ಮುಂಬೈ: ಸಾರಾ ಅಲಿ ಖಾನ್ ಮತ್ತು ವರುಣ್ ಧವನ್ ಅಭಿನಯದ ಹೊಸ ಚಿತ್ರ 'ಕೂಲಿ ನಂಬರ್ ಒನ್' ಚಿತ್ರವು ಇದೇ ಕ್ರಿಸ್ಮಸ್ಗೆ ಬಿಡುಗಡೆಯಾಗುವುದಕ್ಕೆ ಸಜ್ಜಾಗಿದೆ. ಈ ಮಧ್ಯೆ ವರುಣ್ ಮತ್ತು ಸಾರಾ ಚಿತ್ರದ ಪ್ರಚಾರದಲ್ಲಿ ತೊಡಗಿಸಿಕೊಂಡಿದ್ದು, ಹಾಡೊಂದರ ಚಿತ್ರೀಕರಣ ಸಂದರ್ಭದಲ್ಲಿ ನಿರ್ದೇಶಕ ಡೇವಿಡ್ ಧವನ್ ತಮ್ಮ ಮೇಲೆ ಕೂಗಾಡಿದ್ದರು ಎಂದು ಸಾರಾ ಹೇಳಿಕೊಂಡಿದ್ದರು.
ಹಿರಿಯ ನಿರ್ದೇಶಕ ಡೇವಿಡ್ ಧವನ್ ಇದುವರೆಗೂ 45 ಚಿತ್ರಗಳನ್ನು ನಿರ್ದೇಶಿಸಿದವರು. ಅದರಲ್ಲೂ ಕಾಮಿಡಿ ಚಿತ್ರಗಳೆಂದರೆ ಅವರು ಬಹಳ ಜನಪ್ರಿಯರು. ಅಂಥವರು ಸೆಟ್ನಲ್ಲಿ ಎಲ್ಲರೆದುರು ಕೂಗಾಡಿದರಾ ಎಂದು ಆಶ್ಚರ್ಯವಾಗಬಹುದು. ಆದರೆ, ಈ ವಿಷಯವನ್ನು ಸ್ವತಃ ಸಾರಾ ಹೇಳಿಕೊಂಡಿರುವುದರಿಂದ, ಇದನ್ನು ನಂಬಲೇಬೇಕು.
ವಿಷಯವೇನೆಂದರೆ, ಚಿತ್ರದಲ್ಲಿನ ಒಂದು ಹಾಡಿನ ಚಿತ್ರೀಕರಣ ನಡೆಯುತಿತ್ತಂತೆ. ಸಾಕಷ್ಟು ತಡವಾಗಿದ್ದರಿಂದ ಬೇಗಬೇಗ ಚಿತ್ರೀಕರಣ ನಡೆಸಲಾಗುತಿತ್ತಂತೆ. ಈ ಮಧ್ಯೆ, ಒಂದು ಶಾಟ್ನ ಚಿತ್ರೀಕರಣಕ್ಕೆ ಎಲ್ಲಾ ಸಿದ್ಧವಾಗಿದ್ದರೂ ಸಾರಾ ಮತ್ತು ವರುಣ್ ಮಾತ್ರ ಸಿದ್ಧವಾಗಿರಲಿಲ್ಲವಂತೆ. ಇದರಿಂದ ಸಿಟ್ಟಾದ ಡೇವಿಡ್ ಧವನ್, ಸೆಟ್ನಲ್ಲಿ ಕೂಗಾಡಿದ್ದಾರೆ. ಆದರೆ, ವರುಣ್ ಆಗ ಕಾರಾವಾನ್ನಲ್ಲಿ ಇದ್ದುದರಿಂದ, ಎಲ್ಲಾ ಸಿಟ್ಟನ್ನು ಡೇವಿಡ್ ತಮ್ಮ ಮೇಲೆ ಹೊರಹಾಕಿದರು ಎಂದು ಸಾರಾ ಹೇಳಿಕೊಂಡಿದ್ದಾರೆ.
ಇದರಿಂದ ಕೆಲಕಾಲ ಸೆಟ್ನಲ್ಲಿ ಸಾಕಷ್ಟು ಬಿಗಿಯಾದ ವಾತಾವರಣವಿತ್ತಂತೆ. ಕ್ರಮೇಣ, ಎಲ್ಲವೂ ಸರಿ ಹೋಯಿತು ಎಂದು ಸಾರಾ ಸಂದರ್ಶನದಲ್ಲಿ ನೆನಪಿಸಿಕೊಂಡಿದ್ದಾರೆ.
ಈ 'ಕೂಲಿ ನಂಬರ್ ಒನ್' ಚಿತ್ರವು 1995ರಲ್ಲಿ ಬಿಡುಗಡೆಯಾದ ಗೋವಿಂದ ಅಭಿನಯದ ಅದೇ ಹೆಸರಿನ ಚಿತ್ರದ ರೀಮೇಕ್ ಆಗಿದ್ದು, ಮೂಲ ಚಿತ್ರವನ್ನು ಸಹ ಡೇವಿಡ್ ಧವನ್ ನಿರ್ದೇಶಿಸಿದ್ದರು.