"ಆ 3 ವರ್ಷ..." ಆರ್​ಸಿಬಿ, ಐಪಿಎಲ್​ಗೆ ಕೊಹ್ಲಿ ಗುಡ್​ಬೈ!? ಮಾಜಿ ಹಿರಿಯ ಕ್ರಿಕೆಟಿಗನ ಹೇಳಿಕೆ ವೈರಲ್​ | Virat Kohli

ಬೆಂಗಳೂರು: ಟೀಮ್​ ಇಂಡಿಯಾದ ದಿಗ್ಗಜ ಆಟಗಾರ, ದಾಖಲೆಗಳ ಸರದಾರ, 'ರನ್​ ಮೆಷಿನ್'​, ಕ್ರಿಕೆಟ್​ ಲೋಕದ ಕಿಂಗ್​ ಎಂದೇ ಖ್ಯಾತಿಯಾಗಿರುವ ವಿರಾಟ್ ಕೊಹ್ಲಿ (Virat Kohli) ಕಳೆದ 18 ವರ್ಷಗಳಿಂದ ಪ್ರತಿನಿಧಿಸುತ್ತಿರುವ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ಐಪಿಎಲ್ ತಂಡವನ್ನು ತೊರೆಯಲು ಮುಂದಾಗಿದ್ದಾರೆ ಎಂಬ ಬಲವಾದ ವದಂತಿಗಳು ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಸಿಕ್ಕಾಪಟ್ಟೆ ಸದ್ದು ಮಾಡುತ್ತಿದೆ. ತಮ್ಮ ನೆಚ್ಚಿನ ಸ್ಟಾರ್​ ಕ್ರಿಕೆಟಿಗ ಗುಡ್​ಬೈ ವಿಚಾರ ಫ್ಯಾನ್ಸ್​ಗಳಲ್ಲಿ ಆತಂಕ ಸೃಷ್ಟಿಸಿದ್ದು, ಇದು ನಿಜವೇ? ಎಂಬ ಪ್ರಶ್ನೆಗಳು ತೀರ ಚರ್ಚೆಯಲ್ಲಿವೆ.

ಆರ್​​ಸಿಬಿ, ಐಪಿಎಲ್​ಗೆ ಗುಡ್​ಬೈ?

ಆರ್​ಸಿಬಿಗೆ ಸಂಬಂಧಿಸಿದ ಹೊಸ ವಾಣಿಜ್ಯ ಒಪ್ಪಂದಕ್ಕೆ ಸಹಿ ಹಾಕಲು ಕೊಹ್ಲಿ ನಿರಾಕರಿಸಿದ್ದಾರೆ ಎಂಬ ಸುದ್ದಿ ಹೊರ ಬೀಳುತ್ತಿದ್ದಂತೆ ಇಂಥದ್ದೊಂದು ಚರ್ಚೆ ಎಲ್ಲೆಡೆ ಜೋರಾಗಿದೆ. ಆದಾಗ್ಯೂ, ಈ ವದಂತಿಗಳಿಗೆ ಯಾವುದೇ ಆಧಾರವಿಲ್ಲ ಎಂದು ಆಪ್ತ ಮೂಲಗಳು ಸೂಚಿಸಿವೆ. ಕಳೆದ 18ನೇ ಆವೃತ್ತಿಯಲ್ಲಿ ಆರ್​ಸಿಬಿಗೆ ಟ್ರೋಫಿ ಗೆದ್ದುಕೊಟ್ಟ ಮರುದಿನವೇ ಸಂಭವಿಸಿದ ಕಾಲ್ತುಳಿತ ದುರಂತ ಕೊಹ್ಲಿ ಸೇರಿದಂತೆ ಇಡೀ ಫ್ರಾಂಚೈಸಿಯ ಆಟಗಾರರಿಗೆ ಅತೀವ ದುಃಖವನ್ನು ತಂದೊಡ್ಡಿತು. ಈ ಕಹಿ ಘಟನೆಯಿಂದ ಪ್ರಾಯಶಃ ವಿರಾಟ್​ ಆರ್​ಸಿಬಿ ಪರ ಆಡಲು ನಿರ್ಧರಿಸಿರಬಹುದು ಎಂಬ ಅನುಮಾನಗಳು ಹುಟ್ಟಿಕೊಂಡಿವೆ. ಈ ಕುರಿತಂತೆ ಟೀಮ್ ಇಂಡಿಯಾದ ಮಾಜಿ ಹಿರಿಯ ಕ್ರಿಕೆಟಿಗ ಕ್ರಿಸ್​ ಶ್ರೀಕಾಂತ್ ಮಾತನಾಡಿದ್ದಾರೆ.

