ನಿರ್ದೇಶನಕ್ಕಿಂತ, ನಟನೆಯಲ್ಲಿಯೇ ಹೆಚ್ಚು ಬಿಜಿಯಾಗಿರುವ ರಿಷಬ್, ಈಗಾಗಲೇ ನಾಲ್ಕೈದು ಸಿನಿಮಾಗಳನ್ನು ಒಪ್ಪಿಕೊಂಡು ಆ ಕೆಲಸಗಳಲ್ಲಿ ತೊಡಗಿಸಿಕೊಂಡಿದ್ದಾರೆ. ಹೀಗಿರುವಾಗಲೇ ಆ ಬತ್ತಳಿಕೆಗೆ ಮತ್ತೊಂದು ಸಿನಿಮಾ ಸೇರ್ಪಡೆಯಾಗಿದೆ. ಅದೇ, ‘ಹರಿಕಥೆ ಅಲ್ಲ ಗಿರಿಕಥೆ’! ಇದೇ ಚಿತ್ರದ ಮುಹೂರ್ತ ಇತ್ತೀಚೆಗಷ್ಟೇ ನೆರವೇರಿದ್ದು, ನಾಯಕಿ ಪಾತ್ರಕ್ಕೆ ಆಡಿಷನ್ ಏರ್ಪಡಿಸಿದ್ದಾರೆ. 18ರಿಂದ 28 ವರ್ಷದ ಒಳಗಿನವರು ಪಾಲ್ಗೊಳ್ಳಬಹುದು.
ಅಚ್ಚರಿ ವಿಚಾರ ಏನೆಂದರೆ ಈ ಸಿನಿಮಾ ನಿರ್ದೇಶನ ಮಾಡುತ್ತಿರುವ ನಿರ್ದೇಶಕರ ಹೆಸರೂ ಗಿರಿ.. ಗಿರಿಕೃಷ್ಣ. ‘ಕಿರಿಕ್ ಪಾರ್ಟಿ’ ಸಿನಿಮಾದಲ್ಲಿ ನಟಿಸಿದ್ದ ಗಿರಿಕೃಷ್ಣ, ಈ ಕಥೆ ಸಿದ್ಧಪಡಿಸಿಕೊಂಡಿದ್ದು, ಇತ್ತೀಚೆಗಷ್ಟೇ ಸರಳ ಮುಹೂರ್ತವನ್ನೂ ನೆರವೇರಿಸಿಕೊಂಡಿದ್ದಾರೆ. ಈ ಸಿನಿಮಾ ಬಗ್ಗೆ ವಿಜಯವಾಣಿ ಜತೆ ಮಾತನಾಡುವ ಗಿರಿಕೃಷ್ಣ, ‘ಇದೊಂದು ಔಟ್ ಆ್ಯಂಡ್ ಔಟ್ ಕಾಮಿಡಿ ಸಿನಿಮಾ. ರಿಷಬ್ ಅವರಿಗೆ ಈ ಪಾತ್ರ ಹೇಳಿ ಮಾಡಿಸಿದಂತಿದೆ. ‘ಕಿರಿಕ್ ಪಾರ್ಟಿ’ ಸಿನಿಮಾ ಮಾಡುವುದಕ್ಕೂ ಮುನ್ನವೇ ಈ ಕಥೆ ಹೊಳೆದಿತ್ತು. ಅದನ್ನು ರಕ್ಷಿತ್ ಮತ್ತು ರಿಷಬ್ ಇಬ್ಬರಿಗೂ ಹೇಳಿದ್ದೆ. ಅಂದಿನಿಂದ ನಡೆಯುತ್ತಲೇ ಬಂದಿತ್ತು. ಇದೀಗ ಎಲ್ಲವೂ ಮುಗಿದು ಶೂಟಿಂಗ್ಗೆ ಹೊರಡಲು ಸಿದ್ಧವಾಗಿದ್ದೇವೆ. 60 ದಿನಗಳ ಚಿತ್ರೀಕರಣ ಪ್ಲ್ಯಾನ್ ಇದೆ. ಬಹುತೇಕ ಬೆಂಗಳೂರಿನಲ್ಲಿಯೇ ನಡೆಯಲಿದೆ’ ಎನ್ನುತ್ತಾರೆ.
ಇದನ್ನೂ ಓದಿ: ರಚಿತಾಗೆ ರಿಸ್ಕೇ ಜೀವನ!
ಅದೇ ರೀತಿ, ಚಿತ್ರದ ನಾಯಕ ರಿಷಬ್ ಶೆಟ್ಟಿ ಸಹ ಸಿನಿಮಾದ ಕಥೆ ಬಗ್ಗೆ ತುಂಬ ಎಗ್ಸೈಟ್ ಆಗಿದ್ದಾರೆ. ‘‘ಕಿರಿಕ್ ಪಾರ್ಟಿ’ ಶೂಟಿಂಗ್ ಸೆಟ್ನಲ್ಲೇ ಗಿರಿ ಈ ಕಥೆ ಹೇಳಿದ್ದ. ಆ ಕಥೆ ಇದೀಗ ಸಿನಿಮಾ ಹಂತಕ್ಕೆ ಬಂದಿದ್ದು, ಪೂರ್ಣ ಪ್ರಮಾಣದ ಕಾಮಿಡಿ ಸಿನಿಮಾ ಇದು. ಕಥೆ ಮಜವಾಗಿದೆ’ ಎಂಬುದು ರಿಷಬ್ ಮಾತು.
ಇನ್ನು ಸಂದೇಶ್ ಪ್ರೊಡಕ್ಷನ್ಸ್ ಮತ್ತು ರಿಷಬ್ ಶೆಟ್ಟಿ ಫಿಲಂಸ್ ಸಹಭಾಗಿತ್ವದಲ್ಲಿ ಈ ಸಿನಿಮಾ ನಿರ್ಮಾಣವಾಗಲಿದ್ದು, ಎಂದಿನಂತೆ ಅಜನೀಶ್ ಲೋಕನಾಥ್ ಸಂಗೀತ, ‘ಕಥಾಸಂಗಮ’ ಖ್ಯಾತಿಯ ಛಾಯಾಗ್ರಾಹಕ ರಂಗನಾಥ್, ಸಿ.ಎಂ ಇಲ್ಲಿಯೂ ಕ್ಯಾಮರಾ ಕೈ ಚಳಕ ತೋರಿಸಲಿದ್ದಾರೆ. ಇನ್ನುಳಿದ ತಾರಾಬಳಗದ ಆಯ್ಕೆ ಪ್ರಕ್ರಿಯೆಯೂ ನಡೆಯುತ್ತಿದ್ದು, ಶೀಘ್ರದಲ್ಲಿ ಶೂಟಿಂಗ್ ಸಹ ಶುರುವಾಗಲಿದೆ.