂದಿಯೇ ದಬಾಯಿಸುತ್ತಾರೆ. 6 ತಿಂಗಳು ಅಥವಾ 1 ವರ್ಷ ಅವಧಿಗೆ ಯಾವುದು ಬೇಕೆಂದು ಮೊದಲೇ ತಿಳಿಸಬೇಕು. ಹೇಳಿದರೆ ಮಾತ್ರ ಮಾಡುತ್ತೇವೆ ಎನ್ನುತ್ತಾರೆ.
5 ಕೋಟಿ ರೂ.ಲೂಟಿ!
ರಾಜ್ಯಾದ್ಯಂತ ಅಂದಾಜು 2 ಕೋಟಿ ವಾಹನಗಳಿದ್ದು, ಈ ಪೈಕಿ ಬೆಂಗಳೂರಲ್ಲೇ 76 ಲಕ್ಷಕ್ಕಿಂತ ಹೆಚ್ಚಿವೆ. ಇದರಲ್ಲಿ 1.4 ಕೋಟಿ ದ್ವಿಚಕ್ರ ವಾಹನ ಹಾಗೂ 24 ಲಕ್ಷ ಕಾರುಗಳಿವೆ. 2 ಕೋಟಿ ವಾಹನಗಳಲ್ಲಿ 1 ಕೋಟಿ ಬಿಎಸ್ 4 ಮತ್ತು ಬಿಎಸ್ 6 ಇಂಜಿನ್ ವಾಹನಗಳಿವೆ ಎಂದು ಅಂದಾಜಿಸಿ ಸರಾಸರಿ ಪ್ರತಿ ವಾಹನದಿಂದ ಕನಿಷ್ಠ 50 ರೂ. ಹೆಚ್ಚುವರಿ ವಸೂಲಿ ಮಾಡಲಾಗುತ್ತಿದೆ ಎಂದುಕೊಂಡರೂ ವಾರ್ಷಿಕ 5 ಕೋಟಿ ರೂ. ವಂಚಕರ ಜೇಬು ಸೇರುತ್ತಿದೆ.
ವಂಚನೆ ಹೇಗೆ?
ಬಿಎಸ್ 4 ಇಂಜಿನ್ನ ಡೀಸೆಲ್ ಕಾರ್ನ ವರ್ಷದ ಅವಧಿಯ ಎಮಿಷನ್ ಸರ್ಟಿಫಿಕೇಟ್ಗೆ 125 ರೂ. ಶುಲ್ಕ ವಿದೆ. ಆದರೆ, ಎಮಿಷನ್ ಕೇಂದ್ರಗಳವರು 125 ರೂ. ತೆಗೆದುಕೊಂಡು ಕೇವಲ 6 ತಿಂಗಳ ಅವಧಿಗೆ ಮಾತ್ರ ಸರ್ಟಿಫಿಕೇಟ್ ನೀಡುತ್ತಿದ್ದಾರೆ. ಹೀಗಾಗಿ ವಾರ್ಷಿಕ 2 ಬಾರಿ ಸರ್ಟಿಫಿಕೇಟ್ ಪಡೆಯಲು ವಾಹನ ಮಾಲೀಕರು ಒಟ್ಟು 250 ರೂ. ಪಾವತಿಸಬೇಕಾಗುತ್ತದೆ. ಅಂದರೆ 1 ವಾಹನದಿಂದ ವಾರ್ಷಿಕ ಹೆಚ್ಚುವರಿಯಾಗಿ 125 ರೂ. ಸುಲಿಗೆ ಮಾಡಿದಂತಾಗುತ್ತದೆ. ಅದೇ ರೀತಿ ಪೆಟ್ರೋಲ್ ಕಾರಿಗೆ 90 ರೂ. ನಿಗದಿ ಪಡಿಸಲಾಗಿದೆ. ದ್ವಿಚಕ್ರ ವಾಹನಕ್ಕೆ 50 ರೂ. ಹಾಗೂ 3 ಚಕ್ರದ ವಾಹನಗಳಿಗೆ 60 ರೂ. ಇದೆ. ಜನರನ್ನು ಯಾಮಾರಿಸಿ 6 ತಿಂಗಳ ಸರ್ಟಿಫಿಕೇಟ್ ಮಾಡಿಕೊಡುವುದರಿಂದ ವಾರ್ಷಿಕ ಎರಡೆರಡು ಬಾರಿ ಹಣ ವಸೂಲಿ ಮಾಡಲಾಗುತ್ತಿದೆ.
