ಭಾರತದ COVID19 ತಡೆ ಹೋರಾಟಕ್ಕೆ ಧರ್ಮದ ಬಣ್ಣ ಹಚ್ಚುವುದನ್ನು ಕೂಡಲೇ ನಿಲ್ಲಿಸಿ :ಅಮೆರಿಕದ ಧಾರ್ಮಿಕ ಸ್ವಾತಂತ್ರ್ಯ ಕಮಿಷನ್​ಗೆ ಭಾರತದ ಎಚ್ಚರಿಕೆ

ನವದೆಹಲಿ: ಗುಜರಾತ್​ನ ಅಹಮದಾಬಾದ್​ನ ಆಸ್ಪತ್ರೆ ಒಂದರಲ್ಲಿ ಧರ್ಮ ಆಧಾರಿತವಾಗಿ ರೋಗಿಗಳನ್ನು ಪ್ರತ್ಯೇಕಿಸಲಾಗಿದೆ ಎಂಬ ದಾರಿ ತಪ್ಪಿಸುವ ಮಾಹಿತಿಯನ್ನು ಆಧರಿಸಿ ಅಮೆರಿಕದ ಕಮಿಷನ್ ಆನ್​ ಇಂಟರ್​ನ್ಯಾಷನಲ್​ ರಿಲೀಜಿಯಸ್​ ಫ್ರೀಡಂ ಪ್ರಕಟಿಸಿರುವ ವರದಿ ಕೂಡ ದಾರಿ ತಪ್ಪಿಸುವಂಥದ್ದೇ ಆಗಿದೆ. ಈ ರೀತಿ ಅರೆಬರೆ ಮಾಹಿತಿ ತಗೊಂಡು ವರದಿ ಪ್ರಕಟಿಸಿ ಜಗತ್ತಿನ ದಾರಿ ತಪ್ಪಿಸುವುದು ಸರಿಯಲ್ಲ ಎಂದು ಅಮೆರಿಕನ್ ಕಮಿಷನ್​ಗೆ ಭಾರತ ಎಚ್ಚರಿಕೆ ನೀಡಿದೆ.

ಯಾವುದೋ ಪತ್ರಿಕೆ ಪ್ರಕಟಿಸಿದ ಸುಳ್ಳು ಸುದ್ದಿಯನ್ನು ಆಧರಿಸಿ ಕಮಿಷನ್​ ವರದಿ ಪ್ರಕಟಿಸಿದೆ. ಭಾರತದಲ್ಲಿ ಧಾರ್ಮಿಕ ಸ್ವಾತಂತ್ರ್ಯದ ವಿಚಾರಕ್ಕೆ ಸಂಬಂಧಿಸಿ ಕೇವಲವಾದ ಹೇಳಿಕೆಯನ್ನು ಅದರಲ್ಲಿ ದಾಖಲಿಸಲಾಗಿದೆ. ಯುಎಸ್​ಸಿಐಆರ್​ಎಫ್​ ಈಗ ತಪ್ಪುದಾರಿಗೆ ಎಳೆಯುವ ವರದಿಗಳನ್ನು ಎಲ್ಲೆಡೆ ಪ್ರಸಾರ ಮಾಡುತ್ತಿದೆ. ಇದು ಸರಿಯಾದ ಕ್ರಮವಲ್ಲ. ಇದನ್ನು ಕೂಡಲೇ ನಿಲ್ಲಿಸಬೇಕು ಎಂದು ವಿದೇಶಾಂಗ ಸಚಿವಾಲಯದ ವಕ್ತಾರ ಅನುರಾಗ್ ಶ್ರೀವಸ್ತವ ಎಚ್ಚರಿಸಿದ್ದಾರೆ.

ಭಾರತದಲ್ಲಿ ಯಾವುದೇ ಆಸ್ಪತ್ರೆಯಲ್ಲೂ ಈ ರೀತಿ ಧರ್ಮದ ಆಧಾರದ ಮೇಲೆ ರೋಗಿಗಳನ್ನು ಪ್ರತ್ಯೇಕಿಸಿ ಚಿಕಿತ್ಸೆ ನೀಡುತ್ತಿಲ್ಲ. ವೃತ್ತಿಪರ ವೈದ್ಯಕೀಯ ಮಾರ್ಗಸೂಚಿ ಏನಿದೆಯೋ ಅದರ ಆಧಾರದಲ್ಲೇ ಚಿಕಿತ್ಸೆಗಳು ನಡೆಯುತ್ತಿವೆ. ಭಾರತವು ಈ ಸೋಂಕು ತಡೆಗಟ್ಟಲು ಒಟ್ಟಾಗಿ ಹೋರಾಟ ನಡೆಸುತ್ತಿರುವಾಗ ಅದಕ್ಕೆ ಧರ್ಮದ ಬಣ್ಣ ಹಚ್ಚುವ ಕೆಲಸ ಮಾಡಬಾರದು. ಅಮೆರಿಕನ್ ಕಮಿಷನ್ ಪ್ರತಿಯೊಂದನ್ನು ಧರ್ಮದ ಆಧಾರದಲ್ಲೇ ನೋಡುತ್ತಿದೆ. ಆದರೆ ಇದು ಅದಕ್ಕೆ ಸಕಾಲವಲ್ಲ. ಸೋಂಕು ಹರಡದಂತೆ ತಡೆದು ಜೀವ ಉಳಿಸಿಕೊಳ್ಳಬೇಕಾದ ಸಮಯವಿದು ಎಂದು ಭಾರತ ಎಚ್ಚರಿಸಿದೆ.

ಹಿಂದು ಮತ್ತು ಮುಸ್ಲಿಂ ಎಂದು ಧರ್ಮದ ಆಧಾರದ ಮೇಲೆ ವರ್ಗೀಕರಣ ಮಾಡಿ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ನೀಡಿದರೆ ಭಾರತದಲ್ಲಿ ಮುಸ್ಲಿಮರು ಮೇಲೆ ಇನ್ನಷ್ಟು ಕೆಟ್ಟ ಅಭಿಪ್ರಾಯ ಮೂಡಬಹುದು. ಅಲ್ಲದೆ, ಅವರ ವಿರುದ್ಧ ಇನ್ನಷ್ಟು ವದಂತಿಗಳು ರೂಮರ್​ಗಳು ಹೆಚ್ಚಾಗಬಹುದು ಎಂಬ ಅಭಿಪ್ರಾಯವನ್ನೂ ಅಮೆರಿಕನ್ ಕಮಿಷನ್​ ವ್ಯಕ್ತಪಡಿಸಿತ್ತು. ಆ ಮೂಲಕ ಅದು ಭಾರತದ ಹೋರಾಟಕ್ಕೆ ಧಾರ್ಮಿಕ ಬಣ್ಣ ಬಳಿಯಲು ಪ್ರಯತ್ನಿಸಿತ್ತು. (ಏಜೆನ್ಸೀಸ್​)

https://www.vijayavani.net/lock-down-time-pass-use-of-mobile-phones-may-trigger-health-problems-related-to-eyes-and-neck/

https://www.vijayavani.net/governor-of-nairobi-sends-corona-virus-care-packages-filled-with-hennessy-cognac-to-the-poor/