ನೈರೋಬಿ: ಕೀನ್ಯಾದ ರಾಜಧಾನಿಯಾಗಿರುವ ನೈರೋಬಿಯಲ್ಲಿ ಮದ್ಯಪ್ರಿಯರಿಗೆ ಭಾರಿ ಖುಷಿಯನ್ನೇ ಕೊಟ್ಟುಬಿಡ್ತು ಅಲ್ಲಿನ ಗವರ್ನರ್ ಮೈಕ್ ಸೊನ್ಕೋ ಅವರ ಗಿಫ್ಟ್! ಕರೊನಾ ವೈರಸ್ ಕೇರ್ ಪ್ಯಾಕೇಜ್ ರೆಡಿ ಮಾಡೋದಕ್ಕೆ ಅವರಿಗೆ ಪ್ರೇರಣೆಯಾಗಿದ್ದು ಒಂದು ಫೇಕ್ ಗೈಡ್ಲೈನ್ಸ್!
ವಿಶ್ವ ಆರೋಗ್ಯ ಸಂಸ್ಥೆಯ ಹೆಸರಿನಲ್ಲಿ ಯಾರೋ ಕಿಡಿಗೇಡಿಗಳು ಪ್ರಕಟಿಸಿದ ನಕಲಿ ಮಾರ್ಗಸೂಚಿಯನ್ನೇ ಸತ್ಯವೆಂದು ನಂಬಿಬಿಟ್ಟಿದ್ದ ಮೈಕ್ ಸೊನ್ಕೊ ವಾಸ್ತವದಲ್ಲಿ ಒಬ್ಬ ಶೋಕಿಲಾಲನೂ ಹೌದು. ಮಂಗಳವಾರ ವಿಚಿತ್ರ ವೇಷ ಭೂಷಣದೊಂದಿಗೆ ಪತ್ರಿಕಾಗೋಷ್ಠಿ ನಡೆಸಿದ ಆತ, ನಾವು ನಮ್ಮ ಬಡಜನರಿಗೆ ಫುಡ್ ಪ್ಯಾಕೇಜ್ ಜತೆಗೆ ಸಣ್ಣ ಸಣ್ಣ ಬಾಟಲಿಗಳಲ್ಲಿ ಹೆನ್ನೆಸ್ಸೆ ಕೊಗ್ನಾಕ್ ಮದ್ಯದ ಬಾಟಲಿಗಳನ್ನೂ ನೀಡುತ್ತಿದ್ದೇವೆ ಎಂದು ಘೋಷಿಸಿದ.
ಕೂಡಲೇ ಪತ್ರಕರ್ತರಿಂದ ಒಂದಷ್ಟು ಪ್ರಶ್ನೆಗಳು ಎದುರಾದವು. ಅದಕ್ಕೆ ಆತ ಹೇಳಿದ್ದಿಷ್ಟು- ವಿಶ್ವ ಆರೋಗ್ಯ ಸಂಸ್ಥೆ ಮತ್ತು ಅನೇಕ ಆರೋಗ್ಯ ಸಂಸ್ಥೆಗಳು ನಡೆಸಿರುವ ಒಂದು ಸಂಶೋಧನೆ ಪ್ರಕಾರ ಕರೊನಾ ವೈರಸ್ ಅಥವಾ ಯಾವುದೇ ರೀತಿಯ ವೈರಸ್ಗಳನ್ನು ಹೊಡೆದೋಡಿಸುವಲ್ಲಿ ಆಲ್ಕೋಹಾಲ್ ಪ್ರಮುಖ ಪಾತ್ರವಹಿಸುತ್ತದೆ ಎಂದು ನಾನು ಕೇಳಲ್ಪಟ್ಟಿದ್ದೇನೆ. ಹಾಗಾಗಿ ಈ ಬಾಟಲಿಗಳನ್ನು ಕೊಡ್ತಾ ಇದ್ದೇನೆ.
ಪ್ಯಾಕೇಜ್ನಲ್ಲಿ ಏನೇನಿದೆ ಅಂದರೆ, 4 ಪೌಂಡ್ ಸ್ಟೆರ್ಲಿಂಗ್(ಅಂದಾಜು 400 ರೂಪಾಯಿ) ಮೌಲ್ಯದ ಎರಡು ಔನ್ಸ್ ಕೊಗ್ನಾಕ್ ಮಿನಿಯೇಚರ್ ನ 5 ಬಾಟಲಿ, ಪ್ರಮಾಣೀಕೃತ ಹ್ಯಾಂಡ್ ಸ್ಯಾನಿಟೈಸರ್, ಜೋಳ, ನ್ಯಾಪ್ಪೀಸ್, ಕ್ಲೀನಿಂಗ್ ಮತ್ತು ಮನೆ ಅಗತ್ಯದ ಇತರೆ ವಸ್ತುಗಳಿವೆ.
ವಿಶ್ವ ಆರೋಗ್ಯ ಸಂಸ್ಥೆ ಆಲ್ಕೋಹಾಲ್ ಇರುವ ಹ್ಯಾಂಡ್ ಸ್ಯಾನಿಟೈಸರ್ ಬಳಸಲು ಸೂಚಿಸಿದೆಯಾದರೂ, ಹೆನ್ನೆಸ್ಸೆ 80 ಪ್ರೂಫ್ ಸ್ಪಿರಿಟ್ ಆಗಿರುವ ಕಾರಣ ಈ ಕೆಲಸಕ್ಕೆ ಯೋಗ್ಯವಲ್ಲ ಎಂದು ಆಫ್ರಿಕನ್ ಮೆಡಿಕಲ್ ಆ್ಯಂಡ್ ರಿಸರ್ಚ್ ಫೌಂಡೇಷನ್ ಸಿಇಒ ಗಿತಿಂಜಿ ಗಿತಾಹಿ ಹೇಳಿದ್ದಾರೆ. ಅಲ್ಲದೆ, ಸೊನ್ಕೋ ಹೇಳಿಕೆ ಮತ್ತು ನಡೆಯನ್ನು ಖಂಡಿಸಿದ್ದಾರೆ.
ಕೀನ್ಯಾ ಸರ್ಕಾರ ಕಾಲ್ತುಳಿತ ತಪ್ಪಿಸುವ ಸಲುವಾಗಿ ಉಚಿತ ಆಹಾರ ವಿತರಣೆ ಮತ್ತು ನೇರವಾಗಿ ಜನರಿಗೆ ಧನ ಸಹಾಯ ಮಾಡುವುದನ್ನು ನಿಷೇಧಿಸಿದೆ. ಆದಾಗ್ಯೂ, ಸೊನ್ಕೊ ಪ್ರಚಾರಕ್ಕಾಗಿ ಈ ಕೆಲಸವನ್ನು ಮುಂದುವರಿಸಿ ಎಲ್ಲರ ಕೆಂಗಣ್ಣಿಗೆ ಗುರಿಯಾಗಿದ್ದಾರೆ. ಸೊನ್ಕೊ ವಿರುದ್ಧ ಬಹು ಕೋಟಿ ಮೌಲ್ಯದ ಭ್ರಷ್ಟಾಚಾರದ ಪ್ರಕರಣವೂ ಇದ್ದು ವಿಚಾರಣೆಯ ಹಂತದಲ್ಲಿದೆ. (ಏಜೆನ್ಸೀಸ್)