ಹೈದರಾಬಾದ್: ಸಮಂತಾ ಮೊದಲ ಬಾರಿಗೆ ನೆಗೆಟಿವ್ ಪಾತ್ರದಲ್ಲಿ ಕಾಣಿಸಿಕೊಂಡಿರುವ 'ದಿ ಫ್ಯಾಮಿಲಿ ಮ್ಯಾನ್ 2', ಜೂನ್ ನಾಲ್ಕರಿಂದ ಅಮೇಜಾನ್ ಪ್ರೈಮ್ನಲ್ಲಿ ಸ್ಟ್ರೀಮ್ ಆಗಲಿದೆ. ಈ ಮಧ್ಯೆ, ಈ ಕಾರ್ಯಕ್ರಮವನ್ನು ಬಿಡುಗಡೆ ಮಾಡಬಾರದು ಎಂದು ಹಲವರು ಒತ್ತಾಯ ಮಾಡುತ್ತಿದ್ದಾರೆ. ಇಷ್ಟೆಲ್ಲಾ ಆಗುತ್ತಿದ್ದರೂ, ಸಮಂತಾ ಮಾತ್ರ ಯಾಕೆ ಮಾತಾಡುತ್ತಿಲ್ಲ ಎಂಬ ಪ್ರಶ್ನೆ ಕೇಳಿಬರುತ್ತಿದೆ.
ಹೌದು, ತಮಿಳರ ಭಾವನೆಗಳಿಗೆ ಧಕ್ಕೆ ತರುವ ಅಂಶಗಳು 'ದಿ ಫ್ಯಾಮಿಲಿ ಮ್ಯಾನ್' ಕಾರ್ಯಕ್ರಮದಲ್ಲಿರುವುದರಿಂದ, ಬಿಡುಗಡೆ ಮಾಡಬಾರದು ಎಂದು ನಾಮ್ ತಮಿಳರ್ ಕಚ್ಚಿ (ಎನ್ಟಿಕೆ) ಸಂಘಟನೆಯ ಸಂಸ್ಥಾಪಕ ಸೀಮನ್ ಸೇರಿದಂತೆ ಹಲವರು ಒತ್ತಾಯ ಮಾಡುತ್ತಿದ್ದಾರೆ. ಈ ಕುರಿತು ಮನೋಜ್ ಬಾಜ್ಪೇಯಿ, ನಿರ್ದೇಶಕರಾದ ರಾಜ್-ಡಿಕೆ ಸೇರಿದಂತೆ ಹಲವರು ಮಾತನಾಡಿದ್ದಾರೆ. ಯಾರನ್ನೂ ನೋಯಿಸುವ ಉದ್ದೇಶದಿಂದ ಈ ವೆಬ್ಸೀರೀಸ್ ಮಾಡಿಲ್ಲ ಎಂದು ಹೇಳಿದ್ದಾರೆ. ಆದರೆ, ಸಮಂತಾ ಮಾತ್ರ ಇದುವರೆಗೂ ಒಂದೇ ಒಂದು ಮಾತನ್ನಾಡಿಲ್ಲ.
ಇಷ್ಟಕ್ಕೂ ಸಮಂತಾ ಯಾಕೆ ಯಾವುದೇ ಪ್ರತಿಕ್ರಿಯೆ ನೀಡುತ್ತಿಲ್ಲ ಎಂಬ ಪ್ರಶ್ನೆ ಬರಬಹುದು. ಮೂಲಗಳ ಪ್ರಕಾರ, ಈ ವೆಬ್ಸರಣಿ ಸ್ಟ್ರೀಮ್ ಆಗುವವರೆಗೂ ಮಾತಾಡಬೇಡಿ ಎಂದು ಅಮೇಜಾನ್ ಪ್ರೈಮ್ನವರು ಆದೇಶ ಹೊರಡಿಸಿದ್ದಾರಂತೆ. ಈ ವಿವಾದಗಳು ರಾಜಕೀಯ ರೂಪ ಪಡೆಯುತ್ತಿರುವುದರಿಂದ, ಈ ಸಂದರ್ಭದಲ್ಲಿ ಮಾತಾಡಿ ಏನಾದರೂ ಯಡವಟ್ಟಾದರೆ, ಕಾರ್ಯಕ್ರಮ ನಿಂತು ಹೋಗುವ ಸಾಧ್ಯತೆ ಇದೆ. ಅದೇ ಕಾರಣದಿಂದ ಸಮತಾ ಸೇರಿದಂತೆ, ಚಿತ್ರತಂಡದ ಹಲವರಿಗೆ ಏನೂ ಮಾತಾಡಬೇಡಿ ಎಂಬ ಸಂದೇಶ ರವಾನೆಯಾಗಿರುವುದರಿಂದ, ಎಲ್ಲರೂ ಸುಮ್ಮನೆ ಇದ್ದಾರೆ ಎಂದು ಹೇಳಲಾಗುತ್ತಿದೆ.
ಈಗಾಗಲೇ ಈ ವೆಬ್ಸರಣಿಯ ಟ್ರೇಲರ್ ಹಿಟ್ ಆಗಿದ್ದು, ಒಂದೇ ದಿನದಲ್ಲಿ 15 ಮಿಲಿಯನ್ ವೀಕ್ಷಣೆ ಪಡೆದ ಮೊದಲ ಭಾರತೀಯ ವೆಬ್ಸೀರೀಸ್ ಟ್ರೇಲರ್ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.