ಕರ್ಫ್ಯೂ ಎಂಬ ಪದ ಕಾನೂನು ಆಡಳಿತಕ್ಕೆ ಸಂಬಂಧಿಸಿದ್ದಾಗಿದ್ದು, ಕಾನೂನು ಸುವ್ಯವಸ್ಥೆ ಕಾಪಾಡುವ ಸಲುವಾಗಿ ಪೊಲೀಸರು ಜಾರಿಗೊಳಿಸುವ ನಿಯಮ ಇದಾಗಿದೆ. ಪರಿಸ್ಥಿತಿ ನಿಯಂತ್ರಿಸುವ ಸಲುವಾಗಿ ಯಾರೂ ಮನೆಯಿಂದ ಹೊರಬಾರದಂತೆ ಬಲವಂತವಾಗಿ ಪೊಲೀಸರು ಮಾಡಿಸುವ ಬಂದ್ ಎಂದೂ ಹೇಳಬಹುದು. ಆದರೆ, ಜನತಾ ಕರ್ಫ್ಯೂ ಎಂಬ ಪದವೇ ಹೇಳುವಂತೆ, ಸರ್ಕಾರದ ಆಡಳಿತ ಕೈಂಕರ್ಯದಲ್ಲಿ ಜನರ ಪಾಲ್ಗೊಳ್ಳುವಿಕೆಯನ್ನು ಬಯಸುತ್ತದೆ. ದೇಶಕ್ಕೆ ದೇಶವೇ ಎದುರಿಸುವ ಸಂಕಷ್ಟಮಯ ಸನ್ನಿವೇಶವನ್ನು ಎದುರಿಸುವುದಕ್ಕೆ ಸರ್ಕಾರ ಮಾತ್ರವಲ್ಲ, ಸಾರ್ವಜನಿಕರೂ ಕೈ ಜೋಡಿಸಬೇಕು ಎಂಬ ಇರಾದೆ ಪ್ರಧಾನಿಯವರ ಮಾತಿನಲ್ಲಿ ಎದ್ದು ಕಾಣುತ್ತಿತ್ತು. ಇದಕ್ಕೆ ದೇಶವಾಸಿಗಳಿಂದ ಭರ್ಜರಿ ಪ್ರತಿಕ್ರಿಯೆ ಸಿಕ್ಕಿದ್ದು, ಶುಕ್ರವಾರ ಬೆಳಗ್ಗೆಯೇ ಜನರಲ್ಲಿ ಜಾಗೃತಿ ಮೂಡಿಸುವ ಕೆಲಸ ತ್ವರಿತಗತಿಯಲ್ಲಿ ನಡೆದಿದೆ. ಟ್ವಿಟರ್ನಂತಹ ಸಾಮಾಜಿಕ ಜಾಲತಾಣಗಳಲ್ಲಿ #JanataCurfewMarch22, IndiaFightsCovid19 #SocialDistancing ಮುಂತಾದ ಹ್ಯಾಷ್ ಟ್ಯಾಗ್ ಬಳಸಿ ಜಾಗೃತಿ ಮೂಡಿಸುವ ಕೆಲಸ ನಡೆಯುತ್ತಲೇ ಇದೆ.
