ಸಿಗರೇಟ್ ವಿತರಕನ ಕಾರು ಅಡ್ಡಗಟ್ಟಿ 45 ಲಕ್ಷ ರೂಪಾಯಿ ದರೋಡೆ

ಬೆಂಗಳೂರು: ವ್ಯಾಪಾರಿಗಳಿಂದ ಹಣ ಸಂಗ್ರಹಿಸಿ ಕಾರಿನಲ್ಲಿ ತೆರಳುತ್ತಿದ್ದ ಸಿಗರೇಟ್ ವಿತರಕನನ್ನು ಅಡ್ಡಗಟ್ಟಿರುವ ದುಷ್ಕರ್ವಿುಗಳು 45.5 ಲಕ್ಷ ರೂ. ದರೋಡೆ ಮಾಡಿದ್ದಾರೆ. ಐಟಿಸಿ ಕಂಪನಿ ವಿತರಕ ವಿಜಯನಗರ ನಿವಾಸಿ ರಾಕೇಶ್ ಪೊಕರಾನಾ ದರೋಡೆಗೆ ಒಳಗಾದವರು.

ರಾಜಸ್ಥಾನ ಮೂಲದ ರಾಕೇಶ್ ಬಳಿ 100ಕ್ಕೂ ಹೆಚ್ಚು ಮಂದಿ ಕೆಲಸಗಾರರಿದ್ದಾರೆ. ಕಂಪನಿಯಿಂದ ಮಾಲ್, ಚಿಲ್ಲರೆ ಅಂಗಡಿಗಳಿಗೆ ಸಿಗರೇಟ್ ಸರಬರಾಜು ಮಾಡಲಾಗುತ್ತದೆ. ಜೂ.11ರ ಸಂಜೆ 6 ಗಂಟೆಯಲ್ಲಿ ಸೇಲ್ಸ್​ಮ್ಯಾನ್​ಗಳು ವ್ಯಾಪಾರಿಗಳಿಂದ ಸಂಗ್ರಹಿಸಿ ಕೊಟ್ಟಿದ್ದ ಹಣವನ್ನು ಬಿಸ್ಕೆಟ್ ಡಬ್ಬಿಯಲ್ಲಿಟ್ಟುಕೊಂಡು ಕಾರಿನಲ್ಲಿ ಮನೆಗೆ ತೆರಳುತ್ತಿದ್ದರು. ಹಣವಿದ್ದ ಡಬ್ಬಿಯನ್ನು ಚಾಲಕನ ಪಕ್ಕದಲ್ಲಿರುವ ಸೀಟಿನಲ್ಲಿಟ್ಟು, ರಾಕೇಶ್ ಹಿಂದಿನ ಸೀಟಿನಲ್ಲಿ ಕುಳಿತಿದ್ದರು.

ಇದನ್ನೂ ಓದಿ: ಐಒಸಿಎಲ್ ಸಹಾಯವಾಣಿ ಹೆಸರಿನಲ್ಲಿ 6.75 ಲಕ್ಷ ರೂಪಾಯಿ ದೋಚಿದ್ರು!

ಬೈಕ್​ನಿಂದ ಡಿಕ್ಕಿ ಹೊಡೆದು ಕೃತ್ಯ: ಫ್ರೇಜರ್​ಟೌನ್ ಖಾಸಗಿ ಶಾಲೆಯೊಂದರ ರಸ್ತೆಯಲ್ಲಿ ಬರುವಾಗ ಮಾರ್ಗಮಧ್ಯೆ ಬೈಕ್​ನಲ್ಲಿ ದುಷ್ಕರ್ವಿುಗಳು ರಾಕೇಶ್ ಕಾರನ್ನು ಹಿಂಬಾಲಿಸಿದ್ದಾರೆ. ಬೈಕ್ ಸವಾರ ಕಾರಿನ ಹಿಂಬದಿಗೆ ಡಿಕ್ಕಿ ಹೊಡೆದು ಬಳಿಕ ವೇಗವಾಗಿ ಬೈಕ್ ಚಲಾಯಿಸಿ ಕಾರು ಅಡ್ಡಗಟ್ಟಿದ್ದ. ಚಾಲಕ ಕೆಳಗೆ ಇಳಿದು ಬೈಕ್ ಸವಾರನನ್ನು ಪ್ರಶ್ನಿಸಲು ಹೋದಾಗ ಮತ್ತೊಬ್ಬ ಕಾರಿನ ಡೋರ್ ತೆಗೆದು ಹಣವಿದ್ದ ಬಾಕ್ಸ್ ಎತ್ತಿಕೊಳ್ಳಲು ಯತ್ನಿಸಿದ್ದ. ಆತನನ್ನು ತಡೆಯಲು ರಾಕೇಶ್ ಮುಂದಾದಾಗ ಇನ್ನಿಬ್ಬರು ದುಷ್ಕರ್ವಿುಗಳು ಬಂದು ಚಾಕು ತೋರಿಸಿ ಬೆದರಿಸಿ ಹಣವಿದ್ದ ಬಾಕ್ಸ್ ದೋಚಿ ಪರಾರಿಯಾಗಿದ್ದಾರೆ ಎಂದು ಪುಲಕೇಶಿನಗರ ಪೊಲೀಸರು ತಿಳಿಸಿದ್ದಾರೆ.

https://www.vijayavani.net/facebook-friend-cheated-advocate/