ನವದೆಹಲಿ: ಭಾರತದ ಕರೊನಾ ಲಸಿಕಾ ಅಭಿಯಾನ ಹಲವು ಮೈಲಿಗಲ್ಲುಗಳೊಂದಿಗೆ ಅಗಾಧ ಯಶಸ್ಸು ಕಾಣುತ್ತಾ ಬಂದಿದೆ. ಇದೀಗ 100 ಕೋಟಿ ಲಸಿಕೆ ಡೋಸ್ಗಳನ್ನು ನೀಡಿರುವ ಜಗತ್ತಿನ ಎರಡನೇ ರಾಷ್ಟ್ರವಾಗಿ ಭಾರತ ಹೊರಹೊಮ್ಮಿದೆ. ಈ ಸಂದರ್ಭದಲ್ಲಿ ದೇಶದ ಈ ಸಾಧನೆಯಲ್ಲಿ ಲಸಿಕೀಕರಣದ ಪ್ರಕ್ರಿಯೆಯನ್ನು ನಿರ್ವಹಿಸಲು ಬಳಸುತ್ತಿರುವ ಕೋವಿನ್ ಆ್ಯಪ್ನ ಪಾತ್ರ ಶ್ಲಾಘನೀಯವಾಗಿದೆ ಎಂದು ರಾಷ್ಟ್ರೀಯ ಆರೋಗ್ಯ ಪ್ರಾಧಿಕಾರ(ಎನ್ಎಚ್ಎ)ದ ಸಿಇಒ ಹಾಗೂ ಕೋವಿನ್ ಮುಖ್ಯಸ್ಥ ಡಾ. ಆರ್.ಎಸ್.ಶರ್ಮಾ ಹೇಳಿದ್ದಾರೆ.
ಲಸಿಕಾ ಅಭಿಯಾನವು ಸರಾಗವಾಗಿ, ಕ್ರಮಬದ್ಧವಾಗಿ ಮತ್ತು ಪಾರದರ್ಶಕವಾಗಿ ನಡೆಯುವಲ್ಲಿ ಭಾರತದಲ್ಲೇ ಡಿಸೈನ್ ಮಾಡಲಾದ ಕೋವಿನ್ ಆ್ಯಪ್ ಮಹತ್ತರ ಪಾತ್ರ ವಹಿಸಿದೆ. ಕೇಂದ್ರ ಸರ್ಕಾರ, ರಾಜ್ಯ ಸರ್ಕಾರ ಮತ್ತು ಖಾಸಗಿ ಕ್ಷೇತ್ರದ ಸಹಭಾಗಿತ್ವದಲ್ಲಿ ಪ್ರತಿಯೊಂದು ಡೋಸ್ ಲಸಿಕೆಯನ್ನೂ ಟ್ರ್ಯಾಕ್ ಮಾಡುವಲ್ಲಿ ಕೋವಿನ್ ವೇದಿಕೆ ಅತ್ಯಂತ ಮುಖ್ಯ ಪಾತ್ರ ವಹಿಸಿದೆ ಎಂದು ಅವರು ಹೇಳಿದ್ದಾರೆ.
ಜಗತ್ತಿನಲ್ಲಿ ಒಂಭತ್ತು ತಿಂಗಳ ಕಡಿಮೆ ಅವಧಿಯಲ್ಲಿ ಇಷ್ಟು ವೇಗವಾಗಿ ಸಾಧನೆ ಮಾಡಿದ ಬೇರೊಂದು ಡಿಜಿಟಲ್ ವೇದಿಕೆ ಇಲ್ಲ. ಲಸಿಕೆಗೆ ಅಪಾಯಿಂಟ್ಮೆಂಟ್ಗಳನ್ನು ನೀಡುವುದರಿಂದ ಲಸಿಕೆ ಪ್ರಮಾಣ ಪತ್ರ ನೀಡುವವರೆಗೆ ಎಲ್ಲವೂ ಸುಸೂತ್ರವಾಗಿ ನಡೆಯುತ್ತಿದೆ. ಕೋವಿನ್ ಆ್ಯಪ್ ಬಗ್ಗೆ ವಿವಿಧ ರಾಷ್ಟ್ರಗಳು ಆಸಕ್ತಿ ವ್ಯಕ್ತಪಡಿಸಿದ್ದರಿಂದ ಇದನ್ನು ಜುಲೈ 5 ರಂದು 100 ದೇಶಗಳು ಭಾಗವಹಿಸಿದ ಜಾಗತಿಕ ಸಮ್ಮೇಳನದಲ್ಲಿ 'ಓಪನ್ ಸೋರ್ಸ್' ಮಾಡಿ ದಾಖಲೀಕರಿಸಲಾಗಿದೆ ಎಂದು ಡಾ.ಶರ್ಮಾ ತಿಳಿಸಿದ್ದಾರೆ. (ಏಜೆನ್ಸೀಸ್)