ಬಾಲಿವುಡ್ನಲ್ಲಿ ತಲೈವಿ ಸಿನಿಮಾ ಸಿದ್ಧವಾಗುತ್ತಿದೆ. ಕಂಗನಾ ರಣಾವತ್ ತಮಿಳುನಾಡಿನ ಮಾಜಿ ಮುಖ್ಯಮಂತ್ರಿ ಜೆ ಜಯಲಲಿತಾ ಪಾತ್ರವನ್ನು ನಿಭಾಯಿಸುತ್ತಿದ್ದಾರೆ. ಈಗಾಗಲೇ ಫಸ್ಟ್ ಲುಕ್ ಮೂಲಕವೇ ಸದ್ದು ಮಾಡಿದ್ದ ಈ ಸಿನಿಮಾ ಪಾತ್ರವರ್ಗದ ವಿಚಾರವಾಗಿಯೂ ಸುದ್ದಿಯಲ್ಲಿತ್ತು. ಘಟಾನುಘಟಿ ಕಲಾವಿದರು ಈ ‘ತಲೈವಿ’ ಸಿನಿಮಾದಲ್ಲಿ ನಟಿಸಲಿದ್ದಾರೆ ಎಂದೇ ಹೇಳಲಾಗಿತ್ತು. ಅದರಂತೆ ಇದೀಗ ಚಿತ್ರದಲ್ಲಿ ಮುಖ್ಯಪಾತ್ರವೊಂದಕ್ಕೆ ಬಣ್ಣ ಹಚ್ಚಿರುವ ಭಾಗ್ಯಶ್ರೀ ಪಾತ್ರ ರಿವೀಲ್ ಆಗಿದೆ.
ಹೌದು ಈಗಾಗಲೇ ಕನ್ನಡದಲ್ಲಿ ಸೀತಾರಾಮ ಕಲ್ಯಾಣ ಸಿನಿಮಾದಲ್ಲಿ ಬಣ್ಣ ಹಚ್ಚಿದ್ದ ಭಾಗ್ಯಶ್ರೀ, ಹಿಂದಿಯಲ್ಲಿ ತೆರೆಕಂಡಿದ್ದ 2 ಸ್ಟೇಟ್ಸ್ ತೆಲುಗು ರಿಮೇಕ್ನಲ್ಲಿಯೂ ನಟಿಸುತ್ತಿದ್ದಾರೆ. ಇದರ ಜತೆಗೆ ಪ್ರಭಾಸ್ ನಟನೆಯ ರಾಧೆ ಶ್ಯಾಮ್ ಚಿತ್ರದಲ್ಲಿಯೂ ಪ್ರಮುಖ ಪಾತ್ರಕ್ಕೆ ಭಾಗ್ಯಶ್ರೀ ಜೀವ ತುಂಬಲಿದ್ದಾರೆ. ಹೀಗಿರುವಾಗಲೇ ತಲೈವಿ ಚಿತ್ರದಲ್ಲಿಯೂ ಭಾಗ್ಯಶ್ರೀ ನಟಿಸುತ್ತಿದ್ದು, ಅವರ ಪಾತ್ರ ರಿವೀಲ್ ಆಗಿದೆ.
ಇದನ್ನೂ ಓದಿ: ಮೇಕಪ್ ಮ್ಯಾನ್ ಸಾವಿಗೆ ದರ್ಶನ್ ಕಂಬನಿ
ಜಯಲಲಿತಾ ಪಾತ್ರದಲ್ಲಿ ಕಂಗನಾ ರಣಾವತ್ ಕಾಣಿಸಿಕೊಂಡರೆ, ಜಯಲಲಿತಾ ತಾಯಿ ಪಾತ್ರವನ್ನು ಭಾಗ್ಯಶ್ರೀ ನಿಭಾಯಿಸಲಿದ್ದಾರಂತೆ. ಜಯಲಲಿತಾ ಜೀವನದಲ್ಲಿ ಅವರ ತಾಯಿಯ ಪಾತ್ರ ದೊಡ್ಡದಿದೆ. ಅಷ್ಟೇ ಭಾವನಾತ್ಮಕವಾಗಿಯೂ ಕಾಡಲಿದೆಯಂತೆ. ಹಾಗಾಗಿ ಆ ಪಾತ್ರವನ್ನು ಭಾಗ್ಯಶ್ರೀ ಕಡೆಯಿಂದ ಮಾಡಿಸುವ ಲೆಕ್ಕಾಚಾರ ನಿರ್ದೇಶಕರದಾಗಿತ್ತು. ಅದರಂತೆ ಕಥೆ ಕೇಳಿ ಒಂದೇ ಮಾತಿಗೆ ನಟಿಸುವ ಬಗ್ಗೆ ಒಪ್ಪಿಗೆ ಸೂಚಿಸಿದ್ದರು ಭಾಗ್ಯಶ್ರೀ.
ಸದ್ಯ ಲಾಕ್ಡೌನ್ ಹಿನ್ನೆಲೆಯಲ್ಲಿ ಸಿನಿಮಾ ಶೂಟಿಂಗ್ ಸ್ಥಗಿತಗೊಂಡಿದ್ದರಿಂದ, ಸೆಪ್ಟಂಬರ್ ವೇಳೆಗೆ ಚಿತ್ರೀಕರಣಕ್ಕೆ ಚಾಲನೆ ನೀಡುವ ಸಾಧ್ಯತೆ ಇದೆಯಂತೆ. ಎ.ಎಲ್ ವಿಜಯ್ ನಿರ್ದೇಶನದ ಈ ಚಿತ್ರದಲ್ಲಿ ಅರವಿಂದ್ ಸ್ವಾಮಿ, ಪ್ರಕಾಶ್ ರಾಜ್ ಸೇರಿ ಹಲವು ಘಟಾನುಘಟಿ ಕಲಾವಿದರ ದಂಡೇ ಇದೆ. (ಏಜೆನ್ಸೀಸ್)