ಇದನ್ನೂ ಓದಿ: ನ್ಯಾವಿಗೇಷನ್ ವ್ಯವಸ್ಥೆಯಲ್ಲೂ ಆತ್ಮನಿರ್ಭರ – ಜಿಪಿಎಸ್ಗೆ ಪರ್ಯಾಯವಾಗಿ ದೇಶೀಯ ಐಆರ್ಎನ್ಎಸ್ಎಸ್ ಸಿದ್ಧ
ನಕಲಿಯೂ ಸಲೀಸು
ಕಳ್ಳದಾರಿಯಲ್ಲಿ ಹೆಚ್ಚುವರಿ ವಸೂಲಿ ಒಂದೆಡೆಯಾದರೆ ನಕಲಿ ಸರ್ಟಿಫಿಕೇಟ್ ವಿತರಣೆ ಮತ್ತೊಂದು ದಂಧೆ. ಎಮಿಷನ್ ಟೆಸ್ಟಿಂಗ್ ಕೇಂದ್ರ ಆರಂಭಿಸಲು ಸಾರಿಗೆ ಇಲಾಖೆ ಅನುಮತಿ ಕಡ್ಡಾಯ. 2 ಸಾವಿರ ರೂ. ಶುಲ್ಕ ಹಾಗೂ 10 ಸಾವಿರ ರೂ. ಠೇವಣಿ ಇಟ್ಟು ಅರ್ಜಿ ಸಲ್ಲಿಸಿದರೆ ಷರತ್ತುಗಳನ್ನು ಪರಿಶೀಲಿಸಿ ಅನುಮತಿ ನೀಡಲಾಗುತ್ತದೆ. ಆದರೆ, ಕೆಲವರು ತಾವೇ ಕೇಂದ್ರಗಳನ್ನು ಆರಂಭಿಸಿಕೊಂಡು ನಕಲಿ ಹಾಲೋಗ್ರಾಂಗಳನ್ನು ಅಂಟಿಸಿ ಮಾಲಿನ್ಯ ಪ್ರಮಾಣ ಪತ್ರಗಳನ್ನು ವಿತರಿಸುತ್ತಿದ್ದಾರೆ. ಇಂತಹ 21 ಕೇಂದ್ರಗಳ ವಿರುದ್ಧ ವಿಲ್ಸನ್ಗಾರ್ಡನ್ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿ ಕೋರ್ಟ್ನಲ್ಲಿ ವಿಚಾರಣೆ ನಡೆಯುತ್ತಿದೆ.
ಇನ್ಸ್ಪೆಕ್ಟರ್ಗೇ ಧೋಖಾ!
ಆರ್ಟಿಒ ಬ್ರೇಕ್ ಇನ್ಸ್ಪೆಕ್ಟರ್ ಕಾರಿಗೆ ವರ್ಷದ ಬದಲು 6 ತಿಂಗಳ ಅವಧಿಗೆ ಎಮಿಷನ್ ಸರ್ಟಿಫಿಕೇಟ್ ಕೊಟ್ಟು ಯಾಮಾರಿಸಿರುವ ಪ್ರಕರಣವೂ ಬೆಳಕಿಗೆ ಬಂದಿದೆ. ಕಳೆದ ಬಾರಿ 1 ವರ್ಷದ ಅವಧಿಗೆ ಎಮಿಷನ್ ಮಾಡಿಸಿದ್ದರು. ಈ ವರ್ಷ 6 ತಿಂಗಳ ಅವಧಿಗೆ ಕೊಟ್ಟಿದ್ದಾರೆ. ಈ ಕುರಿತು ಎಮಿಷನ್ ಟೆಸ್ಟಿಂಗ್ ಕೇಂದ್ರದ ಸಿಬ್ಬಂದಿ ಪ್ರಶ್ನಿಸಿದಾಗ ಆನ್ಲೈನ್ನಲ್ಲಿ ಏನು ನಿಗದಿಯಾಗಿತ್ತೋ ಅದನ್ನೇ ಮಾಡಿಕೊಟ್ಟಿದ್ದೇವೆ. ಬೇಕಾದರೆ ಸಾರಿಗೆ ಇಲಾಖೆಯಲ್ಲಿ ವಿಚಾರಿಸಿಕೊಳ್ಳಿ ಎಂದು ಹಾರಿಕೆ ಉತ್ತರ ಕೊಟ್ಟಿದ್ದಾರೆ.
