ಉಡುಪಿ ದೇಗುಲದಲ್ಲಿ ಸಿಕ್ರು 'ರಿಚರ್ಡ್​ ಆಂಟನಿ'; ಪೋಷಕರ ಮದುವೆ ಸಂಭ್ರಮದಲ್ಲಿ ರಕ್ಷಿತ್ ಶೆಟ್ಟಿ ಕಂಡಿದ್ದು ಹೀಗೆ..Rakshit Shetty

ಪಂಚೆಯುಟ್ಟು ಅದಕ್ಕೊಂದು ಶಲ್ಯ ತೊಟ್ಟು ಭಾರಿ ನಗುವಿನಲ್ಲಿ ರಕ್ಷಿತ್​ ಶೆಟ್ಟಿ ಓಡಾಡುತ್ತಿರುವುದನ್ನು ಉಡುಪಿಯ ದೇಗುಲದಲ್ಲಿ  ಕಂಡ ಅಭಿಮಾನಿಗಳು ಅವರ ಮದುವೆ ಇರಬೇಕೆಂದು ಭಾವಿಸಿಬಿಟ್ಟಿದ್ದರು. ಆದರೆ, ಸತ್ಯ ಅದಲ್ಲ  ಅವರ ತಂದೆ-ತಾಯಿ ಮದುವೆಯಾಗಿ 50 ವರ್ಷ ಕಳೆದಿರುವ ಕಾರಣ ಇಡೀ ಕುಟುಂಬ ಸೇರಿ ಸುವರ್ಣ ಸಂಭ್ರಮವನ್ನು ಆಚರಿಸಿದ್ದಾರೆ.

ರಕ್ಷಿತ್​ ಶೆಟ್ಟಿ ಅವರ ತಂದೆಯಾದ  ಶ್ರೀಧರ್‌ ಶೆಟ್ಟಿ ಹಾಗೂ ತಾಯಿ ರಂಜನಾ ಶೆಟ್ಟಿ  ಅವರ  50ನೇ ವರ್ಷದ ವಿವಾಹ ವಾರ್ಷಿಕೋತ್ಸವವನ್ನು ಕುಟುಂಬವು ಅದ್ದೂರಿಯಾಗಿ ಆಚರಿಸಿದೆ. ಇದರ ಭಾಗವಾಗಿ ಉಡುಪಿಯಲ್ಲಿ ಬೈಲೂರು ಬಳಿ ಇರುವ ಶ್ರೀಮಹಿಷಮರ್ದಿನಿ ದೇವಸ್ಥಾನದಲ್ಲಿ ವಿಶೇಷ ಪೂಜೆಯನ್ನು ನೆರವೇರಿಸಿದೆ. 

ಸಮಾರಂಭದಲ್ಲಿ ರಕ್ಷಿತ್​ ಶೆಟ್ಟಿ ಕುಟುಂಬ ಭಾಗಿಯಾಗಿತ್ತು. ಅವರ ತಾಯಿ ಕೆಂಪು ಬಣ್ಣದ ರೇಷ್ಮೇ ಸೀರೆಯುಟ್ಟು ಮಿಂಚಿದರೆ, ತಂದೆ ರೇಷ್ಮೆ ಒಂಚೆ ಧರಿಸಿದ್ದರು. ಅವರ ಅಣ್ಣ ರಂಜಿತ್​, ಅತ್ತಿಗೆ ಹಾಗೂ ಇಬ್ಬರು ಮಕ್ಕಳು ಹಾಗೂ ಅಕ್ಕ ರಶ್ಮಿತ್​ ಶೆಟ್ಟಿ ಕುಟುಂಬವು ಈ ಕಾರ್ಯಕ್ರಮದಲ್ಲಿ ಭಾಗಿಯಾಗಿದ್ದರು. ಕುಟುಂಬದ ಫೋಟೋ ಸಹ ಸೋಶಿಯಲ್​ ಮೀಡಿಯಾದಲ್ಲಿ ಹರಿದಾಡುತ್ತಿದೆ. 

ಸಿಂಪಲ್​ ಸ್ಟಾರ್​ ರಕ್ಷಿತ್​ ಶೆಟ್ಟಿ ಸಿಂಪಲ್​ ಆಗಿ ಒಂದು ಲವ್​ ಸ್ಟೋರಿ ಸಿನಿಮಾದಿಂದ ಹೆಚ್ಚು ಪರಿಚಿತರಾದರೂ ಸಹ ಜನ ಅವರನ್ನು ಹೆಚ್ಚೆಚ್ಚು ನೆಚ್ಚಿಕೊಂಡಿದ್ದು ಕಿರಿಕ್​ ಪಾರ್ಟಿ, ಸಪ್ತ ಸಾಗರದಾಚೆ ಎಲ್ಲೋ, ಚಾರ್ಲಿ 777 ಸಿನಿಮಾದಿಂದ. ಅದಾದ ನಂತರ ಅವರು ಎಲ್ಲಿದ್ದಾರೆ, ಏನೂ ಮಾಡುತ್ತಿದ್ದಾರೆ. ಅವರ ರಿಚರ್ಡ್​ ಆಂಟನಿ ಸಿನಿಮಾ ಏನಾಯ್ತು ಎನ್ನುವ ಬಗ್ಗೆ ಮಾಹಿತಿ ಇನ್ನು ದಕ್ಕಿಲ್ಲ.

ಇತ್ತೀಚೆಗೆ ತಮ್ಮ ಮಾಜಿ ಪ್ರೇಯಸಿ ರಶ್ಮಿಕಾ ಮಂದಣ್ಣ ಅವರು ಮದುವೆಯಾದ ದಿನ ಫೇಸ್​ ಬುಕ್​ ಪ್ರೊಫೈಲ್​ ಅನ್ನು ಬದಲಾಯಿಸಿದ್ದರು. ಇದು ಭಾರಿ ಚರ್ಚೆಗೆ ಕಾರಣವಾಗಿತ್ತು.  ಚಾರ್ಲಿ ನಾಯಿ ಜೊತೆ ಇರುವ ಫೋಟೋ ಹಂಚಿಕೊಂಡಿದ್ದ ಕಾರಣ ನಾಯಿಗಾದರೂ ನೀಯತ್ತಿದೆ ಮನುಷ್ಯರಿಗಿಲ್ಲ ಎಂದಿದ್ದಾರೆ ಎಂದು ನೆಟ್ಟಿಗರೇ ಕಲ್ಪಿಸಿಕೊಂಡು ಟ್ವೀಟ್ ಮಾಡಿದ್ದರು, (ಏಜೆನ್ಸೀಸ್).