'13' ಎಂಬ ಟೈಟಲ್ ಕೇಳಿದಾಗ ಇದೇನಿರಬಹುದು ಎಂಬ ಪ್ರಶ್ನೆ ರಾಘವೇಂದ್ರ ರಾಜಕುಮಾರ್ ಅವರಿಗೆ ಮೂಡಿತ್ತಂತೆ. ಆದರೆ, ಕಥೆಗೆ ಶೀರ್ಷಿಕೆಯು ಪೂರಕವಾಗಿದೆ ಎನ್ನುತ್ತಾರೆ. ಇನ್ನು, ಚಿತ್ರದ ಹೆಸರು ನೆಗೆಟಿವ್ ಆದರೂ, ಸಿನಿಮಾ ಪೂರ್ತಿ ಪಾಸಿಟಿವ್ ಆಗಿದೆ ಎನ್ನುತ್ತಾರೆ ಶ್ರುತಿ. ಇದೇ ಮೊದಲ ಬಾರಿಗೆ ಅವರು ಮುಸ್ಲಿಂ ಹೆಣ್ಣು ಮಗಳ ಪಾತ್ರ ಮಾಡಿದ್ದಾರಂತೆ. ನಿರ್ದೇಶಕರು ಈ ಪಾತ್ರದ ಬಗ್ಗೆ ಹೇಳಿದಾಗ ತುಂಬಾ ಹೆದರಿದ್ದರಂತೆ ಶ್ರುತಿ. 'ನಾನು ಮಾಡುವ ಪಾತ್ರ ಯಾರಿಗೂ ನೋವುಂಟು ಮಾಡಬಾರದು ಎಂಬುದು ನನ್ನ ಉದ್ದೇಶ. ಸ್ವಲ್ಪ ಲೋಪದೋಷ ಆದರೂ ತಂಡಕ್ಕೆ ಅಲ್ಲದೆ ವೈಯಕ್ತಿಕವಾಗಿ ನಮಗೂ ತೊಂದರೆ ಆಗುತ್ತದೆ. ಆದರೆ, ನನ್ನ ಪಾತ್ರವನ್ನು ಬಹಳ ಸೂಕ್ಷ್ಮವಾಗಿ ಸೆರೆಹಿಡಿಯಲಾಗಿದೆ' ಎನ್ನುತ್ತಾರೆ ಶ್ರುತಿ.