ಇದನ್ನೂ ಓದಿ: 2021ರಲ್ಲಿ 269 ದಿನವಷ್ಟೇ ಸರ್ಕಾರಿ ಕಚೇರಿ! – ಸರ್ಕಾರಿ ನೌಕರರಿಗೆ 19 ಪರಿಮಿತ ರಜೆ ಗಿಫ್ಟ್ ನೀಡಿದ ರಾಜ್ಯ ಸರ್ಕಾರ ಸರ್ಟಿಫಿಕೆಟ್ ಗೊಂದಲ ಬಿಎಸ್-6 ಇಂಜಿನ್ ವಾಹನಗಳೀಗ ರಸ್ತೆಗೆ ಇಳಿದಿವೆ. ಆದರೆ, ಬಿಎಸ್-3, ಬಿಎಸ್-4 ವಾಹನಗಳಿಗೆ ಮಾತ್ರ 6 ತಿಂಗಳು ಹಾಗೂ 1 ವರ್ಷ ಅವಧಿಯ ಮಾಲಿನ್ಯ ಪ್ರಮಾಣ ಪತ್ರ ಕೊಡಲು ಆದೇಶವಾಗಿದೆ. ಆದರೆ, ಬಿಎಸ್-6 ವಾಹನಗಳಿಗೆ ಯಾವ ಅವಧಿಯ ಸರ್ಟಿಫಿಕೇಟ್ ಕೊಡಬೇಕೆಂದು ಈವರೆಗೂ ಆದೇಶ ಹೊರಡಿಸಿಲ್ಲ. ಇಲಾಖೆಯ ವಿಳಂಬ ಧೋರಣೆ ಕೂಡ ದಂಧೆಕೋರರಿಗೆ ಅನುಕೂಲಕರವಾಗಿದೆ.
2019ರಿಂದ ದಂಧೆ
2019ರ ಸೆ.1ರಿಂದ ಹೊಸ ಮೋಟಾರು ವಾಹನ ಕಾಯ್ದೆ ಜಾರಿಯಾದ ತರುವಾಯ ಎಮಿಷನ್ ಟೆಸ್ಟ್ ಬೃಹತ್ ದಂಧೆಯಾಗಿ ಬದಲಾಗಿದೆ. ಮಾಲಿನ್ಯ ಪ್ರಮಾಣ ಪತ್ರ ಇಲ್ಲದ ವಾಹನಗಳಿಗೆ ವಿಧಿಸುತ್ತಿದ್ದ ದಂಡದ ಪ್ರಮಾಣವನ್ನು 1000 ರೂ.ಗೆ ಏರಿಸಲಾಗಿತ್ತು. ಹೀಗಾಗಿ ಜನ ಸರ್ಟಿಫಿಕೇಟ್ಗಾಗಿ ಎಮಿಷನ್ ಕೇಂದ್ರಗಳಿಗೆ ಮುಗಿಬಿದ್ದಿದ್ದರು. ಇದು ಹೆಚ್ಚುವರಿ ವಸೂಲಿ ಹಾಗೂ ನಕಲಿ ಸರ್ಟಿಫಿಕೇಟ್ ದಂಧೆಗೆ ಕಾರಣವಾಯಿತು ಎಂದು ಸಾರಿಗೆ ಇಲಾಖೆ ಅಧಿಕಾರಿಗಳು ಹೇಳುತ್ತಾರೆ.