ಇದನ್ನೂ ಓದಿ: ದೀಪಾವಳಿ ಹಬ್ಬಕ್ಕೆ ಬಂಪರ್​ ಆಫರ್ ಕೊಟ್ಟ BSNL​: ಕೇವಲ 1 ರೂ.ಗೆ ಸಿಗುತ್ತೆ 4G ಇಂಟರ್ನೆಟ್​!

ವದಂತಿ ಅಷ್ಟೇ?

ತಮ್ಮ ಯೂಟ್ಯೂಬ್ ಚಾನೆಲ್​ನಲ್ಲಿ ಕೊಹ್ಲಿ ಆರ್​ಸಿಬಿ ತೊರೆಯುವ ವಿಚಾರಕ್ಕೆ ಸಂಬಂಧಿಸಿದಂತೆ ಪ್ರತಿಕ್ರಿಯಿಸಿರುವ ಶ್ರೀಕಾಂತ್​, "ಅದೊಂದು ವದಂತಿ ಅಷ್ಟೇ. ಆರ್​ಸಿಬಿಗೆ ಕೊಹ್ಲಿ ಕಪ್​ ಗೆದ್ದುಕೊಟ್ಟಿದ್ದಾರೆ. ಹೀಗಾಗಿ, ಅವರು ಐಪಿಎಲ್​ನಿಂದ ನಿವೃತ್ತಿ ಪಡೆಯುವುದಿಲ್ಲ. ಇವೆಲ್ಲ ಸುಳ್ಳು ಸುದ್ದಿಗಳು. ನನಗೆ ಗೊತ್ತಿರುವ ಪ್ರಕಾರ, ಆರ್​ಸಿಬಿ ಮಾಲೀಕತ್ವ ಬದಲಾಗಬಹುದೇ ವಿನಃ ವಿರಾಟ್​ ಗುಡ್​ಬೈ ಹೇಳುವ ಯಾವ ಮುನ್ಸೂಚನೆಗಳು ಇಲ್ಲ. ಆತ ಫ್ರಾಂಚೈಸಿಯೊಂದಿಗೆ ಮುಂದುವರಿಯುತ್ತಾರೆ" ಎಂದು ಹೇಳಿದ್ದಾರೆ.

"ಅಷ್ಟಕ್ಕೂ ವಿರಾಟ್​ ಏಕೆ ಗುಡ್​ಬೈ ಹೇಳಬೇಕು? ಐಪಿಎಲ್​ನಲ್ಲಿ ಅದ್ಭುತ ಬ್ಯಾಟಿಂಗ್ ಪ್ರದರ್ಶನ ಹಾಗೂ ಇನ್ನಿಂಗ್ಸ್ ನೀಡಿದ್ದಾರೆ. ಈ ಬಗ್ಗೆ ಖುದ್ದಾಗಿ ಅವರೇ ನಿರ್ಧಾರ ಕೈಗೊಂಡರೆ, ನಾವು ಒಪ್ಪಿಕೊಳ್ಳಬಹುದು. ಇನ್ನೂ ಮೂರು ವರ್ಷಗಳ ಕಾಲ ಕೊಹ್ಲಿ ಐಪಿಎಲ್​ ಆಡಬಹುದು. ಅವರಿಂದ ರನ್​ಗಳ ಸುರಿಮಳೆ ಹರಿಯುತ್ತಲೇ ಇರುತ್ತದೆ ಮತ್ತು ಕಿಂಗ್​ ಆಫ್​ ಕಿಂಗ್ಸ್ ಆಗಿರುತ್ತಾರೆ" ಎಂದು ಶ್ರೀಕಾಂತ್​ ಕೊಹ್ಲಿ ಬಗ್ಗೆ ಗುಣಗಾನ ಮಾಡಿದ್ದಾರೆ.

