ನವದೆಹಲಿ: 1983ರಲ್ಲಿ ಭಾರತ ಕ್ರಿಕೆಟ್ ತಂಡ ಮೊದಲ ಬಾರಿಗೆ ವರ್ಲ್ಡ್ ಕಪ್ ಗೆದ್ದು ಇತಿಹಾಸ ರಚಿಸಿದ ಕ್ಷಣಗಳನ್ನು, ಅದರ ಸುತ್ತಲ ಕಥೆಯನ್ನು ಹೆಣೆದಿರುವ ಚಿತ್ರ ’83’. ಕಬೀರ್ ಖಾನ್ ನಿರ್ದೇಶನದ ಈ ಐಕಾನಿಕ್ ಸಿನಿಮಾದ ಟ್ರೇಲರ್ ಮಂಗಳವಾರ ಬಿಡುಗಡೆಯಾಗಿದೆ. ರಿಲೆಯನ್ಸ್ ಎಂಟರ್ಟೈನ್ಮೆಂಟ್ ಯೂಟ್ಯೂಬ್ನಲ್ಲಿ ಪೋಸ್ಟ್ ಮಾಡಿರುವ ಟ್ರೇಲರ್ಗೆ ಅದಾಗಲೇ 5 ಕೋಟಿಗೂ ಹೆಚ್ಚು ವೀಕ್ಷಣೆಗಳು ಲಭಿಸಿವೆ.
ಬಾಲಿವುಡ್ ನಟ ರಣವೀರ್ ಸಿಂಗ್ ಭಾರತದ ಆಗಿನ ಕ್ಯಾಪ್ಟನ್ ಕಪಿಲ್ ದೇವ್ರ ಪಾತ್ರ ನಿರ್ವಹಿಸುತ್ತಿರುವ ಈ ಚಿತ್ರ, ಡಿಸೆಂಬರ್ 24 ರಂದು ಕನ್ನಡ ಮತ್ತು ಹಿಂದಿ ಸೇರಿದಂತೆ ಐದು ಭಾಷೆಗಳಲ್ಲಿ ಬಿಡುಗಡೆಯಾಗಲಿದೆ. ಟ್ರೇಲರ್ನ ಬಗ್ಗೆ ಸಾಮಾಜಿಕ ಮಾಧ್ಯಮದಲ್ಲಿ ಮೆಚ್ಚುಗೆಯ ಮಹಾಪೂರ ಹರಿದುಬಂದಿದ್ದು, ರಣವೀರ್ ಸಿಂಗ್ರ ಹೊಸ ಲುಕ್ ಮತ್ತು ನಟನೆಯ ಶೈಲಿ ಅಭಿಮಾನಿಗಳನ್ನು ಚಕಿತಗೊಳಿಸಿದೆ.
ಇದನ್ನೂ ಓದಿ: ಜೂನಿಯರ್ ಹಾಕಿ ವಿಶ್ವಕಪ್‌ನಲ್ಲಿ ಇಂದು ಭಾರತ-ಬೆಲ್ಜಿಯಂ ಕ್ವಾರ್ಟರ್‌ಫೈನಲ್
ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಉಪೇಕ್ಷಿತ ತಂಡವಾಗಿದ್ದ ಭಾರತ ಕ್ರಿಕೆಟ್ ತಂಡ 1983ರ ವರ್ಲ್ಡ್ ಕಪ್ ಸಾಧಿಸಲು ಪಟ್ಟ ಶ್ರಮ ಹೇಗಿತ್ತು ಎಂಬುದನ್ನು ವಿಸ್ತೃತವಾಗಿ ಚಿತ್ರಿಸಿದ್ದು, ಕ್ರೀಡಾಪ್ರೇಮಿಗಳಲ್ಲಿ ರಾಷ್ಟ್ರಪ್ರೇಮದ ಕಿಚ್ಚು ಹತ್ತಿಸಲಿದೆ. ಟ್ರೇಲರ್ನಲ್ಲಿ “ಜೀತೇಗಾ ಜೀತೇಗಾ ಇಂಡಿಯಾ ಜೀತೇಗಾ…” ಎಂಬ ರೋಮಾಂಚಕ ಹಾಡಿನೊಂದಿಗೆ, ಕ್ಯಾಪ್ಟನ್ ಕಪಿಲ್ದೇವ್ “ವಿ ಹಿಯರ್ ಟು ವಿನ್” ಎಂದು ದೃಢವಾಗಿ ಹೇಳುವ ದೃಶ್ಯ ಸಿನಿಪ್ರಿಯರಲ್ಲಿ ತವಕ ಹೆಚ್ಚಿಸುವಂತಿದೆ.
ಚಿತ್ರದಲ್ಲಿ ಕಲಾವಿದರಾದ ತಾಹಿರ್ ಭಾಸಿನ್, ಪಂಕಜ್ ತ್ರಿಪಾಠಿ, ಸಾಖಿಬ್ ಸಲೀಂ ಕ್ರಮವಾಗಿ ಸುನೀಲ್ ಗವಾಸ್ಕರ್, ಪಿ.ಆರ್.ಮಾನ್ ಸಿಂಗ್ ಮತ್ತು ಮೊಹಿಂದರ್ ಅಮರ್ನಾಥ್ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ವರ್ಲ್ಡ್ ಕಪ್ ಗೆದ್ದ ಇಡೀ ಭಾರತ ತಂಡವನ್ನು ತೆರೆಯ ಮೇಲೆ ಪುನರ್ರಚಿಸಲಾಗಿದೆ. ರಣವೀರ್ ಪತ್ನಿಯಾದ ನಟಿ ದೀಪಿಕಾ ಪಡುಕೋಣೆಯೇ ತೆರೆಯ ಮೇಲೆ ಕಪಿಲ್ ದೇವ್ ಪತ್ನಿ ರೋಮಿ ಪಾತ್ರ ನಿರ್ವಹಿಸಿದ್ದಾರೆ.
ಮದುವೆ ಆರತಕ್ಷತೆಗೆ ಬರಲು ಬಂಧುಮಿತ್ರರಿಗೆ ‘ನೋಟೀಸ್’! ವಕೀಲ ಜೋಡಿ ನೀಡಿದ ಆಮಂತ್ರಣಪತ್ರಿಕೆ ನೋಡಿ!
ಮಹಿಳಾ ಸದಸ್ಯರೊಂದಿಗೆ ಕಾಂಗ್ರೆಸ್ ಸಂಸದ ಶಶಿ ತರೂರ್ ಸೆಲ್ಫಿ! ಶೀರ್ಷಿಕೆ ನೋಡಿ ಸಿಟ್ಟಾದ ನೆಟ್ಟಿಗರು