ಮುಂಬೈ: ರಿಷಭ್ ಶೆಟ್ಟಿ ಅಭಿನಯದ ಮತ್ತು ನಿರ್ದೇಶನದ 'ಕಾಂತಾರ' ಚಿತ್ರವು ಬಿಡುಗಡೆಯಾಗಿ ಒಂದು ತಿಂಗಳುಗಳಾಗಿವೆ. ಚಿತ್ರದ ಯಶಸ್ಸಿನಲ್ಲಿ ತೇಲುತ್ತಿರುವ ರಿಷಭ್, ಮುಂದೆ ಏನು ಮಾಡುತ್ತಾರೆ? ಯಾವ ಬಾಷೆಗೆ ಹಾರುತ್ತಾರೆ ಎಂಬ ಕುತೂಹಲ ಜನರಲ್ಲಿದೆ. ಆದರೆ, ರಿಷಭ್ ಮಾತ್ರ ಕನ್ನಡ ಬಿಟ್ಟು ಬೇರೆ ಯಾವುದೇ ಭಾಷೆಯ ಚಿತ್ರಗಳನ್ನೂ ನಿರ್ದೇಶಿಸುವುದಿಲ್ಲ ಎಂದು ಹೇಳಿಕೊಂಡಿದ್ದಾರೆ.
ಇತ್ತೀಚೆಗೆ, ಇಂಗ್ಲೀಷ್ ವೆಬ್ಸೈಟ್ವೊಂದಕ್ಕೆ ಸಂದರ್ಶನ ನೀಡಿರುವ ಅವರು ತಮಗೆ ಬಾಲಿವುಡ್ ಚಿತ್ರಗಳನ್ನು ನಿರ್ದೇಶಿಸುವ ಆಸಕ್ತಿ ಇಲ್ಲ ಎಂದಿದ್ದಾರೆ. ''ಕಾಂತಾರ' ಬಿಡುಡೆಯ ನಂತರ ನನಗೆ ಬಾಲಿವುಡ್ನ ಕೆಲವು ಜನಪ್ರಿಯ ಚಿತ್ರ ನಿರ್ಮಾಣ ಸಂಸ್ಥೆಗಳಿಂದ ಕರೆ ಬಂದಿದೆ. ಒಟ್ಟಿಗೆ ಚಿತ್ರ ಮಾಡೋಣ ಎಂದು ಹಲವು ಸಂಸ್ಥೆಗಳು ನನಗೆ ಆಫರ್ ನೀಡಿವೆ. ಆದರೆ, ನನಗೆ ಕನ್ನಡದಲ್ಲೇ ಚಿತ್ರ ನಿರ್ದೇಶನ ಮಾಡುವುದಕ್ಕೆ ಇಷ್ಟ. ಬೇರೆ ಯಾವ ಭಾಷೆಗಳಲ್ಲೂ ನನಗೆ ಚಿತ್ರ ನಿರ್ದೇಶನ ಮಾಡುವ ಆಸಕ್ತಿ ಇಲ್ಲ' ಎಂದು ಹೇಳಿಕೊಂಡಿದ್ದಾರೆ.
