ಪ್ರಮುಖವಾಗಿ, ನಾಲ್ಕು ಪ್ರಮುಖ ಸ್ಟಾರ್ ನಟರ ಮುಂದಿನ ನಡೆಯ ಬಗ್ಗೆ ಬರೀ ಚಿತ್ರರಂಗದಲ್ಲಷ್ಟೇ ಅಲ್ಲ, ಆ ನಟರ ಅಭಿಮಾನಿ ವಲಯದಲ್ಲೂ ದೊಡ್ಡ ಮಟ್ಟಿಗೆ ಕುತೂಹಲ ಇದೆ. ಸುದೀಪ್ ಅಭಿನಯದ ‘ಕೋಟಿಗೊಬ್ಬ 3’ ಬಿಡುಗಡೆಗೆ ಸಿದ್ಧವಿದೆ. ‘ವಿಕ್ರಾಂತ್ ರೋಣ’ ಶೂಟಿಂಗ್ ಮುಗಿದು ಡಬ್ಬಿಂಗ್ ಹಂತದಲ್ಲಿದೆ. ಮುಂದೆ? ಗೊತ್ತಿಲ್ಲ. ಸುದೀಪ್ ಯಾವೊಂದು ಚಿತ್ರವನ್ನೂ ಒಪ್ಪಿಲ್ಲ. ಪರಭಾಷೆಗಳ ಒಂದೆರೆಡು ಚಿತ್ರಗಳಲ್ಲಿ ಅವರ ಹೆಸರು ಕೇಳಿ ಬಂದಿದೆಯಾದರೂ, ಅದಕ್ಕೂ ಅವರಿನ್ನು ಗ್ರೀನ್ ಸಿಗ್ನಲ್ ಕೊಟ್ಟ ಹಾಗಿಲ್ಲ. ಎರಡನೇ ಲಾಕ್ಡೌನ್ಗೂ ಮುನ್ನವೇ ದರ್ಶನ್, ‘ರಾಜವೀರ ಮದಕರಿ ನಾಯಕ’ ಚಿತ್ರದಲ್ಲಿ ನಟಿಸುತ್ತಿಲ್ಲ, ಅದರ ಬದಲು ನಿರ್ವಪಕ ರಾಕ್ಲೈನ್ ವೆಂಕಟೇಶ್ ನಿರ್ಮಾಣದ ‘ಗೋಲ್ಡ್ ರಿಂಗ್’ ಎಂಬ ಇನ್ನೊಂದು ಚಿತ್ರದಲ್ಲಿ ನಟಿಸಲಿದ್ದಾರೆ ಎಂದು ಸುದ್ದಿಯಾಗಿತ್ತು. ಆದರೆ, ಆ ‘ಗೋಲ್ಡ್ ರಿಂಗ್’ ಪ್ರಾರಂಭ ಯಾವಾಗ? ನಿರ್ದೇಶಕರ್ಯಾರು? ಯಾರೆಲ್ಲ ಇರುತ್ತಾರೆ? ಎಂಬ ಪ್ರಶ್ನೆಗಳಿಗೆ ಇನ್ನೂ ಉತ್ತರ ಸಿಕ್ಕಿಲ್ಲ. ಇನ್ನು, ಯಶ್ ಅವರ ಮುಂದಿನ ನಡೆಯೇನು ಎಂಬ ಪ್ರಶ್ನೆ ಕಳೆದೊಂದು ವರ್ಷದಿಂದ ಇದೆ. ‘ಕೆಜಿಎಫ್ 2’ ನಂತರ ನರ್ತನ್ ನಿರ್ದೇಶನದ ಚಿತ್ರದಲ್ಲಿ ಅವರು ನಟಿಸಲಿದ್ದಾರೆ ಎಂಬುದು ಸ್ಪಷ್ಟವಾಗಿದೆ. ಆದರೆ, ಈ ಚಿತ್ರ ಯಾವಾಗಿನಿಂದ ಶುರು? ನಿರ್ವಪಕರು ಯಾರು? ‘ಕೆಜಿಎಫ್ 2’ ಬಿಡುಗಡೆಯಾಗುವವರೆಗೂ ಈ ಚಿತ್ರ ಶುರುವಾಗುವುದಿಲ್ಲವೇ? ಈ ಗೊಂದಲಗಳು ಬಗೆಹರಿದಿಲ್ಲ. ಹಾಗೆ ನೋಡಿದರೆ, ಧ್ರುವ ಸರ್ಜಾ ಅಭಿನಯದ ಮುಂದಿನ ಚಿತ್ರದ ಬಗ್ಗೆ ಎಲ್ಲರಲ್ಲೂ ಒಂದು ಸ್ಪಷ್ಟತೆ ಇತ್ತು. ಆದರೆ, ‘ದುಬಾರಿ’ ಮುಂದಕ್ಕೆ ಹೋಗಿರುವುದರಿಂದ, ಆ ಜಾಗಕ್ಕೆ ಯಾವ ಚಿತ್ರ ಬರುತ್ತದೆ ಮತ್ತು ಯಾರು ನಿರ್ದೇಶಿಸುತ್ತಾರೆ ಎಂಬುದು ಇನ್ನೂ ಅಂತಿಮವಾಗಿಲ್ಲ. ‘ದುನಿಯಾ’ ವಿಜಯ್ ವಿಷಯದಲ್ಲೂ ಈ ಗೊಂದಲ ಇದ್ದು, ‘ಸಲಗ’ ನಂತರ ಮುಂದೇನು ಎಂಬ ಪ್ರಶ್ನೆ ಹಲವರಲ್ಲಿದೆ. ಹೀಗೆ ಕನ್ನಡದ ಜನಪ್ರಿಯ ನಟರುಗಳ ಮುಂದಿನ ಚಿತ್ರ ಯಾವುದಿರಬಹುದು ಎಂಬ ಚರ್ಚೆ ಕೆಲವು ತಿಂಗಳಿನಿಂದ ನಡೆಯುತ್ತಲೇ ಇದೆ. ಆದರೆ, ಅದಕ್ಕೊಂದು ಸ್ಪಷ್ಟತೆ ಸಿಕ್ಕಿಲ್ಲ. ಸಿನಿಮಾಗಳ ವಿಚಾರವಾಗಿ ಸ್ಟಾರ್ಗಳು ತೆರೆಮರೆಯಲ್ಲಿಯೇ ಕೆಲಸ ನಡೆಸಿದ್ದರಾದರೂ, ಸೂಕ್ತ ಸಮಯಕ್ಕಾಗಿ ಕಾಯುತ್ತಿದ್ದಾರೆ ಅಷ್ಟೇ. ಆದರೆ, ಆ ಸಮಯ ಬರೋದು ಯಾವಾಗ?
