ಅಕ್ರಮವಾಗಿ ಮದ್ಯ ಸಾಗಿಸಿ ದೆಹಲಿಯಲ್ಲಿ ಸಿಕ್ಕಿಬಿದ್ದ ಯುವ ಕಾಂಗ್ರೆಸ್​ನ ರಾಷ್ಟ್ರೀಯ ಕಾರ್ಯದರ್ಶಿ ಮತ್ತು ಸಹಚರ

ನವದೆಹಲಿ: ರಾಜಕಾರಣದಲ್ಲಿ ಪ್ರಭಾವಿಗಳಾಗಿರುವ ತಾವು ಏನು ಮಾಡಿದರೂ ನಡೆಯುತ್ತದೆ ಎಂಬ ಅಹಂಭಾವ ಕೆಲವರಲ್ಲಿ ಇರುತ್ತದೆ. ಆದರೆ ಕೆಲವೊಮ್ಮೆ ಇದೇ ಅಹಂಭಾವ ಮುಟ್ಟಿ ನೋಡಿಕೊಳ್ಳುವ ರೀತಿಯ ಪೆಟ್ಟು ನೀಡುತ್ತದೆ. ಯುವ ಕಾಂಗ್ರೆಸ್​ನ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ರಾಮಗುಡ್ಡು ಶ್ರವಣ ರಾವ್​ ಮತ್ತು ಇವರ ಸಹಚರ ಬೆಂಗಳೂರು ಮೂಲದ ಮನೀಶ್​ ಬಸವರಾಜ ಶಿಲ್ಲೆ ತುಂಬಾ ಕಠಿಣವಾಗಿ ಪಾಠ ಕಲಿತಿದಿದ್ದಾರೆ.

ಪ್ರಭಾವಿ ರಾಜಕಾರಣಿಯಾಗಿರುವ ಹಿನ್ನೆಲೆಯಲ್ಲಿ ಕೋವಿಡ್​ ತುರ್ತು ಪಾಸ್​ ಪಡೆದುಕೊಂಡಿದ್ದ ರಾಮಗುಡ್ಡು ಶ್ರವಣ ರಾವ್​, ಮನೀಶ್​ ಬಸವರಾಜ್​ ಶಿಲ್ಲೆ ಜತೆಗೂಡಿ ಗುರುಗ್ರಾಮದಿಂದ ಹರಿಯಾಣಕ್ಕೆ ಅಕ್ರಮವಾಗಿ ಮದ್ಯ ಸಾಗಿಸುವಾಗ ಸಿಕ್ಕಿಬಿದ್ದಿದ್ದಾರೆ.

ಕೋವಿಡ್ 19 ಹಿನ್ನೆಲೆಯಲ್ಲಿ ದೇಶಾದ್ಯಂತ ಲಾಕ್​ಡೌನ್​ ಘೋಷಿಸಲಾಗಿದೆ. ಈ ಹಿನ್ನೆಲೆಯಲ್ಲಿ ಮದ್ಯ ಮಾರಾಟ ಕೂಡ ನಿಷೇಧಗೊಂಡಿದೆ. ಹೀಗಿದ್ದೂ, ಗುರುಗ್ರಾಮದಲ್ಲಿ ಅಕ್ರಮ ಮಾರಾಟಗಾರನೊಬ್ಬನಿಂದ ಇವರಿಬ್ಬರೂ 12 ಬಾಟಲಿಗಳ ಮದ್ಯದ ಕ್ರೇಟ್​ ಖರೀದಿಸಿದ್ದರು. ತೆಲಂಗಾಣದಲ್ಲಿ ನೋಂದಣಿಗೊಂಡಿರುವ ಸ್ಕಾರ್ಪಿಯೋ ವಾಹನದಲ್ಲಿ ಅದನ್ನು ದೆಹಲಿ ಮೂಲಕ ಹರಿಯಾಣಕ್ಕೆ ಸಾಗಿಸುತ್ತಿದ್ದರು. ಆದರೆ ಗುರುಗ್ರಾಮ-ದೆಹಲಿ ಗಡಿಯಲ್ಲಿ ವಾಹನವನ್ನು ಪೊಲೀಸರು ತಡೆದಿದ್ದರು.

