ಹರಿಯಾಣ ಚುನಾವಣಾ ಅಖಾಡಕ್ಕಿಳಿದ ಕುಸ್ತಿಪಟು ವಿನೇಶ್​ ಪೋಗಟ್​ ಒಟ್ಟು ಆಸ್ತಿ ಎಷ್ಟು ಗೊತ್ತೇ?

ಚಂಡೀಗಢ: ಅಧಿಕ ದೇಹತೂಕದಿಂದಾಗಿ ಪ್ಯಾರಿಸ್​ ಒಲಿಂಪಿಕ್ಸ್​ನಲ್ಲಿ ಪದಕದಿಂದ ವಂಚಿತರಾದ ಭಾರತ ಕುಸ್ತಪಟು ವಿನೇಶ್​ ಪೋಗಟ್​ ಈಗ ಹರಿಯಾಣದ ವಿಧಾನಸಭಾ ಚುನಾವಣಾ ಕಣಕ್ಕಿಳಿದಿದ್ದಾರೆ. ಈಗಾಗಲೆ ಜುಲಾನಾ ಕ್ಷೇತ್ರದಿಂದ ಕಾಂಗ್ರೆಸ್​ ಅಭ್ಯರ್ಥಿಯಾಗಿ ನಾಮಪತ್ರ ಸಲ್ಲಿಸಿದ್ದು, ಈ ವೇಳೆ ತನ್ನ ಆಸ್ತಿ ಮೌಲ್ಯಗಳನ್ನೂ ಅವರು ಬಹಿರಂಗಪಡಿಸಿದ್ದಾರೆ.

ನಾಮಪತ್ರದ ಜತೆಗೆ ವಿನೇಶ್​ ಪೋಗಟ್​ ಸಲ್ಲಿಸಿರುವ ಅವಿದಾವಿತ್​ ದಾಖಲೆಪತ್ರಗಳ ಪ್ರಕಾರ ಅವರು ಸುಮಾರು ಎರಡು ಕೋಟಿ ರೂ. ಆಸ್ತಿಯ ಒಡತಿಯಾಗಿದ್ದಾರೆ. ಪ್ರಸಕ್ತ ತನ್ನ ಬಳಿ 1.95 ಲಕ್ಷ ರೂ. ನಗದು ಹೊಂದಿರುವ ವಿನೇಶ್​ 3 ಐಷಾರಾಮಿ ಕಾರುಗಳ ಒಡತಿಯೂ ಆಗಿದ್ದಾರೆ.

2023&2024ರ ಸಾಲಿನ ಆದಾಯ ತೆರಿಗೆ ವಿವರಗಳ ಪ್ರಕಾರ ವಿನೇಶ್​ ಕಳೆದ ವಿತ್ತವರ್ಷದದಲ್ಲಿ 13,85,000 ರೂ. ಸಂಪಾದಿಸಿದ್ದಾರೆ. ಅವರ ಬಳಿಕ ವೊಲ್ವೊ ಎಕ್ಸ್​ಸಿ 60 (35 ಲಕ್ಷ ರೂ.), ಹುಂಡೈ ಕ್ರೆಟಾ (12 ಲಕ್ಷ ರೂ) ಮತ್ತು ಟೊಯೊಟಾ ಇನ್ನೋವಾ (17 ಲಕ್ಷ ರೂ) ಕಾರುಗಳಿವೆ. ಹರಿಯಾಣ ಚುನಾವಣೆಯಲ್ಲಿ ಸ್ಪರ್ಧಿಸುವ ಸಲುವಾಗಿ ವಿನೇಶ್​ ರೈಲ್ವೇಸ್​ನಲ್ಲಿದ್ದ ತನ್ನ ಕೇಂದ್ರ ಸರ್ಕಾರದ ಉದ್ಯೋಗವನ್ನು ತ್ಯಜಿಸಿದ್ದರು.

ವಿನೇಶ್​ ಪೋಗಟ್​ ಪತಿ ಸೋಮ್​ವೀರ್​ ರಾಥಿಯ ವಾರ್ಷಿಕ ಆದಾಯ 3.44 ಲಕ್ಷ ರೂ. ಮಾತ್ರ ಆಗಿದ್ದು, ಕೈಯಲ್ಲಿ 15 ಸಾವಿರ ರೂ. ನಗದು ಹೊಂದಿದ್ದಾರೆ. ವಿನೇಶ್​ ಪೋಗಟ್​ ತನ್ನ ಇನ್ನೋವಾ ಕಾರು ಖರೀದಿಗಾಗಿ 13 ಲಕ್ಷ ರೂ. ಸಾಲವನ್ನೂ ಪಡೆದುಕೊಂಡಿದ್ದು, ಪ್ರಸಕ್ತ ಅದರ ಮರುಪಾವತಿ ಮಾಡುತ್ತಿದ್ದಾರೆ. ಸೋಮ್​ವೀರ್​ ಬಳಿಕ ಮಹೀಂದ್ರಾ ಸ್ಕಾರ್ಪಿಯೊ ಇದ್ದು, ಅದರ ಮೌಲ್ಯ 19 ಲಕ್ಷ ರೂ. ಆಗಿದೆ.

https://www.vijayavani.net/australia-won-the-t20-series-against-scotland-and-got-the-ice-cream-cup