VIDEO | ಆರ್​ಸಿಬಿ ಕ್ವಾರಂಟೈನ್​ನಿಂದ ತಪ್ಪಿಸಿಕೊಳ್ಳಲು ಯತ್ನಿಸಿದ ಚಾಹಲ್​!

ಬೆಂಗಳೂರು: ಇತ್ತೀಚೆಗಷ್ಟೇ ಕೋರಿಯೋಗ್ರಾಫರ್​ ಧನಶ್ರೀ ಜತೆಗೆ ನಿಶ್ಚಿತಾರ್ಥ ಮಾಡಿಕೊಂಡು ಐಪಿಎಲ್​ನಲ್ಲಿ ಆಡಲು ಸಜ್ಜಾಗುತ್ತಿರುವ ಸ್ಪಿನ್ನರ್​ ಯಜುವೇಂದ್ರ ಚಾಹಲ್​, ಆರ್​ಸಿಬಿ ತಂಡವನ್ನು ಕೂಡಿಕೊಂಡು ಬೆಂಗಳೂರಿನಲ್ಲಿ ಕ್ವಾರಂಟೈನ್​ಗೆ ಒಳಪಟ್ಟಿದ್ದಾರೆ. ಈ ನಡುವೆ ಕ್ವಾರಂಟೈನ್​ನಿಂದ ತಪ್ಪಿಸಿಕೊಳ್ಳಲು ಯತ್ನಿಸುವ ಮೂಲಕ ಚಾಹಲ್​ ಸುದ್ದಿಯಾಗಿದ್ದಾರೆ. ಆದರೆ ಇದೊಂದು ತಮಾಷೆಯ ಪ್ರಸಂಗವಾಗಿದೆ ಎಂಬುದು ಗಮನಾರ್ಹ.

ಲಾಕ್​ಡೌನ್​ ಸಮಯದಲ್ಲಿ ಸಾಮಾಜಿಕ ಜಾಲತಾಣಗಳಲ್ಲಿ ಸಾಕಷ್ಟು ತಮಾಷೆಯ ಪೋಸ್ಟ್​ಗಳ ಮೂಲಕ ಸುದ್ದಿಯಲ್ಲಿದ್ದ ಚಾಹಲ್​ ಅವರು ಇದ್ದಲ್ಲಿ ನಗುವಿಗೆ ಯಾವುದೇ ಕೊರತೆ ಇರುವುದಿಲ್ಲ ಎಂಬುದು ಮತ್ತೊಮ್ಮೆ ಸಾಬೀತಾಗಿದೆ. ಯುಎಇಗೆ ಪ್ರಯಾಣ ಬೆಳೆಸುವುದಕ್ಕೆ ಪೂರ್ವಭಾವಿಯಾಗಿ ಆರ್​ಸಿಬಿ ತಂಡ ಬೆಂಗಳೂರಿನಲ್ಲಿ ಹೋಟೆಲ್​ ಕ್ವಾರಂಟೈನ್​ಗೆ ಒಳಪಟ್ಟಿದೆ. ಈ ವೇಳೆ ಚಾಹಲ್​ ಹೋಟೆಲ್​ ಕೋಣೆಯಿಂದ ಹೊರಹೋಗಲು ತಮಗೆ ಅವಕಾಶ ನೀಡುವಂತೆ ಕೇಳಿಕೊಳ್ಳುತ್ತಿರುವ ಮತ್ತು ಕ್ವಾರಂಟೈನ್​ನಿಂದ ತಪ್ಪಿಸಿಕೊಳ್ಳಲು ಯತ್ನಿಸುವ ರೀತಿಯ ತಮಾಷೆಯ ವಿಡಿಯೋದ ಮೂಲಕ ಗಮನಸೆಳೆದಿದ್ದಾರೆ.

ಇದನ್ನೂ ಓದಿ: ಟೀಮ್​ ಇಂಡಿಯಾಗಿಂತ ಸಿಎಸ್​ಕೆ ಪರ ರೈನಾ ಹೆಚ್ಚು ಮಿಂಚಿರುವುದೇಕೆ? ಕಾರಣ ನೀಡಿದ ದ್ರಾವಿಡ್​!

ಚಾಹಲ್​ ಅವರ ಈ ತುಂಟಾಟದ ವಿಡಿಯೋವನ್ನು ಆರ್​ಸಿಬಿ ಫ್ರಾಂಚೈಸಿ ತನ್ನ ಟ್ವಿಟರ್​ ಪುಟದಲ್ಲಿ ಪ್ರಕಟಿಸಿದೆ. ಕ್ವಾರಂಟೈನ್​ ಮುಗಿಯಲು ತನಗೆ ಇನ್ನೂ 4 ದಿನಗಳಿವೆ ಎಂದು 30 ವರ್ಷದ ಚಾಹಲ್​ ಈ ವಿಡಿಯೋದಲ್ಲಿ ತಿಳಿಸಿದ್ದಾರೆ. ಕ್ವಾರಂಟೈನ್​ನಲ್ಲಿರುವುದು ಎಷ್ಟರ ಮಟ್ಟಿಗೆ ಕಷ್ಟದ ಕೆಲಸ ಎಂದೂ ಚಾಹಲ್​ ಈ ಮೂಲಕ ತೋರಿಸಿಕೊಟ್ಟಿದ್ದಾರೆ.