ಕಳೆದ ವಾರ ತಮಿಳುನಾಡಿನ ಡಿಎಂಕೆ ಅಭ್ಯರ್ಥಿ ದಿಂಡಿಗುಲ್ ಲಿಯೋನಿ ಚುನಾವಣಾ ಪ್ರಚಾರದ ಸಮಯದಲ್ಲಿ ಮಹಿಳೆಯರ ಕುರಿತು ಹೇಳಿಕೆ ನೀಡಿ ಮಹಿಳಾವಾದಿಗಳು ಸೇರಿದಂತೆ ಬಹುತೇಕರ ಕೆಂಗಣ್ಣಿಗೆ ಗುರಿಯಾದರು. ಅಷ್ಟಕ್ಕೂ ಅವರು ಹೇಳಿದ್ದು ಏನೆಂದರೆ, ‘‘ಮಹಿಳೆಯರು ಈಗ ವಿದೇಶೀ ಹಸುಗಳ ಹಾಲು ಕುಡಿಯುತ್ತಿದ್ದಾರೆ. ಅವರು ಹೆಚ್ಚು ತೂಕ ಗಳಿಸಿರುವುದಕ್ಕೆ ಇದೇ ಕಾರಣ. ಹಿಂದಿನ ಕಾಲದಲ್ಲಿ ಮಹಿಳೆಯ ಸೊಂಟ 8 ಅಂಕಿಯನ್ನು ಹೋಲುತ್ತಿತ್ತು. ಮಗುವನ್ನು ಎತ್ತಿಕೊಂಡರೆ ಅದು ಸೊಂಟದ ಮೇಲೆ ಹಾಗೇ ಕೂರುತ್ತಿತ್ತು. ಈಗ ಅವರು ಡ್ರಮ್ಮಿನಂತೆ ಆಗಿದ್ದಾರೆ. ಆದ್ದರಿಂದ ತಮ್ಮ ಮಕ್ಕಳನ್ನು ಸೊಂಟದ ಮೇಲೆ ಎತ್ತಿಕೊಳ್ಳಲಾಗುತ್ತಿಲ್ಲ’’ ಎಂದಿದ್ದರು. ಲಿಯೋನಿ ನೀಡಿದ ಈ ಹೇಳಿಕೆ, ಅದಕ್ಕಾಗಿ ಆಯ್ದುಕೊಂಡ ವೇದಿಕೆ, ಸಂದರ್ಭ ಎಲ್ಲವೂ ತಪ್ಪೇ. ಅವರು ಹೇಳಿದ ಧಾಟಿ ಕೂಡ ಅಪಹಾಸ್ಯ ಮಾಡುವಂತಿತ್ತು. ಮಹಿಳೆಯರನ್ನು ಮಾತ್ರ ಗುರಿಯಾಗಿಟ್ಟುಕೊಂಡು ಈ ಮಾತು ಹೇಳಿದ್ದು ಕೂಡ ಸರಿಯಲ್ಲ ಎನ್ನುವುದರಲ್ಲಿ ಎರಡು ಮಾತೇ ಇಲ್ಲ. ಆದರೆ...? ಆದರೆ... ಅವರಾಡಿದ ಮಾತಿನಲ್ಲಿ ಅಸತ್ಯವಾದುದು ಏನೂ ಇಲ್ಲ ಎಂಬುದು ಬಹುತೇಕರ ಅನಿಸಿಕೆ. ವಿದೇಶಿ ತಳಿಯ ಹಸು ಎಂದರೆ ಜೆರ್ಸಿ ತಳಿಯ ಹಸು. ಈಗ ಸಾಮಾನ್ಯವಾಗಿ ಎಲ್ಲರೂ ಕುಡಿಯುತ್ತಿರುವುದು ಅವುಗಳ ಹಾಲನ್ನೇ. ಆ ಹಾಲಿನಿಂದಲೇ ಅನೇಕ ಆರೋಗ್ಯ ಸಮಸ್ಯೆಗಳು ಕಾಡುತ್ತಿವೆ ಎನ್ನುತ್ತವೆ ಅಧ್ಯಯನ ವರದಿಗಳು. ಅದರಲ್ಲಿಯೂ ಮಹಿಳೆಯರಲ್ಲಿ ಬೊಜ್ಜು ಹೆಚ್ಚಾಗಲು, ಸೊಂಟದ ಸುತ್ತಲೂ ಬೊಜ್ಜು ತುಂಬಿಕೊಳ್ಳಲು ಇರುವ ಅನೇಕ ಕಾರಣಗಳಲ್ಲಿ ಈ ಹಾಲಿನ ಸೇವನೆಯೂ ಒಂದು ಕಾರಣ ಎಂದು ವೈದ್ಯಕೀಯ ಸಂಶೋಧನೆಗಳು ಸಾಬೀತು ಮಾಡಿವೆ.
