ನವದೆಹಲಿ: ಅಕ್ರಮ ಸಂಬಂಧ ಅಥವಾ ಕಾನೂನಾತ್ಮಕವಲ್ಲದ ವಿವಾಹದಿಂದ ಜನಿಸಿದ ಮಕ್ಕಳಿಗೆ ತಮ್ಮ ಪೋಷಕರ ಅಥವಾ ಹಿಂದು ಅವಿಭಜಿತ ಕುಟುಂಬಕ್ಕೆ ಸೇರಿದ ಆಸ್ತಿ ಮೇಲೆ ಹಕ್ಕಿದೆಯೇ ಇಲ್ಲವೇ ಎಂಬ ಕುತೂಹಲಕಾರಿ ಪ್ರಶ್ನೆಗೆ ಉತ್ತರ ಕಂಡುಕೊಳ್ಳಲು ಸುಪ್ರೀಂಕೋರ್ಟ್ ಮುಂದಾಗಿದ್ದು, ಈ ಸಂಬಂಧ ಸಲ್ಲಿಕೆಯಾಗಿರುವ ಅರ್ಜಿ ವಿಚಾರಣೆ ನಡೆಸಿದೆ. ಹಿಂದೂ ವಿವಾಹ ಕಾಯ್ದೆ, 1956ರ ಸೆಕ್ಷನ್ 16(3)ರ ಅಡಿಯಲ್ಲಿ ಅಕ್ರಮ ಸಂಬಂಧದಿಂದ ಜನಿಸಿದ ಮಕ್ಕಳು ಕಾನೂನುಬದ್ಧ ಹೆಂಡತಿ/ಪತಿಗೆ ಜನಿಸಿದ ಮಕ್ಕಳಂತೆ ಆಸ್ತಿಯಲ್ಲಿ ಸಮಾನ ಪಾಲು ಪಡೆಯಲು ಅರ್ಹರಾಗಿದ್ದಾರೆ ಎಂದು ಕೆಲ ವಕೀಲರು ವಾದಿಸಿ ಕೋರ್ಟ್ ಗಮನಸೆಳೆದರು. ಈ ಆಸ್ತಿಯಲ್ಲಿ ಪೋಷಕರ ಸ್ವ-ಸ್ವಾಧೀನ ಆಸ್ತಿ ಒಳಗೊಂಡಿರುತ್ತದೆಯೇ ಅಥವಾ ಪಿತ್ರಾರ್ಜಿತ ಪೂರ್ವಜರ ಆಸ್ತಿ ಒಳಗೊಂಡಿರುತ್ತದೆಯೇ ಎಂಬ ಪ್ರಶ್ನೆಯನ್ನೂ ಕೆಲ ವಕೀಲರು ಸಿಜೆಐ ಡಿವೈ ಚಂದ್ರಚೂಡ್ ನೇತೃತ್ವದ ನ್ಯಾಯಪೀಠದ ಮುಂದಿಟ್ಟರು. ಅಂತಿಮವಾಗಿ, ಬಹುಪಾಲು ವಕೀಲರು ಅಸ್ತಿತ್ವದಲ್ಲಿರುವ ಕಾನೂನಿನ ಪ್ರಕಾರ, ಹಿಂದೂ ಅವಿಭಜಿತ ಕುಟುಂಬದ ಇತರ ಸದಸ್ಯರ ಆಸ್ತಿಗಳ ಮೇಲೆ ಇಂತಹಾ ಮಕ್ಕಳಿಗೆ ಯಾವುದೇ ಹಕ್ಕಿರುವುದಿಲ್ಲ ಎಂಬುದು ಸೆಕ್ಷನ್ 16(3) ಮೂಲಕ ತಿಳಿಸಲಾಗಿದೆ ಎಂದು ವಿವರಿಸಿದರು.
