ಪಿಲಿಭಿತ್: ಇಲ್ಲೋರ್ವ ಮಹಿಳೆ ಮಾಡಿಕೊಂಡ ಫಜೀತಿ ಅಷ್ಟಿಷ್ಟಲ್ಲ. ಲವರ್ ಜತೆ ಆಸ್ಟ್ರೇಲಿಯಾಕ್ಕೆ ಹಾರಿ, ಕರೊನಾದಿಂದ ಸಿಕ್ಕಿಬಿದ್ದು..ನಂತರ ಆಕೆಯ ಪತಿ ಪೊಲೀಸರಿಗೆ ದೂರು ಕೊಟ್ಟಂತಹ ವಿಚಿತ್ರ ಘಟನೆ ಉತ್ತರ ಪ್ರದೇಶದಲ್ಲಿ ನಡೆದಿದೆ.
36 ವರ್ಷದ ಮಹಿಳೆ ತನ್ನ ಪತಿಯ ಪಾಸ್ಪೋರ್ಟ್ನಿಂದ ಪ್ರಿಯತಮನನ್ನು ಕರೆದುಕೊಂಡು ಆಸ್ಟ್ರೇಲಿಯಾಕ್ಕೆ ಹೋಗಿದ್ದಳು. ಜನವರಿಯಲ್ಲಿ ಇವರಿಬ್ಬರೂ ಫ್ಲೈಟ್ನಲ್ಲಿ ಹಾರಿದ್ದರು. ಆ ಲವರ್ಗೆ ಪಾಸ್ಪೋರ್ಟ್ ಇಲ್ಲದಿದ್ದರೂ, ತನ್ನ ಪತಿಯ ಪಾಸ್ಪೋರ್ಟ್ ಬಳಸಿಯೇ ಕರೆದುಕೊಂಡು ಹೋಗಿದ್ದ ಮಹಿಳೆ, ಮಾರ್ಚ್ನಲ್ಲಿ ವಾಪಸ್ ದೇಶಕ್ಕೆ ಬರುವ ಯೋಜನೆ ಹಾಕಿದ್ದಳು. ಆದರೆ ಇವರಿಬ್ಬರ ಅದೃಷ್ಟ ಕೆಟ್ಟಿತ್ತು. ಅದೇ ಹೊತ್ತಿಗೆ ಕರೊನಾ ವೈರಸ್ ದಾಂಗುಡಿಯಿಟ್ಟು, ಅಂತಾರಾಷ್ಟ್ರೀಯ ವಿಮಾನಗಳೆಲ್ಲ ಹಾರಾಟ ನಿಲ್ಲಿಸಿದವು. ಹಾಗಾಗಿ ಮಾರ್ಚ್ನಲ್ಲಿ ವಾಪಸ್ ಬರಬೇಕಿದ್ದ ಮಹಿಳೆ ಮತ್ತು ಅವಳ ಪ್ರಿಯತಮ ಆಗಸ್ಟ್ 24ರಂದು ಮರಳಿ ದೇಶಕ್ಕೆ ಬಂದಿದ್ದಾರೆ.
ಮಹಿಳೆ ದಮ್ಗರ್ಹಿ ಎಂಬ ಗ್ರಾಮದ ನಿವಾಸಿ. ಆಗಸ್ಟ್ 24ರಂದು ಭಾರತಕ್ಕೆ ವಾಪಸ್ ಬಂದಿದ್ದಾರೆ. ಆದರೆ ಇಲ್ಲಿ ಬಂದಕೂಡಲೇ ಪತಿ ಬಿಗ್ ಶಾಕ್ ಕೊಟ್ಟಿದ್ದಾರೆ. ನನ್ನ ಪತ್ನಿ ಸ್ಥಳೀಯ 36 ವರ್ಷದ ಸಂದೀಪ್ ಸಿಂಗ್ ಜತೆ ವಿವಾಹೇತರ ಸಂಬಂಧ ಇಟ್ಟುಕೊಂಡಿದ್ದಾಳೆ. ಅಷ್ಟೇ ಅಲ್ಲ ನಕಲಿ ದಾಖಲೆಗಳನ್ನು ಬಳಸಿ ಆಸ್ಟ್ರೇಲಿಯಾಕ್ಕೆ ಹೋಗಿದ್ದಾಳೆ ಎಂದು ದೂರಿನಲ್ಲಿ ಉಲ್ಲೇಖಿಸಿದ್ದಾರೆ.
ನಾನು ಮುಂಬೈನಲ್ಲಿ ಕೆಲಸ ಮಾಡುತ್ತಿದ್ದೇನೆ. ಪಿಲಿಭಿತ್ನಲ್ಲಿ ನಮ್ಮ ಪೂರ್ವಜರ ಆಸ್ತಿ ಇರುವುದರಿಂದ ಅದರ ಜವಾಬ್ದಾರಿ ನಿರ್ವಹಿಸುವ ಸಲುವಾಗಿ ಪತ್ನಿ ಅಲ್ಲಿಯೇ ಇರುತ್ತಾಳೆ. ನಾನೂ ಆಗಾಗ ಮುಂಬೈನಿಂದ ಪಿಲಿಭಿತ್ಗೆ ಹೋಗಿ, ಪತ್ನಿಯನ್ನು ಭೇಟಿಯಾಗುತ್ತಿದ್ದೆ. ಹಾಗೇ ಮೇ 18ರಂದು ಪಿಲಿಭಿತ್ಗೆ ಹೋದಾಗ ನನ್ನ ಪತ್ನಿ ಇರಲಿಲ್ಲ. ಆಕೆಯ ಪ್ರಿಯಕರ ಸಂದೀಪ್ ಜತೆ ಆಸ್ಟ್ರೇಲಿಯಾಕ್ಕೆ ಹೋಗಿರುವ ವಿಚಾರ ತಿಳಿಯಿತು. ಸಂದೀಪ್ ಕುಟುಂಬದವರೇ ನನಗೆ ಇದನ್ನು ತಿಳಿಸಿದರು ಎಂದು ಪತಿ ದೂರಿನಲ್ಲಿ ತಿಳಿಸಿದ್ದಾರೆ.
ಸದ್ಯ ಪೊಲೀಸರು ತನಿಖೆ ಪ್ರಾರಂಭ ಮಾಡಿದ್ದಾರೆ. ನಕಲಿ ದಾಖಲೆಗಳನ್ನು ಸೃಷ್ಟಿಸಿ ಅಂತಾರಾಷ್ಟ್ರೀಯ ಪ್ರಯಾಣ ಮಾಡಿದ್ದು ಗಂಭೀರ ವಿಷಯ ಎಂದೂ ಹೇಳಿದ್ದಾರೆ. (ಏಜೆನ್ಸೀಸ್)
ಮಾವನ ಹತ್ಯೆ, ಅತ್ತೆಯ ಪರಿಸ್ಥಿತಿ ತೀವ್ರ ಗಂಭೀರ: ಇದು ಸುರೇಶ್ ರೈನಾ ವಾಪಸ್ ಆಗಲು ಕಾರಣ