ಇದಕ್ಕೂ ಮುನ್ನ ಮಾತನಾಡಿದ್ದ ಅವರು, 'ಕಾಂತಾರ' ಚಿತ್ರದಲ್ಲಿನ ತಮ್ಮ ಪಾತ್ರವನ್ನು ಯಾವ ಬಾಲಿವುಡ್ ನಟನಿಂದಲೂ ಮಾಡುವುದಕ್ಕೆ ಸಾಧ್ಯವಿಲ್ಲ ಮತ್ತು ಆ ಪಾತ್ರದಲ್ಲಿ ಯಾವ ನಟರನ್ನೂ ಕಲ್ಪಿಸಿಕೊಳ್ಳುವುದಕ್ಕೆ ಸಾಧ್ಯ ಇಲ್ಲ ಎಂದು ಹೇಳಿದ್ದರು. 'ದೈವ ಕೋಲಕ್ಕೂ ನನಗೂ ಎಮೋಷನಲ್ ಆದ ಸಂಬಂಧವಿದೆ. ನಾನು ಅದನ್ನು ಚಿಕ್ಕಂದಿನಿಂದ ನೋಡಿದ್ದೇನೆ. ಹಾಗಾಗಿ, ನನಗೆ ಆ ಪಾತ್ರ ಮಾಡುವುದಕ್ಕೆ ಅಷ್ಟು ಕಷ್ಟವಾಗಲಿಲ್ಲ. ಆದರೆ, ಅದನ್ನು ಬೇರೆಯವರಿಗೆ ಅರ್ಥ ಮಾಡಿಸುವುದಕ್ಕೆ ಸಾಧ್ಯವಿಲ್ಲ. ಇಲ್ಲಿ ಸಾಕಷ್ಟು ಅದ್ಭುತ ನಟರಿದ್ದಾರೆ. ಆದರೆ, ಶಿವ ಪಾತ್ರವನ್ನು ಅವರಿಗೆ ಅರ್ಥ ಮಾಡಿಸುವುದು ನನಗೆ ಬಹಳ ಕಷ್ಟ. ಹಾಗಾಗಿ, ಈ ಪಾತ್ರಕ್ಕೆ ಬೇರೆ ಯಾರನ್ನೋ ಕಲ್ಪಿಸಿಕೊಳ್ಳುವುದಕ್ಕೆ ಸಾಧ್ಯವಿಲ್ಲ' ಎಂದು ಅವರು ಹೇಳಿದ್ದರು.
'ಕಾಂತಾರ' ಚಿತ್ರವು ತೆಲುಗಿಗೆ ಡಬ್ ಆಗಿ ಹಿಟ್ ಆದ ಸಂದರ್ಭದಲ್ಲಿ, ಜನಪ್ರಿಯ ನಿರ್ಮಾಪಕ ಅಲ್ಲು ಅರವಿಂದ್ ಅವರು ತಮ್ಮ ಸಂಸ್ಥೆಗೊಂದು ಚಿತ್ರ ನಿರ್ಮಿಸುವುದಕ್ಕೆ ಕೇಳಿಕೊಂಡಿದ್ದರಂತೆ. ಆಗಲೂ ರಿಷಭ್ ಶೆಟ್ಟಿ ಈ ಆಫರ್ನ್ನು ನಯವಾಗಿಯೇ ತಿರಸ್ಕರಿಸಿದ್ದರು.
ಇದನ್ನೂ ಓದಿ: ಪುಷ್ಪ ಚಿತ್ರದ ಕಲೆಕ್ಷನ್ ರೆಕಾರ್ಡ್ ಬ್ರೇಕ್ ಮಾಡಿದ ಕಾಂತಾರ: ಪುಷ್ಪರಾಜ್ ಎದುರು ಗೆದ್ದು ಬೀಗಿದ ಡಿವೈನ್ ಸ್ಟಾರ್
ಅಲ್ಲಿಗೆ ರಿಷಭ್ ತಮ್ಮ ಮುಂದಿನ ಚಿತ್ರವನ್ನು ಕನ್ನಡದಲ್ಲೇ ಮಾಡಲಿದ್ದಾರೆ ಎಂಬ ವಿಷಯ ಸ್ಪಷ್ಟವಾಗಿದೆ. ಆದರೆ, ಆ ಚಿತ್ರ ಯಾವುದು? ಆ ಚಿತ್ರದಲ್ಲಿ ಅವರು ಬರೀ ನಟರಾಗಿರುತ್ತಾರಾ? ಅಥವಾ ನಟನೆ ಜತೆಗೆ ನಿರ್ದೇಶನವನ್ನೂ ಮಾಡುತ್ತಾರಾ? ಎಂಬ ಪ್ರಶ್ನೆಗೆ ಇನ್ನಷ್ಟೇ ಉತ್ತರ ಸಿಗಬೇಕಿದೆ.