ಶೀಘ್ರವೇ ಆರ್​ಸಿಬಿ ಫ್ರಾಂಚೈಸಿ ಸೇಲ್!​

ಆರ್‌ಸಿಬಿ 18 ವರ್ಷಗಳ ಬಳಿಕ ತಮ್ಮ ಚೊಚ್ಚಲ ಐಪಿಎಲ್ ಕಪ್​ ಗೆದ್ದ ಬೆನ್ನಲ್ಲೇ ಬೆಂಗಳೂರಿಗೆ ಆಗಮಿಸಿತು. ಈ ವೇಳೆ ಸಂಭವಿಸಿದ ಕಾಲ್ತುಳಿತದಲ್ಲಿ 11 ಯುವ ಅಭಿಮಾನಿಗಳು ದುರಂತ ಅಂತ್ಯ ಕಂಡರು. ಇನ್ನೂ ಅನೇಕರು ಗಂಭೀರವಾಗಿ ಗಾಯಗೊಂಡರು. ಈ ಘಟನೆ ಬಳಿಕ ಫ್ರಾಂಚೈಸಿಗೆ ಹಲವಾರು ಸಮಸ್ಯೆಗಳು ಎದುರಾಯಿತು. ಸಾಲು ಸಾಲು ಆರೋಪಗಳ ಜತೆಗೆ ಕೇಸ್​ ಕೂಡ ದಾಖಲಾಯಿತು. ಸಂಭ್ರಮದ ಹಾದಿಯಿಂದ ಸೂತಕದ ಛಾಯೆ ಮೂಡಿದ್ದು, ಫ್ರಾಂಚೈಸಿಯ ಕಳೆಯನ್ನೇ ಸದ್ಯ ಕಸಿದಂತಾಗಿದೆ. ಈ ಮಧ್ಯೆ, ಇತ್ತೀಚಿನ ವರದಿಯೊಂದು, ಆರ್‌ಸಿಬಿ ಅನ್ನು ಮಾರಾಟ ಮಾಡಲು ಆಡಳಿತ ಮಂಡಳಿಯು ನಿರ್ಧರಿಸಿರುವುದಾಗಿ ತಿಳಿಸಿದೆ.

‘ಟೈಮ್ಸ್ ಆಫ್​ ಇಂಡಿಯಾ’ ವರದಿ ಪ್ರಕಾರ, ಐಪಿಎಲ್‌ನ ಮಾಜಿ ಅಧ್ಯಕ್ಷ ಲಲಿತ್ ಮೋದಿ ತಮ್ಮ ಸಾಮಾಜಿಕ ಜಾಲತಾಣದ ಅಧಿಕೃತ ಖಾತೆಯಲ್ಲಿ ಈ ಬಗ್ಗೆ ಪೋಸ್ಟ್​ ಹಂಚಿಕೊಂಡಿದ್ದಾರೆ. “ಆರ್‌ಸಿಬಿ ಫ್ರಾಂಚೈಸಿಯು ತಮ್ಮ ಬ್ಯಾಲೆನ್ಸ್ ಶೀಟ್‌ನಿಂದ ತೆಗೆದುಹಾಕಲು ಅಂತಿಮ ನಿರ್ಧಾರವನ್ನು ಈಗಾಗಲೇ ಕೈಗೊಂಡಿದೆ. ಈ ಸಂಬಂಧ ದಾಖಲೆಗಳನ್ನು ಪೂರ್ಣಗೊಳಿಸಲಾಗಿದೆ ಮತ್ತು ಖರೀದಿದಾರರು ಮುಂದೆ ಬಂದರೆ ಶೀಘ್ರವೇ ಫ್ರಾಂಚೈಸಿಯನ್ನು ಮಾಲೀಕರು ಮಾರಾಟ ಮಾಡಲು ಸಿದ್ಧರಾಗಿದ್ದಾರೆ ಎಂದು ಬರೆದುಕೊಂಡಿದ್ದಾರೆ,(ಏಜೆನ್ಸೀಸ್).

https://www.vijayavani.net/ajit-agarkar-responds-to-shami-allegations