ಲೋಕಸಭಾ ಚುನಾವಣೆಯಲ್ಲಿ ನಾಮ ಪತ್ರ ಸಲ್ಲಿಸುವ ವೇಳೆ ಎಂಇಎಸ್ನ ನಿರಂಜನ ದೇಸಾಯಿ ಅವರು ನಾಡ ವಿರೋಽಯಾದ ಹೇಳಿಕೆ ನೀಡಿದ್ದು, ಅದನ್ನು ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ತಿನ ಅಧ್ಯಕ್ಷ ಬಿ.ಎನ್. ವಾಸರೆ ತೀವ್ರವಾಗಿ ಖಂಡಿಸಿದ್ದಾರೆ.
ಪತ್ರಿಕಾ ಹೇಳಿಕೆ ನೀಡಿರುವ ವಾಸರೆ, ಚುನಾವಣೆಯ ವೇಳೆ ಜಾತಿ, ಧರ್ಮ, ಗಡಿ, ನುಡಿ ಮುಂತಾದ ಭಾವನಾತ್ಮ ವಿಚಾರಗಳನ್ನು ಹೇಳಬಾರದೆಂದು ನೀತಿ ಸಂಹಿತೆಯಿದ್ದರೂ ಅಭ್ಯರ್ಥಿಯಾಗಿರುವ ನಿರಂಜನ ದೇಸಾಯಿಯವರು ಕಾರವಾರ, ಜೋಯಿಡಾ ಹಾಗೂ ಬೆಳಗಾವಿಯನ್ನು ಮಹಾರಾಷ್ಟ್ರಕ್ಕೆ ಸೇರಿಸಬೇಕು ಎಂದು ಬಹಿರಂಗ ಹೇಳಿಕೆ ನೀಡಿರುವುದು ಚುನಾವಣಾ ನಿಯಮ ಉಲ್ಲಂಘನೆಯಾಗಿರುತ್ತದೆ. ಚುನಾವಣಾ ಆಯೋಗ ಈ ಸಂಗತಿಯನ್ನು ಗಂಭೀರವಾಗಿ ಪರಿಗಣಿಸಬೇಕು ಎಂದು ವಾಸರೆ ಒತ್ತಾಯಿಸಿದ್ದಾರೆ.
ಕಾರವಾರ, ದಾಂಡೇಲಿ, ಜೋಯಿಡಾದಲ್ಲಿದ್ದ ಮರಾಠಿ ಭಾಷಾ ಶಾಲೆಗಳನ್ನು ಕರ್ನಾಟಕ ಸರ್ಕಾರ ಮುಚ್ಚಿದೆ ಎಂದು ನಿರಂಜನ ದೇಸಾಯಿ ಹೇಳಿರುವುದು ಅವರ ತಿಳಿವಳಿಕೆಯ ಕೊರತೆಯಾಗಿದೆ. ಮರಾಠಿ ಶಾಲೆಗಳಲ್ಲಿ ಅಭ್ಯಾಸ ಮಾಡುತ್ತಿದ್ದ ವಿದ್ಯಾರ್ಥಿಗಳಿಗೆ ಪ್ರೌಢ ಶಿಕ್ಷಣ ಹಾಗೂ ಕಾಲೇಜ್ಗಳಲ್ಲಿ ಸಮಸ್ಯೆಯಾಗುತ್ತಿತ್ತು. ಕಾರಣ ಮರಾಠಿ ಶಾಲೆಗಳಲ್ಲಿ ವಿದ್ಯಾರ್ಥಿಗಳ ಸಂಖ್ಯೆ ಕಡಿಮೆಯಾಯಿತು. ಹಾಗೂ ಈ ಭಾಗದ ಮರಾಠಿ ಭಾಷಿಕರು ಕನ್ನಡವನ್ನು ನಾಡ ಭಾಷೆಯಾಗಿ ಪ್ರೀತಿಸಿ ಕನ್ನಡ ಮಾಧ್ಯಮದಲ್ಲೇ ಅಭ್ಯಾಸ ಮಾಡಲಾರಂಭಿಸಿದ ಹಿನ್ನೆಲೆಯಲ್ಲಿ, ಮರಾಠಿ ಶಾಲೆಗಳಿಗೆ ವಿದ್ಯಾರ್ಥಿಗಳ ಸಂಖ್ಯೆ ಕಡಿಮೆಯಾದ ಹಿನ್ನೆಲೆಯಲ್ಲಿ ಅಂಥಹ ಶಾಲೆಗಳು ಬಂದ್ ಆಗಿವೆ. ಇದರಲ್ಲಿ ಯಾರ ದುರಾಲೋಚನೆಯೂ ಇಲ್ಲ. ವಿದ್ಯಾರ್ಥಿಗಳ ಸಂಖ್ಯೆ ಕಡಿಮೆಯಿರುವ ಕನ್ನಡ ಶಾಲೆಗಳೂ ಮುಚ್ಚಿಕೊಳ್ಳುತ್ತಿವೆ. ವಾಸ್ತವಾಂಶ ತಿಳಿಯದೇ ನಿರಂಜನ ದೇಸಾಯಿ ಜನರೊಳಗೆ ಭಾವನಾತ್ಮಕ ಪ್ರಚೋದನೆ ನೀಡುವಂತಹ ಹೇಳಿಕೆ ಕೊಡುವುದು ಸಮಂಜಸವಲ್ಲ. ಉತ್ತರ ಕನ್ನಡ ಜಿಲ್ಲೆಯ ಯಾರೊಬ್ಬರೂ ಕೂಡಾ ತಮ್ಮನ್ನು ಮಹಾರಾಷ್ಟ್ರಕ್ಕೆ ಸೇರಿಸಬೇಕೆಂದು ಹೇಳುತ್ತಿಲ್ಲ. ಇಲ್ಲಿರುವ ಎಲ್ಲರೂ ಕನ್ನಡದ ನೆಲಕ್ಕೆ ನಿಷ್ಠರಾಗಿದ್ದಾರೆ. ಚುನಾವಣೆಯ ಸಂದರ್ಭದಲ್ಲಿ ನಿರಂಜನ ದೇಸಾಯಿ ನಮ್ಮ ಜಿಲ್ಲೆಗೆ ಬಂದು ಜಾತಿ ಹಾಗೂ ಭಾಷಿಕರ ನಡುವೆ ಸಂಘರ್ಷ ಹುಟ್ಟಿಸುವ ಹಾಗೂ ಮನಸ್ಸು ಕೆಡಿಸುವ ಮಾತನಾಡಿದ್ದು ನಾಡ ದ್ರೋಹದ ಕೆಲಸವಾಗಿದೆ ಎಂದಿದ್ದಾರೆ.
