ಬೆಂಗಳೂರು: ರಾಜ್ಯದಲ್ಲಿ ಜಾರಿಗೊಳಿಸಲಾಗಿರುವ ‘ಮುಖ್ಯಮಂತ್ರಿ ರೈತ ವಿದ್ಯಾನಿಧಿ’ ನಿಯಮಗಳನ್ನು ಸರ್ಕಾರ ಮಾರ್ಪಾಡುಗೊಳಿಸಿ ರೈತ ಕುಟುಂಬ ಎಲ್ಲ ಮಕ್ಕಳಿಗೂ ವಿದ್ಯಾರ್ಥಿವೇತನ ಲಭ್ಯವಾಗುವಂತೆ ಅವಕಾಶ ಮಾಡಿಕೊಟ್ಟಿದೆ. ರೈತರ ಮಕ್ಕಳ ಉನ್ನತ ಶಿಕ್ಷಣಕ್ಕೆ ಪ್ರೋತ್ಸಾಹ ನೀಡುವ ಉದ್ದೇಶದಿಂದ ಮುಖ್ಯಮಂತ್ರಿ ರೈತ ವಿದ್ಯಾನಿಧಿ ಯೋಜನೆಯನ್ನು ಆ.7 ರಂದು ಜಾರಿಗೆ ತರಲಾಗಿತ್ತು. ಆದರೆ, ಯೋಜನೆಯಲ್ಲಿ ಈಗಾಗಲೆ ರಾಜ್ಯ ಸರ್ಕಾರದ ಅನುದಾನದಿಂದ ಯಾವುದಾದರೂ ವಿದ್ಯಾರ್ಥಿ ವೇತನ ಪಡೆಯುತ್ತಿದ್ದರೆ, ಅವರಿಗೆ ರೈತ ವಿದ್ಯಾನಿಧಿ ಸೌಲಭ್ಯ ಸಿಗುತ್ತಿರಲಿಲ್ಲ. ಡಿ.10 ರಂದು ಮಾರ್ಪಾಡು ಆದೇಶ ಹೊರಡಿಸಿರುವ ಸರ್ಕಾರ ರಾಜ್ಯದ ಇ- ಆಡಳಿತ ಇಲಾಖೆ ನಿರ್ವಹಿಸುತ್ತಿರುವ ‘ಕುಟುಂಬ’ ತಂತ್ರಾಂಶದ ದತ್ತಾಂಶದಲ್ಲಿ ದಾಖಲಾಗಿರುವ ಎಲ್ಲ ಸದಸ್ಯರು (ವಿದ್ಯಾರ್ಥಿಯು ಈಗಾಗಲೆ ಯಾವುದೇ ವಿದ್ಯಾರ್ಥಿವೇತನ ಪಡೆಯುತ್ತಿದ್ದರೂ) ರೈತ ವಿದ್ಯಾನಿಧಿಯ ವಿದ್ಯಾರ್ಥಿವೇತನ ಪಡೆಯಲು ಅರ್ಹರಾಗಿದ್ದಾರೆ. ರ್ಯಾಂಕ್, ಮೆರಿಟ್, ಶಿಷ್ಯವೇತನ, ಪ್ರಶಸ್ತಿ ಅಥವಾ ಪ್ರತಿಫಲ ಆಧಾರ ದಲ್ಲಿ ಪಡೆಯುವ ವಿದ್ಯಾರ್ಥಿ ವೇತನಕ್ಕೂ ರೈತ ವಿದ್ಯಾನಿಧಿಗೂ ಸಂಬಂಧವಿಲ್ಲ ಎಂದು ತಿಳಿಸಿದೆ.
