ನದಿ ತೀರಗಳಲ್ಲಿ ಜನರು ತೆರಳಲು ನಿಷೇಧಾಜ್ಞೆ ಹೊರಡಿಸಿ ತಡೆ ನೀಡಿದ ಕ್ರಮವೇ ಕೆಲವರಿಗೆ ವರದಾನವಾಗಿದೆ. ಧಾರ್ಮಿಕ ಕಾರ್ಯಗಳನ್ನು ನೆರವೇರಿಸಲು ಮೇಲಿಂದ ಮೇಲೆ ಆಗಮಿಸುವವರಿಗೆ ಒಳಬಿಡಲು ಕೆಲವರು ವಾಮ ಮಾರ್ಗವನ್ನು ಬಳಸಿಕೊಂಡಿದ್ದಾರೆ. ಕಾರೊಂದರ ಪ್ರವೇಶಕ್ಕೆ 100 ರೂ., ಟಿಟಿ ವಾಹನಕ್ಕೆ 200 ರೂ. ಪಡೆದು ಕೆಲಗಂಟೆಗಳಲ್ಲೇ ವಾಪಸ್ ಬರಬೇಕೆಂಬ ತಾಕೀತು ಮಾಡಿ ಕಳುಹಿಸಲಾಗುತ್ತಿದೆ. ಇದರೊಂದಿಗೆ ತಾಲೂಕು ಆಡಳಿತ ದಾಳಿ ಮಾಡುವ ಸೂಚನೆ ನೀಡುವುದರ ಜತೆಗೆ ಅಸ್ಥಿ ವಿಸರ್ಜನೆ, ನಾರಾಯಣ ಬಲಿ, ಹೋಮ ಹವನಗಳು ಸೇರಿದಂತೆ ವಿವಿಧ ಪೂಜೆಗಳಿಗೆ ಆಗಮಿಸಿದ ಜನರಿಗೆ ವಾಹನ ಪಾರ್ಕಿಂಗ್, ಊಟಉಪಚಾರ ಸೇರಿದಂತೆ ತಲಾ 30 ರಿಂದ 35 ಸಾವಿರ ರೂ.ಗಳನ್ನು ಪಡೆಯಲಾಗುತ್ತಿದೆ ಎಂಬ ಆರೋಪ ದಟ್ಟವಾಗಿದೆ. ದಂಧೆಗಾಗಿ ಕೃಷಿ ಭೂಮಿಗಳಲ್ಲಿ ಅಕ್ರಮ ಶೆಡ್ ಹಾಗೂ ವಾಣಿಜ್ಯ ಕಟ್ಟಡಗಳ ನಿರ್ಮಾಣ ಮಾಡಿಕೊಳ್ಳಲಾಗಿದೆ. ತಾಲೂಕು ಆಡಳಿತ ಕೂಡಲೇ ಎಚ್ಚೆತ್ತುಕೊಂಡು ಇದರ ವಿರುದ್ಧ ಕ್ರಮ ವಹಿಸಬೇಕಿದೆ.
