ನವದೆಹಲಿ: ಅರಬ್ ಸಂಯುಕ್ತ ಸಂಸ್ಥಾನದಿಂದ (ಯುಎಇ) ನಿಕರಾಗುವಾಗೆ ಹೊರಟಿದ್ದ ವಿಮಾನವನ್ನು ಮಾನವ ಕಳ್ಳಸಾಗಣೆ ಆರೋಪದ ಹಿನ್ನೆಲೆಯಲ್ಲಿ ಫ್ರಾನ್ಸ್ನಲ್ಲಿ ತಡೆಹಿಡಿಯಲಾಗಿದೆ. 300ಕ್ಕೂ ಹೆಚ್ಚು ಭಾರತೀಯ ಪ್ರಯಾಣಿಕರು ಇರುವ ಈ ವಿಮಾನದಲ್ಲಿ 13 ಅಪ್ರಾಪ್ತ ವಯಸ್ಕರು ಕೂಡ ಇದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
21 ತಿಂಗಳಿಂದ 17 ವರ್ಷ ವಯಸ್ಸಿನ 13 ಅಪ್ರಾಪ್ತ ವಯಸ್ಕರು ಈ ವಿಮಾನದಲ್ಲಿದ್ದಾರೆ. ಈ ಅಪ್ರಾಪ್ತರ ಜತೆ ಯಾರೂ ಇಲ್ಲ ಎಂದು ಫ್ರೆಂಚ್ ಅಧಿಕಾರಿಗಳು ತಿಳಿಸಿದ್ದಾರೆ. ಈ ಘಟನೆಗೆ ಸಂಬಂಧಿಸಿದಂತೆ ಇಬ್ಬರನ್ನು ವಶಕ್ಕೆ ಪಡೆಯಲಾಗಿದೆ.
ಮಾನವ ಕಳ್ಳಸಾಗಣೆಗೆ ಬಲಿಯಾಗಬಹುದಾದ ಜನರನ್ನು ವಿಮಾನವು ಹೊತ್ತೊಯ್ಯುತ್ತಿದೆ ಎಂದು ಅಧಿಕಾರಿಗಳಿಗೆ ಸುಳಿವು ಲಭಿಸಿತ್ತು ಎಂದು ಸರ್ಕಾರಿ ವಕೀಲರ ಕಚೇರಿ ತಿಳಿಸಿದೆ. ರಾಷ್ಟ್ರೀಯ ಸಂಘಟಿತ ಅಪರಾಧ ವಿರೋಧಿ ಘಟಕ ಜುನಾಲ್ಕೊ ಈ ಘಟನೆಯ ತನಿಖೆಯನ್ನು ವಹಿಸಿಕೊಂಡಿದೆ.
ರೊಮೇನಿಯಾದ ಕಂಪನಿ ಲೆಜೆಂಡ್ ಏರ್ಲೈನ್ಸ್ ನಿರ್ವಹಿಸುವ A340 ವಿಮಾನವು ಶುಕ್ರವಾರದಂದು ವಿಮಾನ ನಿಲ್ದಾಣದಲ್ಲಿ ಇಳಿದಿದೆ. ವ್ಯಾಟ್ರಿ ವಿಮಾನ ನಿಲ್ದಾಣವು ಪ್ಯಾರಿಸ್ನ ಪೂರ್ವಕ್ಕೆ 150 ಕಿಲೋಮೀಟರ್ ದೂರದಲ್ಲಿದ್ದು, ಬಹುತೇಕವಾಗಿ ಬಜೆಟ್ ಏರ್ಲೈನ್ಗಳಿಗೆ ಸೇವೆ ಸಲ್ಲಿಸುತ್ತದೆ.
ಯುಎಇಯಲ್ಲಿ ಕೆಲಸ ಮಾಡುತ್ತಿದ್ದ 303 ಭಾರತೀಯ ಪ್ರಜೆಗಳೊಂದಿಗೆ ದುಬೈನಿಂದ ಟೇಕಾಫ್ ಆದ ವಿಮಾನವು ಇಂಧನ ತುಂಬಲು ಮತ್ತು ಬಹುಶಃ ವ್ಯಾಟ್ರಿ ವಿಮಾನ ನಿಲ್ದಾಣದಲ್ಲಿ ತಾಂತ್ರಿಕ ಕಾರಣಕ್ಕಾಗಿ ನಿಲುಗಡೆಯಾಗಿದೆ. ತನಿಖಾಧಿಕಾರಿಗಳು ವಿಮಾನದಲ್ಲಿದ್ದ ಎಲ್ಲ ಜನರನ್ನು ವಿಚಾರಣೆ ನಡೆಸುತ್ತಿದ್ದರು. ಅಲ್ಲದೆ, ವಿಮಾನ ನಿಲ್ದಾಣವನ್ನು ಪೊಲೀಸರು ಸುತ್ತುವರಿದಿದ್ದರು ಎಂದು ವರದಿಯಾಗಿದೆ.
