ಶಾಲೆ ಮುಗ್ಸಿ ಸೈಕಲ್​ನಲ್ಲಿ ಬರ್ತಿದ್ದ ವಿದ್ಯಾರ್ಥಿನಿ ದುಪಟ್ಟ ಎಳೆದ ದುಷ್ಟರು: ಕೆಳಗೆ ಬಿದ್ದಾಕೆಯ ಮೇಲೆ ಬೈಕ್​ ಹರಿದು ಸಾವು

ಲಖನೌ: ಶಾಲೆ ಮುಗಿಸಿ ಮನೆಗೆ ಹೋಗುತ್ತಿದ್ದ ವಿದ್ಯಾರ್ಥಿನಿ, ದುಷ್ಕರ್ಮಿಗಳ ಕಿರುಕುಳ ಕಾರಣದಿಂದಾಗಿ ಅಪಘಾತದಲ್ಲಿ ದುರಂತ ಸಾವಿಗೀಡಾಗಿರುವ ಆಘಾತಕಾರಿ ಘಟನೆ ಉತ್ತರ ಪ್ರದೇಶದಲ್ಲಿ ನಡೆದಿದೆ.

ಮೃತ ವಿದ್ಯಾರ್ಥಿನಿಯ ವಯಸ್ಸು 17. ಶಾಲೆಯನ್ನು ಮುಗಿಸಿ ಮನೆಗೆ ಸೈಕಲ್​ನಲ್ಲಿ ಹಿಂದಿರುಗುವಾಗ ಮೂವರು ದುಷ್ಕರ್ಮಿಗಳು ಆಕೆಯ ದುಪಟ್ಟವನ್ನು ಎಳೆದು ಚುಡಾಯಿಸಲು ಪ್ರಯತ್ನಿಸಿದ್ದಾರೆ. ಆದರೆ, ದುಪಟ್ಟ ಎಳೆದಿದ್ದರಿಂದ ವಿದ್ಯಾರ್ಥಿನಿ ಕೆಳಗೆ ಬಿದ್ದಿದ್ದು ಕೂಡಲೇ ಆಕೆಯ ಮೇಲೆ ಬೈಕ್​ ಒಂದು ಹರಿದಿದೆ. ಉತ್ತರ ಪ್ರದೇಶದ ಅಂಬೇಡ್ಕರ್​ ನಗರದಲ್ಲಿ ಶುಕ್ರವಾರ ಈ ಘಟನೆ ನಡೆದಿದೆ.

ಘಟನಾ ಸ್ಥಳದಲ್ಲಿದ್ದ ಸಿಸಿಟಿವಿ ಕ್ಯಾಮೆರಾದಲ್ಲಿ ಈ ದೃಶ್ಯ ಸೆರೆಯಾಗಿದೆ. ದುಪಟ್ಟ ಎಳೆದ ಕೂಡಲೇ ಸೈಕಲ್​ ನಿಯಂತ್ರಣ ಕಳೆದುಕೊಂಡ ಹುಡುಗಿ ಕೆಳಗೆ ಬೀಳುತ್ತಾಳೆ. ಬಿದ್ದ ಕೂಡಲೇ ದುಷ್ಕರ್ಮಿಗಳಿದ್ದ ಬೈಕ್​ ಆಕೆಯ ಮೇಲೆ ಹರಿದು ಹೋಗುತ್ತದೆ. ಗಂಭೀರವಾಗಿ ಗಾಯಗೊಂಡ ವಿದ್ಯಾರ್ಥಿನಿಯನ್ನು ತಕ್ಷಣ ಹತ್ತಿರದ ಆಸ್ಪತ್ರೆಗೆ ದಾಖಲಿಸಲಾಗುತ್ತದೆ. ಆಕೆಯನ್ನು ಪರೀಕ್ಷೆ ಮಾಡಿದ ವೈದ್ಯರು ಆಕೆ ಮೃತಪಟ್ಟಿರುವುದಾಗಿ ಖಚಿತಪಡಿಸಿದರು ಎಂದು ಪೊಲೀಸರು ತಿಳಿಸಿದ್ದಾರೆ.

ಇದನ್ನೂ ಓದಿ: ನಂಬರ್ ಪ್ಲೇಟ್ ಬುಕ್ಕಿಂಗ್​ಗೆ ಕಮೀಷನ್ ವಸೂಲಿ!; ಎಚ್ಚೆಸ್ಸಾರ್ಪಿ ಹಾಕಿಸಬೇಕೋ ಬೇಡವೋ ಗೊಂದಲ; ಅರ್ಹತೆ ಇಲ್ಲದ ಕಂಪನಿಗಳಿಗೆ ಟೆಂಡರ್ ಆರೋಪ

ಆರೋಪಿಗಳ ವಿರುದ್ಧ ಸ್ಥಳೀಯ ಪೊಲೀಸ್​ ಠಾಣೆಯಲ್ಲಿ ದೂರು ದಾಖಲಾಗಿದೆ. ಶುಕ್ರವಾರ ಸಂಜೆ 3.30ರ ಸುಮಾರಿಗೆ ಶಾಲೆಯಿಂದ ವಾಪಸ್​ ಬರುವಾಗ ಮೂವರು ಚುಡಾಯಿಸಿದ್ದಾರೆ. ಶಹನವಾಜ್​ ಮತ್ತು ಅರ್ಬಾಜ್​ ಇಬ್ಬರು ಚುಡಾಯಿಸಲು ಯತ್ನಿಸಿದರೆ, ಮತ್ತೊಬ್ಬ ದುಷ್ಕರ್ಮಿ ಫೈಸಲ್​ ಕೆಳಗೆ ಬಿದ್ದ ವಿದ್ಯಾರ್ಥಿನಿ ಮೇಲೆ ಬೈಕ್​ ಹರಿಸಿದ್ದಾನೆ ಎಂದು ವಿದ್ಯಾರ್ಥಿನಿಯ ತಂದೆ ದಾಖಲಿಸಿರುವ ಎಫ್​ಐಆರ್​ನಲ್ಲಿ ಉಲ್ಲೇಖವಾಗಿದೆ.

ಸಂತ್ರಸ್ತೆಯ ಕುಟುಂಬದವರು ನೀಡಿದ ದೂರಿನ ಆಧಾರದ ಮೇಲೆ ಪ್ರಕರಣ ದಾಖಲಿಸಿಕೊಳ್ಳಲಾಗಿದ್ದು, ದೂರಿನಲ್ಲಿ ಹೆಸರಿಸಲಾದ ಆರೋಪಿಗಳನ್ನು ಬಂಧಿಸಲಾಗಿದೆ. ಸಂಗ್ರಹಿಸಿದ ಸಾಕ್ಷ್ಯಗಳ ಆಧಾರದ ಮೇಲೆ ಮುಂದಿನ ಕ್ರಮ ಕೈಗೊಳ್ಳಲಾಗುವುದು ಎಂದು ಹಿರಿಯ ಪೊಲೀಸ್ ಅಧಿಕಾರಿ ಸಂಜಯ್ ಕುಮಾರ್ ರೈ ತಿಳಿಸಿದ್ದಾರೆ. (ಏಜೆನ್ಸೀಸ್​)

https://www.vijayavani.net/special-article-about-pm-modi-in-relation-to-his-birthday

https://www.vijayavani.net/commission-taking-for-vehicle-number-plate-booking

https://www.vijayavani.net/be-careful-in-front-of-unknown-people