ತುರ್ತು ಕಾರ್ಯದ ಮೇಲೆ ತೆರಳುತ್ತಿರುವುದಾಗಿ ಹೇಳಿ ತಪ್ಪಿಸಿಕೊಳ್ಳಲು ಇವರಿಬ್ಬರೂ ಪ್ರಯತ್ನಿಸಿದ್ದರು. ಆದರೆ ಪೊಲೀಸರು ವಾಹನವನ್ನು ಪರಿಶೀಲಿಸಿದಾಗ, ವಾಹನದ ಹಿಂಬದಿಯ ಸೀಟಿನ ಕೆಳಗೆ 12 ಬಾಟಲಿಗಳ ಮದ್ಯದ ಕ್ರೇಟ್​ ಇರುವುದು ಕಂಡುಬಂದಿತು. ತನ್ಮೂಲಕ ಇವರ ಅಸಲಿಯತ್ತು ಬಹಿರಂಗಗೊಂಡಿತು.

ಈ ಬಗ್ಗೆ ವಿಚಾರಿಸಿದಾಗ ರಾಮಗುಡ್ಡು ಶ್ರವಣ ರಾವ್​ ಗುರುಗ್ರಾಮದಲ್ಲಿ ಅಕ್ರಮ ಮಾರಾಟಗಾರನಿಂದ ಮದ್ಯವನ್ನು ಖರೀದಿಸಿದ್ದಾಗಿಯೂ, ದೆಹಲಿ ಮೂಲಕ ಹರಿಯಾಣಕ್ಕೆ ಸಾಗಿಸುತ್ತಿರುವುದಾಗಿಯೂ ಹೇಳಿದ್ದಾಗಿ ಪೊಲೀಸರು ತಿಳಿಸಿದ್ದಾರೆ.

ಈ ಹಿನ್ನೆಲೆಯಲ್ಲಿ ಅವರ ವಿರುದ್ಧ ಎಕ್ಸೈಜ್​ ಕಾಯ್ದೆಯಡಿ ದೂರು ದಾಖಲಿಸಿಕೊಂಡು, ವಾಹನ ಮತ್ತು ಮದ್ಯವನ್ನು ಜಪ್ತಿ ಮಾಡಲಾಗಿದೆ. ಪೂರ್ವಾನುಮತಿ ಇಲ್ಲದೆ ಲಾಕ್​ಡೌನ್​ ಅವಧಿಯಲ್ಲಿ ತಿರುಗಾಡದಂತೆ ತಾಕೀತು ಮಾಡಿ, ಅವರನ್ನು ಬಿಟ್ಟು ಕಳುಹಿಸಿದ್ದಾಗಿ ಹೇಳಿದ್ದಾರೆ.

ವಾಹನದ ಮಾಲೀಕರ ಮೂಲ ಬೆಂಗಳೂರು: ಈ ಬಗ್ಗೆ ಟ್ವೀಟ್​ ಮಾಡಿರುವ ಬಿಜೆಪಿಯ ರಾಷ್ಟ್ರೀಯ ವಕ್ತಾರ ಸಂಬಿತ್​ ಪಾತ್ರಾ, ಪೊಲೀಸರು ಜಪ್ತಿ ಮಾಡಿರುವ ಸ್ಕಾರ್ಪಿಯೋ ವಾಹನ ಯುವ ಕಾಂಗ್ರೆಸ್​ನ ರಾಷ್ಟ್ರೀಯ ಅಧ್ಯಕ್ಷ ಶ್ರೀನಿವಾಸ್​ ಅವರಿಗೆ ಸೇರಿದ್ದಾಗಿದೆ. ಶ್ರೀನಿವಾಸ್​ ಬೆಂಗಳೂರಿನ ನಿವಾಸಿಯಾಗಿದ್ದಾರೆ ಎಂದು ಆರೋಪಿಸಿದ್ದಾರೆ. ಬಡವರಿಗೆ ಆಹಾರ ಸಾಮಗ್ರಿ ಹಂಚುವ ಸಲುವಾಗಿ ಕೋವಿಡ್​ ತುರ್ತು ಪಾಸ್​ ಪಡೆದು, ಅಕ್ರಮವಾಗಿ ಮದ್ಯ ಸಾಗಾಟ ಮಾಡಲು ವಾಹನ ಬಳಕೆಯಾಗುತ್ತಿತ್ತು ಎಂದು ದೂರಿದ್ದಾರೆ. ಅಲ್ಲದೆ, ತಮ್ಮ ಟ್ವೀಟ್​ ಅನ್ನು ರಾಹುಲ್​ ಗಾಂಧಿ ಅವರಿಗೆ ಟ್ಯಾಗ್​ ಮಾಡಿದ್ದಾರೆ. 

https://www.vijayavani.net/nityananda-palghar-mob-lynching-sadhus-death-mob-lynching/