ಪ್ರಯಾಣಿಕರನ್ನು ವ್ಯಾಟ್ರಿ ವಿಮಾನ ನಿಲ್ದಾಣದ ಮುಖ್ಯ ಟರ್ಮಿನಲ್ ಕಟ್ಟಡಕ್ಕೆ ಸ್ಥಳಾಂತರಿಸಲಾಯಿತು, ಅಲ್ಲಿ ಶುಕ್ರವಾರ ರಾತ್ರಿ ತಂಗಲು ಪ್ರತ್ಯೇಕ ಹಾಸಿಗೆಗಳನ್ನು ಒದಗಿಸಲಾಯಿತು. ಅಮೆರಿಕಾ ಅಥವಾ ಕೆನಡಾಕ್ಕೆ ಅಕ್ರಮವಾಗಿ ಪ್ರವೇಶಿಸುವ ಉದ್ದೇಶದಿಂದ ಪ್ರಯಾಣಿಕರು ಮಧ್ಯ ಅಮೆರಿಕಕ್ಕೆ ಪ್ರಯಾಣಿಸಲು ಯೋಜಿಸಿರಬಹುದು ಎಂದು ಮೂಲಗಳು ತಿಳಿಸಿವೆ.
303 ಪ್ರಯಾಣಿಕರು ಮತ್ತು ಕ್ಯಾಬಿನ್ ಸಿಬ್ಬಂದಿಯ ಗುರುತಿನ ತಪಾಸಣೆ ನಡೆಸಲಾಗುತ್ತಿದೆ ಎಂದು ಫ್ರೆಂಚ್ ಅಧಿಕಾರಿಗಳು ತಿಳಿಸಿದ್ದಾರೆ. ಅವರು ಪ್ರಯಾಣಿಕರನ್ನು ಸಾಗಿಸುವ ಪರಿಸ್ಥಿತಿಗಳು ಮತ್ತು ಅವರ ಪ್ರಯಾಣದ ಉದ್ದೇಶವನ್ನು ಸಹ ಪರಿಶೀಲಿಸುತ್ತಿದ್ದರು.
ಸಂಸ್ಥೆಯು ಯಾವುದೇ ತಪ್ಪು ಮಾಡಿಲ್ಲ ಎಂದು ನಂಬಿದೆ. ಆದರೂ ಸರ್ಕಾರಿ ವಕೀಲರು ಆರೋಪಗಳನ್ನು ಸಲ್ಲಿಸಿದರೆ ವಿಮಾನಯಾನ ಸಂಸ್ಥೆಯು ಕಾನೂನು ಕ್ರಮ ಕೈಗೊಳ್ಳುತ್ತದೆ ಲೆಜೆಂಡ್ ಏರ್ಲೈನ್ಸ್ನ ವಕೀಲ ಲಿಲಿಯಾನಾ ಬಕಾಯೊಕೊ ತಿಳಿಸಿದ್ದಾರೆ.
ಪ್ಯಾರಿಸ್ನಲ್ಲಿರುವ ಅಧಿಕಾರಿಗಳು ಪರಿಸ್ಥಿತಿಯ ಬಗ್ಗೆ ಮಾಹಿತಿ ನೀಡಿದ್ದಾರೆ ಎಂದು ಫ್ರಾನ್ಸ್ನಲ್ಲಿರುವ ಭಾರತೀಯ ರಾಯಭಾರ ಕಚೇರಿ ಖಚಿತಪಡಿಸಿದೆ.
ವಿದೇಶಿ ಪ್ರಜೆಯು ಫ್ರಾನ್ಸ್ಗೆ ಬಂದಿಳಿದರೆ ಮತ್ತು ಅವರ ಉದ್ದೇಶಿತ ಸ್ಥಳಕ್ಕೆ ಪ್ರಯಾಣಿಸುವುದನ್ನು ತಡೆಗಟ್ಟಿದರೆ ಗಡಿ ಪೊಲೀಸರು ಆರಂಭದಲ್ಲಿ ನಾಲ್ಕು ದಿನಗಳವರೆಗೆ ಅವರನ್ನು ಹಿಡಿದಿಟ್ಟುಕೊಳ್ಳಬಹುದು. ನ್ಯಾಯಾಧೀಶರು ಇದನ್ನು ಅನುಮೋದಿಸಿದರೆ ಈ ಅವಧಿಯನ್ನು ಎಂಟು ದಿನಗಳವರೆಗೆ ವಿಸ್ತರಿಸಲು ಫ್ರೆಂಚ್ ಕಾನೂನು ಅನುಮತಿಸುತ್ತದೆ, ನಂತರ ಅಸಾಧಾರಣ ಸಂದರ್ಭಗಳಲ್ಲಿ ಮತ್ತೆ ಎಂಟು ದಿನಗಳು, ಗರಿಷ್ಠ 26 ದಿನಗಳವರೆಗೆ ಹಿಡಿದಿಟ್ಟುಕೊಳ್ಳಬಹುದು. ಮಾನವ ಕಳ್ಳಸಾಗಣೆ ಪ್ರಕರಣದಲ್ಲಿ ಫ್ರಾನ್ಸ್ನಲ್ಲಿ 20 ವರ್ಷಗಳವರೆಗೆ ಶಿಕ್ಷೆ ವಿಧಿಸಬಹುದಾಗಿದೆ.