ಡೆಡ್ಲಿ ಶೂಟ್​ಔಟ್​ಗೆ 16 ಜನ ಬಲಿ: 30 ವರ್ಷಗಳ ಅವಧಿಯಲ್ಲೇ ಅತಿ ಭೀಕರ ಹತ್ಯಾಕಾಂಡ

ಒಟ್ಟಾವಾ: ಕೆನಡಾದಲ್ಲಿ ಕಳೆದ ಮೂವತ್ತು ವರ್ಷಗಳ ಇತಿಹಾಸದಲ್ಲೇ ಅತಿ ಭೀಕರವಾದ ಶೂಟೌಟ್​ ಭಾನುವಾರ ನಡೆದಿದ್ದು, 16 ಜನ ಅದಕ್ಕೆ ಬಲಿಯಾಗಿದ್ದಾರೆ. ಕೆನಡಾದ ನೋವಾ ಸ್ಕೋಟಿಯಾ ಪ್ರಾಂತ್ಯದಲ್ಲಿ ವ್ಯಕ್ತಿಯೊಬ್ಬ ನಡೆಸಿದ ಶೂಟ್​ಔಟ್ ಇದಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಪೊಲೀಸ್ ಅಧಿಕಾರಿ ರೀತಿಯಲ್ಲಿ ನೋವಾ ಸ್ಕೋಟಿಯಾ ಪ್ರಾಂತ್ಯದ ಹಾಲಿಫ್ಯಾಕ್ಸ್​ ನ ಉತ್ತರಕ್ಕೆ 60 ಮೈಲಿ ದೂರದ ಪೋರ್ಟಾಪಿಕ್​ ಎಂಬ ಪುಟ್ಟ ಗ್ರಾಮೀಣ ಪಟ್ಟಣದಲ್ಲಿ ದುಷ್ಕರ್ಮಿ ಭಾನುವಾರ ತಡರಾತ್ರಿ ಈ ಕೃತ್ಯವೆಸಗಿದ್ದಾನೆ. ಅಲ್ಲಿನ ಮನೆಯೊಂದರ ಹೊರಗೆ ಅನೇಕ ಶವಗಳು ಸಿಕ್ಕಿವೆ. ಆ ದುಷ್ಕರ್ಮಿಯನ್ನು ಶರಣಾಗಿಸುವ ಪ್ರಯತ್ನದಲ್ಲಿ ವಿಫಲರಾದ ಪೊಲೀಸರು ಆತನನ್ನು ಕೂಡ ಹತ್ಯೆಗೈದಿದ್ದಾರೆ.

ದುಷ್ಕರ್ಮಿಯನ್ನು ಗೇಬ್ರಿಯಲ್ ವೋರ್ಟ್​ಮನ್ (51) ಎಂದು ಪೊಲೀಸರು ಗುರುತಿಸಿದ್ದಾರೆ. ಆತ ಪೋರ್ಟಾಪಿಕ್​​ನಲ್ಲಿ ತಾತ್ಕಾಲಿಕವಾಗಿ ನೆಲೆಸಿದ್ದ. ಪೊಲೀಸರಂತೆ ವೇಷ ಧರಿಸಿದ್ದಲ್ಲದೆ, ಕಾರನ್ನು ಕೂಡ ರಾಯಲ್ ಕೆನಡಿಯನ್ ಮೌಂಟೆಡ್​ ಪೊಲೀಸ್ ಕ್ರೂಸರ್ ತರ ಬದಲಾಯಿಸಿಕೊಂಡಿದ್ದ. ಬಹುಶಃ ಈತ ಮೊದಲ ತನ್ನ ಹಿಟ್​ಲಿಸ್ಟ್​ನಲ್ಲಿದ್ದವರನ್ನು ಹತ್ಯೆ ಮಾಡಿ ಬಳಿಕ ಒಟ್ಟಾರೆ ಶೂಟ್ಔಟ್ ಮಾಡಿದ್ದಾನೆಂದು ಪೊಲೀಸರು ಶಂಕಿಸಿದ್ದಾರೆ.

ಆರಂಭದಲ್ಲಿ ಪೊಲೀಸರು ವೋರ್ಟ್​ಮನ್​ನನ್ನು ಬಂಧಿಸಿರುವುದಾಗಿ ಘೋಷಿಸಿದರಾದರೂ, ತರುವಾಯ ಆತ ಮೃತಪಟ್ಟ ವಿಷಯವನ್ನು ಬಹಿರಂಗಪಡಿಸಿದ್ದಾರೆ. ಆದರೆ, ಆತ ಹೇಗೆ ಸತ್ತ ಎಂಬುದರ ಕುರಿತಾಗಲೀ, ತಮ್ಮ ಹೇಳಿಕೆಯ ಕುರಿತಾಗಲೀ ವಿವರಣೆಯನ್ನು ನೀಡಿಲ್ಲ ಎಂದು ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿವೆ. (ಏಜೆನ್ಸೀಸ್)

https://www.vijayavani.net/professor-luc-montagnier-who-won-nobel-prize-for-codiscovering-aids-virus-says-coronavirus-was-man-made-in-wuhan-lab/