ಹಾವೇರಿ: ತಂದೆಯ ಹೃದಯಬಡಿತ ನಿಂತಿದ್ದರೂ ಬಾಯಿಗೆ ಬಾಯಿಟ್ಟು ಉಸಿರು ಕೊಡುತ್ತಾ 'ಅಪ್ಪಾ.. ಏಳಪ್ಪಾ.. ಏಳಪ್ಪಾ...' ಎನ್ನುತ್ತಿದ್ದ ಮಗ. 'ನಿಮ್ಮಪ್ಪ ಬದುಕಿದ್ದಾರೋ... ಬೇರೆ ಆಸ್ಪತ್ರೆಗೆ ತಗೊಂಡು ಹೋಗೋಣ... ರೀ ಎದ್ದೇಳ್ರೀ... ಕಣ್ಣುಬಿಡ್ರೀ...' ಎನ್ನುತ್ತಾ ಗೋಳಾಡುತ್ತಿದ್ದ ಪತ್ನಿ...
ಇಂತಹ ಕರುಣಾಜನಕ ಘಟನೆ ಹಾವೇರಿ ಜಿಲ್ಲಾಸ್ಪತ್ರೆ ಮುಂಭಾಗ ನಿನ್ನೆ(ಬುಧವಾರ) ರಾತ್ರಿ ಸಂಭವಿಸಿದೆ. ಹಾವೇರಿ ತಾಲೂಕಿನ ಕಬ್ಬೂರು ಗ್ರಾಮದ ನಾಗಪ್ಪ ಹೊನ್ನಪ್ಪ(65) ಎಂಬುವವರು ನಿನ್ನೆ ರಾತ್ರಿ ಮನೆಯಲ್ಲಿ ಕುಸಿದು ಬಿದ್ದಿದ್ದಾರೆ. ಕೂಡಲೇ ಅವರನ್ನ ಪತ್ನಿ-ಮಗ ಜಿಲ್ಲಾಸ್ಪತ್ರೆಗೆ ಕರೆದುಕೊಂಡು ಬಂದಿದ್ದರು.
ದುರಂತ ಅಂದ್ರೆ ಆಸ್ಪತ್ರೆಗೆ ಬರುವ ಮಾರ್ಗಮಧ್ಯೆ ನಾಗಪ್ಪ ಮೃತಪಟ್ಟಿದ್ದರು. ಪರಿಶೀಲಿಸಿದ ವೈದ್ಯರು ನಾಗಪ್ಪ ಬದುಕಿಲ್ಲ ಎನ್ನುತ್ತಿದ್ದಂತೆ ರೋದಿಸಿದ ತಾಯಿ ಮತ್ತು ಮಗ, ಮೃತದೇಹಕ್ಕೆ ಬಡಿದೆಬ್ಬಿಸಲು ಯತ್ನಿಸಿದರು. ತಂದೆಯ ಹಾರ್ಟ್ಬೀಟ್ ನಿಂತಿದ್ದರೂ 'ಏಳಪ್ಪಾ ಏಳಪ್ಪಾ' ಎಂದು ನರಳಾಡಿದ ಮಗ ರಾಜು ತಂದೆಯ ಶವಕ್ಕೆ ಬಾಯಿಟ್ಟು ಉಸಿರು ನಿಡುತ್ತಿದ್ದ. 'ನಿಮ್ಮಪ್ಪ ಕಣ್ಣು ಬಿಟ್ಟಿದ್ದ ಬೇರೆ ಆಸ್ಪತ್ರೆಗೆ ತಗೊಂಡು ಹೋಗೋಣ' ಎಂದು ಪತ್ನಿ ಕರಬಸವ್ವ ಹೊನ್ನತ್ತಿ ಗೋಳಾಡುತ್ತಿದ್ದಳು.
ಜೀವ ಇಲ್ಲದ ದೇಹವನ್ನ ಬದುಕಿಸಲು ತಾಯಿ-ಮಗ ಇನ್ನಿಲ್ಲದ ಕಸರತ್ತು ಮಾಡುತ್ತಿದ್ದ ದೃಶ್ಯ ಮನಕಲಕುವಂತಿತ್ತು. ಅಂತಿಮವಾಗಿ ನಾಗಪ್ಪ ಬದುಕಿಲ್ಲ ಎಂಬುದನ್ನ ಅರಿತ ತಾಯಿ-ಮಗ ಶವ ತೆಗೆದುಕೊಂಡು ಹೋದರು. (ವರದಿ: ರಮೇಶ್ ಬಿ.ಎಚ್., ದಿಗ್ವಿಜಯ ನ್ಯೂಸ್)