ಕದ್ದ ಹಣದಿಂದಲೇ ಖರೀದಿಸಿದ್ದ ಖಾಸಗಿ ವಿಮಾನ; ಸೈಬರ್​ ಫ್ರಾಡ್​ನಲ್ಲಿ ಈತನನ್ನು ಮೀರಿಸೋರೆ ಇಲ್ಲ...!

ನ್ಯೂಯಾರ್ಕ್​​: ಮೇಲಿನ ಚಿತ್ರ ನೋಡಿದಾಗ ಈತ ಕೋಟ್ಯಧಿಪತಿಯೇ ಇರಬೇಕು ಎನ್ನಿಸೋದಂತೂ ಸತ್ಯ. ಅದು ನಿಜ ಕೂಡ. ನೂರಾರು ಕೋಟಿ ರೂ. ಮೌಲ್ಯದ ಖಾಸಗಿ ವಿಮಾನ, ಹತ್ತಾರು ಕೋಟಿ ರೂ. ಮೌಲ್ಯದ ಹತ್ತಾರು ಕಾರುಗಳು, ಲಕ್ಷಾಂತರ ಮೌಲ್ಯದ ಡಿಸೈನರ್​ ಉಡುಪುಗಳು, ಐಷಾರಾಮದ ಜೀವನಶೈಲಿ...

ಈತನ ಹೆಸರು ರೇಮಂಡ್​ ಅಬ್ಬಾಸ್​ ಬ್ರಿಟನ್​ನಲ್ಲಿ ಹುಷ್​ಪಪ್ಪಿ ಎಂದು ಖ್ಯಾತನಾಗಿದ್ದ. ಐಷಾರಾಮಿ ಜೀವನಶೈಲಿಯಿಂದಾಗಿ ಇನ್​ಸ್ಟಾಗ್ರಾಮ್​ನಲ್ಲಿ ಈತನಿಗೆ 24 ಲಕ್ಷ ಫಾಲೋವರ್​ಗಳಿದ್ದಾರೆ.

ಇದನ್ನೂ ಓದಿ; ಪೊಲೀಸರ ಕೊಂದ ಗ್ಯಾಂಗ್​ಸ್ಟರ್​ ಮನೆ ಅವಶೇಷಗಳಡಿ ಸಿಕ್ಕ ಬಾಂಬ್​ಗಳು; ಕಾನ್ಪುರದಿಂದಲೇ ಮನೆ ಮೇಲೆ ವಿಡಿಯೋ ಕಣ್ಗಾವಲು

ಈತ ನೈಜೀರಿಯಾದ ಬಡ ಕುಟುಂಬಕ್ಕೆ ಸೇರಿದವನು. ಶೂ ಕೊಡಿಸಲು ಕೂಡ ತನ್ನ ಕುಟುಂಬಕ್ಕೆ ಸಾಧ್ಯವಿರಲಿಲ್ಲ ಎಂದು ಅಬ್ಬಾಸ್​ ಹೇಳಿಕೊಳ್ಳುತ್ತಾನೆ. ಆರಂಭದಲ್ಲಿ ಲಾಗೋಸ್​ ಹಳೆಯ ಬಟ್ಟೆಗಳ ವ್ಯಾಪಾರ ಮಾಡುತ್ತಿದ್ದ. ಬಳಿಕ ದುಬೈಗೆ ತೆರಳಿ ತನ್ನನ್ನು ತಾನು ಪ್ರಾಪರ್ಟಿ ಡೆವಲಪರ್​ ಎಂದು ಬಿಂಬಿಸಿಕೊಂಡಿದ್ದ.

