ಮುಂಬೈ: ಬಾಲಿವುಡ್ ಬಾದ್ಷಾ ಶಾರೂಖ್ ಖಾನ್ ಅವರನ್ನು ಇದುವರೆಗೂ ಕೆಲವು ಬಾರಿ ಬೇರೆಬೇರೆ ದೇಶಗಳ ಏರ್ಪೋರ್ಟ್ನಲ್ಲಿ ತಡೆಯಲಾಗಿದೆ. ಆದರೆ, ಶುಕ್ರವಾರ ರಾತ್ರಿ ಅವರನ್ನು ಮುಂಬೈ ಏರ್ಪೋರ್ಟ್ನಲ್ಲಿ ತಡೆಯಲಾಗಿದ್ದು, ಕೊನೆಗೆ ಕಸ್ಟಮ್ಸ್ ತೆರಿಗೆ ಪಾವತಿಸಿದ ನಂತರ ಹೊರಬಿಡಲಾಗಿದೆ.
ವಿಷಯವೇನೆಂದರೆ, ಶಾರೂಖ್ ಖಾನ್ ಇತ್ತೀಚೆಗೆ ಕಾರ್ಯಕ್ರಮದಲ್ಲಿ ಭಾಗವಹಿಸುವುದಕ್ಕೆ ಶಾರ್ಜಾಗೆ ಹೋಗಿದ್ದರು. ಪ್ರೈವೇಟ್ ಜೆಟ್ನಲ್ಲಿ ಅವರು ವಾಪಸ್ಸಾಗಿದ್ದು, ಅವರ ಮತ್ತು ಅವರ ಸಿಬ್ಬಂದಿಯ ಬ್ಯಾಗ್ಗಳಲ್ಲಿ 18 ಲಕ್ಷ ರೂ. ಬೆಲೆ ಬಾಳುವ ವಾಚ್ಗಳು ಸಿಕ್ಕಿವೆ. ಈ ವಿಚಾರವಾಗಿ ಕಸ್ಟಮ್ಸ್ ಅಧಿಕಾರಿಗಳು ಅವರನ್ನು ತಡ3ಎದು ವಿಚಾರಣೆ ನಡೆಸಿದ್ದಾರೆ. ಕೊನೆಗೆ ಶಾರೂಖ್ ಖಾನ್ ಅವರಿಗೆ 6.86 ಲಕ್ಷ ರೂ.ಗಳನ್ನು ತೆರಿಗೆಯನ್ನಾಗಿ ಪಾವತಿಸಿಕೊಂಡು ಅವರನ್ನು ಬಿಟ್ಟು ಕಳಿಸಿದ್ದಾರೆ.
ತಡರಾತ್ರಿ ಮುಂಬೈಗೆ ಬಂದ ಶಾರೂಖ್ ಖಾನ್, ಪೊಲೀಸರು ತಡೆದಿದ್ದರಿಂದ ಕೆಲವು ತಾಸುಗಳ ಕಾಲ ಏರ್ಪೋರ್ಟ್ನಲ್ಲೇ ಉಳಿದಿದ್ದಾರೆ. ಕೊನೆಗೆ ಬೆಳಗ್ಗಿನ ಜಾವದ ಹೊತ್ತಿಗೆ ಅವರು ತೆರಿಗೆ ಪಾವತಿಸಿ ಏರ್ಪೋರ್ಟ್ನಿಂದ ಹೊರ ನಡೆದಿದ್ದಾರೆ ಎಂದು ಹೇಳಲಾಗಿದೆ.
ಶಾರೂಖ್ ಖಾನ್, ಶಾರ್ಜಾ ಅಂತಾರಾಷ್ಟ್ರೀಯ ಪುಸ್ತಕ ಮೇಳಕ್ಕಾಗಿ ಶಾರ್ಜಾಗೆ ಹೋಗಿದ್ದರು. ಅವರಿಗೆ ಈ ಸಮಾರಂಭದಲ್ಲಿ ಗ್ಲೋಬಲ್ ಐಕಾನ್ ಆಫ್ ಸಿನಿಮಾ ಎಂಬ ಪ್ರಶಸ್ತಿಯನ್ನು ನೀಡಿ ಗೌರವಿಸಲಾಗಿತ್ತು.