'1980', 'ಡಿಯರ್ ಲವ್' ಸೇರಿ ಇದೀಗ ಗೋಲ್ಡನ್ ಸ್ಟಾರ್ ಗಣೇಶ್ ನಾಯಕನಾಗಿರುವ 'ಕೃಷ್ಣಂ ಪ್ರಣಯ ಸಖಿ' ಚಿತ್ರದಲ್ಲಿ ನಟಿಸುತ್ತಿರುವ ಶರಣ್ಯಾ ಶೆಟ್ಟಿ ನವರಾತ್ರಿ ಹಬ್ಬದ ಸಂಭ್ರಮದಲ್ಲಿದ್ದಾರೆ. ದಸರಾ ಸಡಗರದ ಬಗ್ಗೆ ಅವರು, 'ಪ್ರತಿ ವರ್ಷ ನವರಾತ್ರಿ ಹಬ್ಬ ನಮಗೆ ತುಂಬ ಸ್ಪೆಷಲ್. ಏಕೆಂದರೆ ಒಂಬತ್ತು ದಿನಗಳ ಕಾಲ ಪ್ರತಿದಿನ ದೇವಸ್ಥಾನಕ್ಕೆ ಹೋಗುತ್ತೇನೆ. ಮನೆಯಲ್ಲಿ ಕಳಶ ಕೂರಿಸಿ, ಪ್ರತಿದಿನ ಪೂಜೆ ಮಾಡಿ, ದೇವಿ ಮಹಾತ್ಮೆಯ ಒಂದೊಂದು ಪಾಠ ಓದುತ್ತೇನೆ. ಒಂಬತ್ತು ದಿನವೂ ಒಂದೊಂದು ವಿಶೇಷತೆ ಇರುತ್ತದೆ. ಕೊನೆಯ ಒಂಬತ್ತನೇ ದಿನ ಕುಟುಂಬದವರೆಲ್ಲರೂ ಸೇರಿ ಪೂಜೆ ಮಾಡಿ, ಸಿಹಿ ಅಡುಗೆ ಮಾಡಿ ತಿಂದು ಸಂಭ್ರಮಿಸುತ್ತೇವೆ' ಎಂದು ಹೇಳಿಕೊಳ್ಳುತ್ತಾರೆ.