ಇಷ್ಟಕ್ಕೂ ಐಷಾರಾಮ ಜೀವನಕ್ಕೆ ಈತ ಹಣ ಹೊಂದಿಸಿಕೊಳ್ಳುತ್ತಿದ್ದ ಗೊತ್ತೆ? ಸೈಬರ್​ ಕ್ರೈಮ್​ ಮೂಲಕ. ಬ್ರಿಟನ್ನಿನ ಸಾವಿರಾರು ಜನರು ಸೇರಿ ವಿಶ್ವದ ವಿವಿಧೆಡೆಯಲ್ಲಿರುವ ಲಕ್ಷಾಂತರ ಜನರು ಈತನಿಂದ ವಂಚನೆಗೆ ಒಳಗಾಗಿದ್ದಾರೆ. 19 ಲಕ್ಷಕ್ಕೂ ಅಧಿಕ ಈ-ಮೇಲ್​, ಬ್ಯಾಂಕ್​ ಖಾತೆಗಳ ವಿವರ ಈತನ ಬಳಿಯಿತ್ತು ಎಂದರೆ ಈತ ಅದೆಂಥ ಸೈಬರ್​ ವಂಚಕನಿರಬೇಕು ಎಂಬುದನ್ನು ನೀವೇ ಲೆಕ್ಕ ಹಾಕಿ.

ದುಬೈನಲ್ಲಿ ಈತನಿದ್ದ ಅಪಾರ್ಟ್​ಮೆಂಟ್​ನಲ್ಲಿ 280 ಕೋಟಿ ರೂ. ನಗದನ್ನು ಅಮೆರಿಕ ಪೊಲೀಸರು ವಶಪಡಿಸಿಕೊಂಡಿದ್ದಾರೆ. ಜತೆಗೆ 50 ಕೋಟಿ ರೂ. ಮೌಲ್ಯದ 13 ಐಷಾರಾಮಿ ಕಾರುಗಳನ್ನು ಜಪ್ತಿ ಮಾಡಿದ್ದಾರೆ.

ಇದನ್ನೂ ಓದಿ; ಮದುವೆಯಾಗದೇ ಹುಟ್ಟಿದ ಮಗುವನ್ನು ಮಾರಿದರು; ಪೋಷಕರು ಬೇಡ ಎಂದು ಮರಳಿಸಿದ್ದಕ್ಕೆ ಕೊಂದರು 

ಈತನ ಬಳಿ 21 ಲ್ಯಾಪ್​ಟಾಪ್​ಗಳು, 47 ಸ್ಮಾರ್ಟ್​ಫೋನ್​ಗಳು, 15 ಮೆಮೊರಿ ಸ್ಟಿಕ್, 5 ಹಾರ್ಡ್​ಡಿಸ್ಕ್​, ಪೆನ್​ಡ್ರೈವ್​ಗಳು ಸಿಕ್ಕಿವೆ.

ಖ್ಯಾತ ಕಂಪನಿಗಳ ಹೆಸರಿನಲ್ಲಿ ನಕಲಿ ವೆಬ್​ಸೈಟ್​ಗಳನ್ನು ಸೃಷ್ಟಿಸುತ್ತಿದ್ದ ಈತ ಹಾಗೂ ಈತನ ತಂಡ ಜನರ ಕ್ರೆಡಿಟ್​ ಕಾರ್ಡ್​ ಹಾಗೂ ಬ್ಯಾಂಕ್​ ಖಾತೆಗಳಿಂದ ಹಣವನ್ನು ವರ್ಗಾಯಿಸಿಕೊಳ್ಳುತ್ತಿತ್ತು. ಈ ಸೈಬರ್​ ವಂಚನೆಯ ಮೊತ್ತ 3,300 ಕೋಟಿ ರೂ. ಗಳಿಗೂ ಹೆಚ್ಚು ಎಂದು ಅಂದಾಜಿಸಲಾಗಿದೆ. ಸದ್ಯ ಈತನನ್ನು ಅಮೆರಿಕಕ್ಕೆ ಹಸ್ತಾಂತರಿಸಲಾಗಿದ್ದು, ಅಪರಾಧ ಸಾಬೀತಾದಲ್ಲಿ 20 ವರ್ಷಗಳ ಶಿಕ್ಷೆಗೆ ಗುರಿಯಾಗಲಿದ್ದಾನೆ ಎಂದು ಪೊಲೀಸರು ಹೇಳಿದ್ದಾರೆ.

https://www.vijayavani.net/the-first-person-in-clinical-trial-for-covid-19-vaccine/